૮ માર્ચઃ ૧૮૧ અભયમ્ મહિલા હેલ્પ લાઈનની સફળતાનાં દસ વર્ષ પૂર્ણ
અરવલ્લી, 8 માર્ચ, 2025: રાજ્યમાં મહિલા સુરક્ષા માટે શરૂ કરવામાં આવેલી અભયમ્ હેલ્પલાઈના આજે અર્થાત 8મી માર્ચને મહિલા દિવસે દસ વર્ષ પૂરા થયા છે.
ગુજરાત રાજ્યની વિશેષતા છે કે પ્રત્યેક બાબતમાં આગવી રીતે પહેલ કરી લોકોને સરળતાથી યોજનાનો લાભ પહોંચાડી શકાય તેવા અનેક સંવેદનશીલ નિર્ણયો લેવામાં આવે છે. ગુજરાત સરકારની ફ્લેગશીપ યોજના તરીકે મહિલાઓના શારીરિક, માનસિક, જાતિય અત્યાચાર અને ઘરેલુ હિંસા સહિતમાં ત્વરિત પ્રતિસાદ, માર્ગદર્શન અને બચાવની અસરકારક કામગીરીના દસ વર્ષ પૂર્ણ થયા છે.
મહિલાઓ પર થતા અત્યાચારના કેસોમાં તાત્કાલિક ધોરણે મદદ પહોંચાડી શકાય તે હેતુથી ગુજરાત સરકારના મહિલા અને બાળ વિભાગ, ગૃહ વિભાગ દ્વારા અભયમ્ સેવા ૮ માર્ચ ૨૦૧૫ આંતરરાષ્ટ્રીય મહિલા દિવસે International Women’s Day કાર્યાન્વિત કરવામાં આવેલી જેને ઈ. એમ. આર. આઇ, ગ્રીન હેલ્થ સર્વિસ દ્વારા સંચાલન કરવામાં આવી રહી છે. આ સેવા હેઠળ અત્યાચારનો ભોગ બનતી મહિલાઓને તત્કાળ મદદ પહોંચાડવામાં આવે છે જેના માટે હેલ્પલાઈન નંબર પણ જારી કરવામાં આવેલો છે.
યોજનાના પ્રારંભથી ૨૦૨૫ દરમિયાન કુલ ૧૬,૧૬,૮૪૪ મહિલાઓએ મદદ માટે ૧૮૧ મહિલા હેલ્પ લાઇનમાં કોલ કર્યા. જેને પગલે અભયમની ટીમે ઘટના સ્થળે પહોંચી ૩,૨૪,૪૦૧ મહિલાઓને મદદ પહોંચાડી. ગંભીર પ્રકારના ગુનાઓ સામે અને જરુરિયત મુજબ ૯૯,૪૬૭ જેટલી મહિલાઓના ગંભીર કેસમાં ઘટના સ્થળે પહોંચી અભયમ્ રેસ્કયુ વાને મદદ, સલાહ અને બચાવ કાર્ય કર્યાં છે. આ ઉપરાંત ૨,૦૫,૦૫૧ કેસમાં સમાધાન કરાવવામાં સફળતા મળી છે. અરવલ્લી જિલ્લામાં વર્ષ ૨૦૨૪ દરમિયાન ૨૭૫૫ પીડિત મહિલાઓએ મદદ માટે કોલ કર્યા હતા, જેઓને માર્ગદર્શન ઉપરાંત કટોકટીની સ્થિતિમાં ઘટના સ્થળે પહોંચીને ૫૭૬ જેટલી મહિલાઓને મદદ અને બચાવ કાર્ય કર્યા છે.
રાજ્યના તમામ વિસ્તારમાં અભયમ્ સેવાઓ ૫૯ અભયમ રેસ્કયુ વાન સાથે ૨૪X૭ વિના મૂલ્યે ઉપલબ્ધ છે, જે લગ્નજીવનના વિખવાદો, પારિવારીક સમસ્યાઓ અને લગ્નેતર સંબંધમાં અસરકારક રીતે કુશળ અભયમ્ કાઉન્સિલર દ્વારા સુખદ સમાધાન કરાવ્યું છે જેથી અનેક મહિલાઓનાં જીવનમાં સુખમય સમાધાન થયા છે.
આ ઉપરાંત બીનજરૂરી કોલ અને મેસેજથી હેરાનગતી, કાર્ય સ્થળે જાતિય સતામણી, બાળ જન્મની બાબતો, છેડતી, આરોગ્ય અને રોજગારીના પ્રશ્નો, આપઘાતના વિચારોમાંથી મુક્તિ, તરછોડી દીધેલી મહિલાઓ કે મનોરોગી મહિલાઓને પરિવાર, નારીગૃહ કે આશ્રય સ્થાનોમાં સુરક્ષિત રાખવા વગેરેમાં મહિલા, કિશોરીઓ અને વિદ્યાર્થિનીઓના પ્રશ્નોનું અસરકારક સુખદ નિવારણ લાવવામાં આવ્યું છે જેથી આજે ગુજરાતની મહિલાઓમાં દિન પ્રતિદિન અભયમની કામગીરીની વિશ્વનીયતામાં વધારો થયો છે અને એક અભિનવ હેલ્પ લાઇન તરીકે મહિલાઓની સાચી સહેલી તરીકે આ હેલ્પલાઈન ઉપસી આવી છે. પોતાના સ્માર્ટ મોબાઈલમાં અભયમ મોબાઈલ એપ્લિકેશન (મોબાઈલ એપ) ડાઉનલોડ કરવાથી અભયમની સેવાઓ ઝડપથી પ્રાપ્ત થાય છે.
આ પણ વાંચોઃ સ્ત્રી એટલે રિહર્સલ વગર દરેક ભૂમિકા નિભાવતું ઈશ્વરનું અદભુત સર્જનઃ મંત્રી ભાનુબેન બાબરીયા
ઝડપી, સચોટ અને પ્રમાણિત સમાચાર મેળવવા નીચે જણાવેલા અમારા કોઈપણ વૉટ્સએપ ગ્રુપમાં જોડાઈ શકો છો >>>
https://chat.whatsapp.com/LuLIACK4WTYDPGdlAsSGrD
