નકલી પાન અને આધારકાર્ડથી વેપારીઓ સાથે છેતરપિંડી, મુંબઈમાંથી મોટા રેકેટનો પર્દાફાશ, જાણો વિગતો

મુંબઈ, 24 ફેબ્રુઆરી : મુંબઈ પોલીસ ક્રાઈમ બ્રાન્ચે એક મોટા રેકેટનો પર્દાફાશ કર્યો છે જેમાં આરોપીઓએ નકલી આધાર કાર્ડ અને પાન કાર્ડનો ઉપયોગ કરીને 7.30 કરોડ રૂપિયાની પ્રીમિયમ કાર ખરીદી હતી. આરોપીઓએ પહેલા રાજ્ય બહાર સ્થિત વેપારીઓના GST નંબરનો ઉપયોગ કર્યો હતો. આ પછી તેઓને બનાવટી પાન કાર્ડ અને આધાર કાર્ડ મળ્યા અને તે વેપારીઓના CIBIL સ્કોર ચેક કર્યા હતા.

બનાવટી દસ્તાવેજોથી બેંકમાંથી લોન લીધી હતી

સારા CIBIL સ્કોર ધરાવતા ઉદ્યોગપતિઓના નામે બનાવટી દસ્તાવેજોનો ઉપયોગ કરીને બેંકો પાસેથી લોન મેળવી. લોન મળ્યા બાદ તેઓએ કાર ખરીદી અને પછી એન્જિન નંબર અને ચેસીસ નંબર બદલીને અન્ય રાજ્યોમાં આ કારોને વેચી દીધી. આ ટોળકી દિલ્હી, ગુજરાત અને મધ્યપ્રદેશના એજન્ટો દ્વારા તે રાજ્યોના રહેવાસીઓને કાર વેચતી હતી.

આ રીતે તેઓએ બેંકો, વેપારીઓ અને કાર ખરીદનારા લોકો સાથે છેતરપિંડી કરી હતી. પોલીસના જણાવ્યા અનુસાર આ ગેંગમાં સામેલ કેટલાક આરોપીઓ કાર ચોરીના કેસમાં પણ સક્રિય હોવાની આશંકા છે. અત્યાર સુધીમાં પોલીસે આ કેસમાં 16 વાહનો જપ્ત કર્યા છે, જેમાં એક BMW ઓપન ટોપ કન્વર્ટિબલ, 8 ફોર્ચ્યુનર એસયુવી અને અન્ય મોંઘી કારનો સમાવેશ થાય છે.

પકડાયેલા આરોપીઓ કયા રાજ્યોમાંથી છે?

પોલીસનું કહેવું છે કે આ કારોની સંખ્યા 35 સુધી પહોંચી શકે છે. 7 આરોપીઓની ધરપકડ કરવામાં આવી છે, જેમાંથી 4નો અગાઉનો ગુનાહિત રેકોર્ડ છે. ધરપકડ કરાયેલા ત્રણ આરોપીઓ મુંબઈ અને ઉપનગરોના છે, જ્યારે કેટલાક ગુજરાત અને મધ્યપ્રદેશના અને કેટલાક દિલ્હીના છે. પોલીસ આ મામલે વધુ તપાસ કરી રહી છે અને આ રેકેટમાં અન્ય કોણ સામેલ છે તે શોધવાનો પ્રયાસ કરી રહી છે.

આ પણ વાંચો :- ચા ની ખુશ્બુ એક ચા વાળાથી વધુ કોણ જાણી શકે? આસામમાં PM મોદીએ યોજી રેલી અને સભા