SENSEX : શેરબજારમાં બ્લડબાથ, સેન્સેક્સ 1100 પોઇન્ટથી વધુ ગબડ્યો, ટ્રમ્પના ‘ટેરિફ ટેરર’નો પ્રભાવ

નવી દિલ્હી, 11 ફેબ્રુઆરી: 2025: શેરબજારમાં આજે સતત પાંચમાં સત્રમાં ઘટાડો આગળ ચાલ્યો હતો. અમેરિકામાં વધી રહેલા વેપાર તણાવ, ડોનાલ્ડ ટ્રમ્પની ટેરિફ ધમકી, સતત એફઆઇઆઇની વેચવાલી અને નબળા કોર્પોરેટ પરિણામો આ ઘટાડા માટે જવાબદાર હોવાનું મનાઇ રહ્યુ છે. આ સાથે મિડકેપ અને સ્મોલ કેપ બન્નેમાં 3.5 ટકાનો ઘટાડો થયો છે. બપોરના ટ્રેડમાં સેન્સેક્સ 1100થી વધુના ઘટાડા સાથે 76148 અને નિફ્ટી 375 પોઇન્ટના ઘટાડા સાથે  23,005 પર ટ્રેડ કરી રહી છે.

અમેરિકન રાષ્ટ્રપતિ ડોનાલ્ડ ટ્રમ્પના ટેરિફ ટેરરની ભારતીય શેરબજાર પર અસર ઓછી થતી દેખાતી નથી અને તેના કારણે બજાર સુધરતું નથી લાગતું. મંગળવારે, અઠવાડિયાના બીજા કારોબારી દિવસે, બોમ્બે સ્ટોક એક્સચેન્જના 30 શેરોવાળા સેન્સેક્સ અને નેશનલ સ્ટોક એક્સચેન્જના નિફ્ટી રેડ ઝોનમાં ખુલ્યા અને શરૂઆતની સુસ્તી થોડી જ વારમાં તીવ્ર ઘટાડામાં ફેરવાઈ ગઈ. ટ્રેડિંગના માત્ર એક કલાકમાં, સેન્સેક્સ 350 પોઈન્ટથી વધુ ગગડી ગયો, જ્યારે નિફ્ટી 100 પોઈન્ટથી વધુ ગબડી ગયો હતો.

શેરબજારમાં ઘટાડાનો ટ્રેન્ડ ચાલુ રહ્યો છે. સુસ્ત શરૂઆત પછી, BSE સેન્સેક્સ 350 પોઈન્ટથી વધુ ઘટ્યો, જ્યારે NSE નિફ્ટી પણ 100 પોઈન્ટથી વધુ નીચે ટ્રેડ કરી રહ્યો છે. અમેરિકાના રાષ્ટ્રપતિ ડોનાલ્ડ ટ્રમ્પે પદ સંભાળતાની સાથે જ ટેરિફ યુદ્ધ શરૂ કરી દીધું છે. ગયા અઠવાડિયે તેમના દ્વારા કરવામાં આવેલી એક જાહેરાતથી ભારતીય વ્યાપાર જગતમાં ચિંતા વધી ગઈ. હકીકતમાં, તેમણે અમેરિકામાં થતી તમામ સ્ટીલ અને એલ્યુમિનિયમ આયાત પર 25% ડ્યુટીની જાહેરાત કરી છે.

ટાટા સ્ટીલ, જેએસડબ્લ્યુ સ્ટીલ, નાલ્કોથી લઈને આ ક્ષેત્ર સાથે સંબંધિત તમામ કંપનીઓના શેરમાં સોમવારે મોટો ઘટાડો જોવા મળ્યો અને મંગળવારે આ બધા શેર લાલ નિશાનમાં ટ્રેડ થઈ રહ્યા છે. લાર્જ-કેપ કેટેગરીમાં ઝોમેટો શેર (4.56%), પાવરગ્રીડ શેર (2.05%), કોટક બેંક શેર (2%) અને ટાટા મોટર્સ શેર (1.90%) નીચા ભાવે ટ્રેડ થઈ રહ્યા હતા. સૌથી વધુ નુકસાન એલિકોન શેરને થયું, જે 16.05% ના ઘટાડા સાથે ટ્રેડ થઈ રહ્યો હતો. આ ઉપરાંત, NGL ફાઇન શેરમાં 13.19% નો ઘટાડો જોવા મળ્યો.

આ પણ વાંચો….સોનાના ભાવમાં ફરી મોટો ફેરફાર: જાણો આજનો લેટસ્ટ ભાવ