પ્રવેશ શર્મા બનશે દિલ્હીના નવા મુખ્યમંત્રી, બીજેપીએ આ મોટા સંકેત આપ્યા

નવી દિલ્હી, 8 ફેબ્રુઆરી 2025 :  દિલ્હી વિધાનસભા ચૂંટણીના પરિણામો ચોંકાવનારા છે. AAP ના રાષ્ટ્રીય કન્વીનર અરવિંદ કેજરીવાલ અને તેમના નજીકના સહાયક મનીષ સિસોદિયાને હારનો સામનો કરવો પડ્યો છે. આ સાથે, AAP ને 23 બેઠકો મળતી જોવા મળી રહી છે. હવે ભાજપ અહીં સરકાર બનાવવા જઈ રહી છે. વલણોમાં ભાજપને 47 બેઠકો મળતી જોવા મળી રહી છે. આ પછી, પ્રશ્ન એ છે કે ભાજપનો મુખ્યમંત્રી ચહેરો કોણ હશે?

દિલ્હીના પૂર્વ મુખ્યમંત્રી કેજરીવાલને ભાજપના ઉમેદવાર પ્રવેશ વર્માએ હરાવ્યા છે. આવી સ્થિતિમાં, એવું માનવામાં આવે છે કે પ્રવેશ વર્મા મુખ્યમંત્રી પદ માટે મુખ્ય દાવેદાર છે. જોકે અત્યાર સુધી તે તેનો ઇનકાર કરતા આવ્યા છે.

સીટોના કિસ્સા

રસપ્રદ વાત એ છે કે, છેલ્લી કેટલીક ચૂંટણીઓમાં નવી દિલ્હી બેઠક જીતનાર નેતા મુખ્યમંત્રી બન્યા છે. અરવિંદ કેજરીવાલ 2013, 2015 અને 2020 માં આ બેઠક પરથી જીત્યા અને મુખ્યમંત્રી બન્યા. તેમણે 2013માં શીલા દીક્ષિતને હરાવ્યા હતા.

શીલા દીક્ષિત આ બેઠક પરથી એક વખત ચૂંટાયા હતા. આ પહેલા, તે ગોલ માર્કેટ બેઠક પરથી બે વાર ચૂંટાઈ આવ્યા હતા. પછી તે મુખ્યમંત્રી બન્યા. ૨૦૦૮માં સીમાંકન પછી ગોલ માર્કેટ બેઠક બદલાઈ ગઈ અને તેનું નામ બદલીને નવી દિલ્હી રાખવામાં આવ્યું.

પ્રવેશ વર્મા અમિત શાહને મળ્યા

શનિવારે ચૂંટણી જીત્યા બાદ, પ્રવેશ વર્મા કેન્દ્રીય ગૃહમંત્રી અમિત શાહને મળવા પહોંચી ગયા. એવું માનવામાં આવે છે કે અહીં મુખ્યમંત્રીના ચહેરાની ચર્ચા થઈ હતી. અરવિંદ કેજરીવાલે ચૂંટણી પ્રચાર દરમિયાન વર્મા પર પૈસા વહેંચવાનો આરોપ લગાવ્યો હતો અને પૂછ્યું હતું કે શું ભાજપનો મુખ્યમંત્રી ચહેરો પ્રવેશ વર્મા હશે?

આજે અરવિંદ કેજરીવાલ સામે જીત મેળવ્યા પછી, પ્રવેશ વર્માએ X પર જય શ્રી રામ લખ્યું. તેમણે એમ પણ કહ્યું, “આ જે સરકાર બની રહી છે તે વડા પ્રધાનના વિઝન સાથે દિલ્હીમાં આવશે. હું દિલ્હીના લોકોનો આભાર માનું છું. આ વડા પ્રધાન નરેન્દ્ર મોદી અને દિલ્હીના લોકોની જીત છે.”

આ પણ વાંચો : અમદાવાદ: બુલેટ ટ્રેન સ્ટેશનમાં ભીષણ આગ: ફાયર વિભાગની 14 ગાડીઓ દોડી