અમદાવાદ: SP રિંગ રોડને 6 લેન કરાશે, જાણો ક્યાં બનશે અંડરપાસ-ઓવરબ્રિજ
- દરરોજ 1 લાખથી વઘુ વાહનોની અવર-જવર થાય છે
- અંદાજે રૂ. 2200 કરોડના ખર્ચે અંદાજ પત્રક તૈયાર કરીને ટેન્ડર પ્રક્રિયા હાથ ધરાશે
- ત્રાગડ અંડરપાસની બંને બાજુ બીજા બે માર્ગીય અંડરપાસ બનાવાશે
અમદાવાદ શહેરી વિકાસ સત્તામંડળની યોજાયેલી 302મી બોર્ડ બેઠકમાં વિવિધ વિસ્તારની કુલ 18 નગર રચના યોજનાઓની કાર્યપૂર્ણ પહેલાની દરખાસ્તોને પરામર્શ આપવામાં આવ્યો હતો. જેમાં SP રીંગ રોડ પરથી દરરોજ 1 લાખથી વઘુ વાહનોની અવર-જવર થાય છે તેવા ઔડાના SP રીંગ રોડને ચાર માર્ગીયમાંથી 6 માર્ગીય કરવા અંગેની કામગીરી હાથ ધરાશે.
ઔડાની બોર્ડ બેઠકમાં દરખાસ્તો
– સરદાર પટેલ (SP)નો મુખ્ય કેરેજવે છ માર્ગીય કરાશે.
– SPરીંગ રોડની આસપાસ વિકસી રહેલી ટી.પી. સ્કીમના રહેવાસીઓના રોડ ક્રોસિંગ માટે 6 ફૂટ ઓવરબ્રિજ બનાવાશે.
– સાબરમતી નદી પરના ભાટ તથા કમોડ બ્રિજની બંને બાજુ 3 લેનના નવીન બ્રિજ બનાવવા.
– SP રીંગ રોડ પર ત્રાગડ અંડરપાસની બંને બાજુ બીજા બે માર્ગીય અંડરપાસ બનાવાશે.
– ભાટ સર્કલ, ચિલોડા સર્કલ, અસલાલી સર્કલ પર 6 માર્ગીય અંડરપાસ બનાવાશે.
અંદાજે રૂ. 2200 કરોડના ખર્ચે અંદાજ પત્રક તૈયાર કરીને ટેન્ડર પ્રક્રિયા હાથ ધરાશે
આ પ્રોજેક્ટમાં પેકેજ-1માં અમદાવાદના પૂર્વ વિસ્તારના 37 કિલોમીટર, પેકેજ-2માં પશ્ચિમ વિસ્તારના SP રીંગ રોડની 39.254 કિલોમીટર લંબાઇમાં વિકસાવવા અંદાજે રૂ. 2200 કરોડના ખર્ચે અંદાજ પત્રક તૈયાર કરીને ટેન્ડર પ્રક્રિયા હાથ ધરાશે. આ ઉપરાંત સાબરમતી નદી પરના ભાટ તથા કમોડ હયાત બ્રિજની બંને બાજુ 3 લેનના નવિન બ્રિજ બનાવવાનું તથા ભાટ સર્કલ, ચિલોડા સર્કલ, અસલાલી સર્કલ પર થતા ટ્રાફિકના ભારણને ઘટાડવા 6 માર્ગીય અંડરપાસ જ્યારે હયાત ત્રાગડ અંડરપાસની બંને બાજુ બીજા બે માર્ગીય નવીન અંડરપાસ બનાવાશે.
આ પણ વાંચો: અમદાવાદ: પતિએ વોટ્સએપ અને ઇન્સ્ટાગ્રામ પર પત્નીના અંગત ફોટો મુકી ધમકી આપી
