જમ્મુ-કાશ્મીર : ગુલમર્ગમાં ગોંડોલાના ટાવરનો કેબલ વાયર તૂટી ગયો, અનેક પ્રવાસીઓ કેબિનમાં ફસાયા

ગુલમર્ગ, 26 જાન્યુઆરી : જમ્મુ-કાશ્મીરના ગુલમર્ગ ગોંડોલાના ટાવર નંબર 1નો કેબલ વાયર તૂટી ગયો છે. જેના કારણે 15 અને 16 નજીક 20 જેટલી કેબિન લટકી રહી છે, જેમાં 120થી વધુ પ્રવાસીઓ ફસાયા હોવાનું જાણવા મળે છે. બચાવ કામગીરી શરૂ કરી દેવામાં આવી છે. અધિકારીઓનું કહેવું છે કે ટેકનિકલ ખામીના કારણે ગુલમર્ગ ગોંડોલા ઓપરેશનને અસ્થાયી રૂપે રોકી દેવામાં આવ્યું છે અને બચાવ કામગીરી હાથ ધરવામાં આવી રહી છે.

બીજી તરફ અધિકારીઓનું કહેવું છે કે ચિંતા કરવાની કોઈ જરૂર નથી, ટૂંક સમયમાં જ ગોંડોલા સેવાઓ પુનઃસ્થાપિત કરવામાં આવશે. તેમણે કહ્યું કે, રવિવારે ટેક્નિકલ ખામીને કારણે ગુલમર્ગ ગોંડોલાના પ્રથમ તબક્કાની કામગીરી ખોરવાઈ ગઈ હતી, જેના કારણે ઘણા પ્રવાસીઓ કેબિનમાં અટવાઈ ગયા હતા. અધિકારીએ જણાવ્યું કે આ સમસ્યા ત્યારે ઊભી થઈ જ્યારે ગરગડીમાંથી દોરડું સરકી ગયું, જેના કારણે કેબલ કારની સિસ્ટમ અટકી ગઈ હતી. તેણે કહ્યું કે દોરડું તરત જ પુલી પર પાછું મૂકી દેવામાં આવ્યું હતું.

રાહત કાર્ય ચાલુ, એન્જિનિયરિંગ ટીમ તૈનાત

દરમિયાન, પરિસ્થિતિ પર નજર રાખતા એક અધિકારીએ કહ્યું કે ચિંતા કરવાની કોઈ જરૂર નથી કારણ કે સમસ્યાને ઉકેલવા માટે તરત જ એક એન્જિનિયરિંગ ટીમ તૈનાત કરવામાં આવી છે. અધિકારીઓએ કહ્યું કે અમારી ટીમ કામમાં વ્યસ્ત છે અને શક્ય તેટલી વહેલી તકે સિસ્ટમને પુનઃસ્થાપિત કરવાના પ્રયાસો ચાલુ છે. તેમણે એમ પણ કહ્યું હતું કે સેવાઓ ટૂંક સમયમાં પુનઃસ્થાપિત કરવામાં આવશે. ગુલમર્ગ ગોંડોલા, વિશ્વની સૌથી ઊંચી કેબલ કારમાંની એક અને આ પ્રદેશમાં મુખ્ય પ્રવાસી આકર્ષણ છે, તેના પ્રથમ તબક્કામાં બેઝ સ્ટેશનને કોંગડોરી સાથે જોડે છે, અને તેના બીજા તબક્કામાં અફ્રાવત શિખર સુધી જાય છે.

2017માં એક અકસ્માતમાં સાતના મોત થયા હતા

મહત્વનું છે કે આ પહેલા વર્ષ 2017માં ગોંડોલા કેબલ તૂટવાને કારણે સાત લોકોના મોત થયા હતા. તે સમયે કેબલ કાર જમીન પર પડી હતી અને તેમાં સવાર તમામ લોકોના મોત થયા હતા. વાવાઝોડામાં એક વૃક્ષ ધરાશાયી થતાં કેબલ તૂટી ગયો હતો. મૃતકોમાં બે બાળકોનો પણ સમાવેશ થાય છે. ગુલમર્ગની કેબલ કાર વિશ્વની સૌથી ઊંચી કેબલ કાર છે. ઉલ્લેખનીય છે કે ગુલમર્ગમાં કેબલ કાર મુસાફરોને 4,100 મીટર (13,450 ફીટ) ની ઉંચાઈ પર લઈ જાય છે અને હિમાલયનો સુંદર નજારો આપે છે, જે વર્ષના આ સમયે પણ બરફથી ઢંકાયેલો રહે છે.

આ પણ વાંચો :- દિલ્હી ચૂંટણી : નવી સરકારમાં મનીષ સિસોદિયા હશે Dy.CM, કેજરીવાલની મોટી જાહેરાત