IND vs ENG : બીજી T20 મેચમાં પણ ભારતની જીત, તિલક વર્માએ ફટકારી વિજયી બાઉન્ડ્રી

ચેન્નઈ, 25 જાન્યુઆરી : ભારત અને ઈંગ્લેન્ડ વચ્ચે પાંચ મેચોની T20 શ્રેણીની બીજી મેચ (25 જાન્યુઆરી) ના રોજ ચેન્નઈના એમએ ચિદમ્બરમ સ્ટેડિયમમાં રમાઈ હતી. આ મેચમાં ભારતીય ટીમે ઈંગ્લેન્ડને બે વિકેટથી હરાવ્યું હતું.
ભારતીય ટીમની જીતના હીરો તિલક વર્મા રહ્યા, જેમણે 55 બોલમાં 72 રનની અણનમ ઇનિંગ રમી જેમાં ચાર ચોગ્ગા અને પાંચ છગ્ગાનો સમાવેશ થાય છે.

ભારતને મેચ જીતવા માટે 166 રનનો ટાર્ગેટ હતો, જે તેણે ચાર બોલ બાકી રહેતાં હાંસલ કરી લીધો હતો. આ જીત સાથે ભારતીય ટીમે ટી20 શ્રેણીમાં 2-0ની લીડ મેળવી લીધી છે. સીરીઝની ત્રીજી મેચ 28 જાન્યુઆરીએ રાજકોટમાં રમાશે. ટાર્ગેટનો પીછો કરવા ઉતરેલી ભારતીય ટીમની શરૂઆત ખરાબ રહી હતી અને પાવરપ્લેમાં જ તેણે ત્રણ વિકેટ ગુમાવી દીધી હતી.

કોલકાતા T20માં જીતનો હીરો અભિષેક શર્મા માત્ર 12 રન બનાવીને માર્ક વુડના બોલ પર LBW થયો હતો. જ્યારે સંજુ સેમસન (5) ફરી એકવાર જોફ્રા આર્ચરનો શિકાર બન્યો હતો. સૂર્યકુમાર યાદવનું ખરાબ ફોર્મ ચાલુ રહ્યું અને તે 12 રનના અંગત સ્કોર પર બ્રેડન કાર્સનો શિકાર બન્યો હતો. ધ્રુવ જુરેલ અને હાર્દિક પંડ્યા પણ સસ્તામાં આઉટ થયા હતા. જેના કારણે ભારતનો સ્કોર પાંચ વિકેટે 78 રન થઈ ગયો હતો.

જો કે, વિકેટ પડવાની વચ્ચે તિલક વર્મા ક્રિઝ પર રહ્યા હતા. તિલકે વોશિંગ્ટન સુંદર સાથે મળીને છઠ્ઠી વિકેટ માટે 38 રનની મહત્વપૂર્ણ ભાગીદારી કરી હતી. સુંદરે 19 બોલમાં 26 રન બનાવ્યા જેમાં ત્રણ ચોગ્ગા અને એક છગ્ગાનો સમાવેશ થાય છે. સુંદરને બ્રેડન કારસે બોલ્ડ કર્યો હતો. સુંદર બાદ અક્ષર પટેલ (2) પણ સસ્તામાં આઉટ થયો હતો.

ભારતે જીતવા માટે છેલ્લી 5 ઓવરમાં 40 રન બનાવવાના હતા અને તેની ત્રણ વિકેટ હાથમાં હતી. 16મી ઓવર જોફ્રા આર્ચરે ફેંકી હતી, જેમાં તિલક વર્મા અને અર્શદીપ સિંહે મળીને 19 રન બનાવ્યા હતા. હવે સમીકરણ ભારતની તરફેણમાં જોવા લાગ્યું કારણ કે 24 બોલમાં માત્ર 21 રન બનાવવાના હતા. આદિલ રાશિદે 17મી ઓવર નાખી, જેમાં તેણે માત્ર 1 રન આપ્યો અને અર્શદીપની વિકેટ પણ લીધી હતી.