ગુજરાત ATSનું મોટું ઓપરેશન : આણંદમાંથી ડ્રગ્સ બનાવતી ફેક્ટરી ઝડપાઈ

આણંદ, 24 જાન્યુઆરી : આણંદના ખંભાતમાં આવેલ સોખડા જીઆઈડીસીમાં આવેલી એક ફાર્માસ્યુટિકલ ફૅક્ટરીમાંથી મોટા પાયે ડ્રગ્સનો જથ્થો ઝડપાયો હોવાનું જાણવા મળી રહ્યું છે. ગુજરાત એન્ટી ટેરેરીસ્ટ સ્ક્વોર્ડ (એટીએસ)ની ટીમે ગુરુવાર સવારે આ ફેક્ટરીમાં દરોડા પાડ્યા હતા. જેમાં 60થી વધુ અધિકારીએ સર્ચ ઓપરેશન હાથ ધરીને રૂપિયા 1 કરોડથી વધુનો નશાયુક્ત પાઉડર કબજે કર્યો હતો. એટીએસની ટીમે ફેક્ટરીના સંચાલક સહિત કુલ 5 શખસોની ધરપકડ કરી છે.

સૂત્રો પાસેથી મળતી માહિતી અનુસાર ખંભાતની સોખડા જીઆઇડીસી વિસ્તારમાં આવેલી ગ્રીનલાઇફ ઈન્ડસ્ટ્રીઝમાં ગુજરાત એટીએસની ટીમે દરોડા પાડ્યા હતા. ગુરુવારે વહેલી સવારથી બલ્ક ડ્રગ્સ અને મેન્યુફેક્ચરિંગ કરતી ગ્રીનલાઇફ ઈન્દ્રસ્ટ્રીઝમાં ટીમે અંદાજે 18 કલાક સુધી તપાસ કરી હતી, જેમાં કંપનીના માલિકો, પાર્ટનર સહિત કર્મચારીઓની મોડી સાંજ સુધી પૂછપરછ કરાઈ હતી.

એટીએસ દ્વારા આ કંપનીમાં ડ્રગ્સ હોવાની આશંકાને આધારે સર્ચ ઓપરેશન કરાયું હતું. આ સર્ચ ઓપરેશન દરમિયાન એટીએસની ટીમે આણંદ એસઓજી અને એફએસએલની ટીમને પણ સાથે રાખી હતી. ગુરુવારે મોડી સાંજ સુધી ઓપરેશન પૂરું થતાં જ એટીએસની ટીમ શંકાસ્પદ 5 વ્યક્તિને લઈને અમદાવાદ રવાના થઈ હતી. જો કે આ અંગે હજુ કોઈ સત્તાવાર જાહેરાત એટીએસ દ્વારા કરવામાં આવી નથી.

આ પણ વાંચો :- વડોદરાની ત્રણ સ્કૂલને બોમ્બથી ઉડાવી દેવાનો મેઈલ મળ્યો, તપાસ શરૂ