ઇન્ટરનેશનલ ડેસ્કઃ પાકિસ્તાનના એક ખતરનાક આતંકીના મોતના સમાચાર છે. એક ઈન્ટેલિજન્સ રિપોર્ટ અનુસાર પાકિસ્તાનનો આ વરિષ્ઠ આતંકી અફઘાનિસ્તાનમાં માર્યો ગયો છે. આતંકવાદીના માથા પર 30 લાખ ડોલર એટલે કે 23 કરોડથી વધુનું ઇનામ હતું. આ આતંકીનું નામ અબ્દુલ વલી જણાવવામાં આવી રહ્યું છે. તે ઉમર ખાલિદ ખુરાસાની તરીકે પણ જાણીતો હતો અને તે પ્રતિબંધિત તહરીક-એ-તાલિબાન પાકિસ્તાન (TTP) સાથે સંકળાયેલો હતો.
પાકિસ્તાની અધિકારીઓએ જણાવ્યું હતું કે, અબ્દુલ વલીના મૃત્યુથી કાબુલમાં તાલિબાન શાસકો દ્વારા આયોજિત બેઠકો પછી TTP અને પાકિસ્તાન સરકાર વચ્ચે શાંતિ વાટાઘાટો શરૂ થઈ શકે છે. ખુરાસાની જમાત-ઉલ-અહરાર (JuA)નો વડા હતો. જમાત-ઉલ-અહરાર એ ટીટીપીની એક શાખા છે જેને સંયુક્ત રાષ્ટ્ર અને યુનાઇટેડ સ્ટેટ્સ ઑફ અમેરિકા દ્વારા આતંકવાદી જૂથ જાહેર કરવામાં આવ્યું છે. યુએસએ તેના પકડવા અથવા મૃત્યુ માટે $3 મિલિયન એટલે કે 23 કરોડથી વધુની ઓફર કરી હતી.
સોમવારે પાકિસ્તાની મીડિયાના એક સમાચારમાં આ માહિતી આપવામાં આવી છે. આ મુજબ પૂર્વી અફઘાનિસ્તાનના પક્તિકા પ્રાંતમાં એક રહસ્યમય વિસ્ફોટમાં TTP કમાન્ડર ઉમર ખાલિદ ખુરાસાની અને અન્ય ત્રણ અગ્રણી આતંકવાદીઓ માર્યા ગયા હતા. અફઘાન અધિકારીઓ અને સ્થાનિક સૂત્રોના જણાવ્યા અનુસાર, ખુરાસાની સહિતના આતંકવાદી સંગઠનના વરિષ્ઠ કમાન્ડરોને લઈ જતું એક વાહન રવિવારે એક રહસ્યમય વિસ્ફોટક ઉપકરણથી અથડાયું હતું તેવો ધ એક્સપ્રેસ ટ્રિબ્યુને અહેવાલ આપ્યો હતો.
અહેવાલમાં જણાવવામાં આવ્યું છે કે, ટોચના આતંકવાદીઓ પ્રાંતના બિર્મલ જિલ્લામાં મીટિંગ માટે જઈ રહ્યા હતા. ત્યારે તેમના વાહનને લેન્ડમાઈનથી અથડાઈ હતી. અખબારે એક વરિષ્ઠ અફઘાન અધિકારીને ટાંકીને જણાવ્યું હતું કે, વાહનમાં સવાર તમામ લોકો વિસ્ફોટમાં માર્યા ગયા હતા. તેમાં અબ્દુલ વલી મોહમ્મદ, મુફ્તી હસન અને હાફીઝ દૌલત ખાન જેવા ટોચના TTP કમાન્ડરનો સમાવેશ થાય છે, એમ પેપરમાં જણાવાયું હતું.
સ્થાનિક સૂત્રોના જણાવ્યા અનુસાર, તેઓ પરામર્શ માટે જઈ રહ્યા હતા. ત્યારે રવિવારે TTP નેતાઓનું વાહન લેન્ડમાઈન હેઠળ આવી ગયું. મોહમ્મદ આદિવાસી જિલ્લાનો વતની ખુરાસાની TTPનો ટોચનો કમાન્ડર માનવામાં આવતો હતો. આતંકવાદી જૂથ TTP સમગ્ર પાકિસ્તાનમાં શરિયા કાયદો લાગુ કરવા માંગે છે.
