અમદાવાદના ભારતીય માનક બ્યૂરો દ્વારા વિદ્યાર્થીઓ માટે J.K. સિમેન્ટ વર્ક્સની એક્સપોઝર વિઝિટ
- વિઝિટ દરમિયાન વિદ્યાર્થીઓને સિમેન્ટ ફેક્ટરીમાં ઉત્પાદિત સિમેન્ટની પ્રક્રિયા અને ગુણવત્તા ખાતરી પ્રક્રિયા વિશે માહિતગાર કરવામાં આવ્યા
અમદાવાદ, 21 ડિસેમ્બર: અમદાવાદની ભારતીય માનક બ્યૂરો(BIS)એ વિદ્યાર્થીઓના જ્ઞાન અને વ્યવહારુ અનુભવને વધારવા માટે એક વિશેષ પહેલના ભાગરૂપે તારીખ 20 ડિસેમ્બરના રોજ મહિસાગર જિલ્લાના બાલાસિનોરમાં આવેલી J.K. સિમેન્ટ વર્ક્સમાં સ્ટાન્ડર્ડ્સ ક્લબની છ શાળાઓના 122 વિદ્યાર્થીઓ માટે એક્સપોઝર વિઝિટનું આયોજન કર્યું હતું. વિઝિટ દરમિયાન વિદ્યાર્થીઓને સિમેન્ટ ફેક્ટરીમાં ઉત્પાદિત સિમેન્ટની પ્રક્રિયા અને ગુણવત્તા ખાતરી પ્રક્રિયા વિશે માહિતગાર કરવામાં આવ્યા હતા. વિદ્યાર્થીઓને સિમેન્ટના ઉત્પાદનમાં અપનાવવામાં આવતા સલામતીના માનકો સમજાવવામાં આવ્યા હતા.
અમદાવાદની BISએ ગુણવત્તા ખાતરીના પગલાંના અસરકારક અમલીકરણને સુનિશ્ચિત કરવા માટે વિવિધ હિતધારકો, જેમ કે સ્ટાન્ડર્ડ્સ ક્લબના સભ્યો, જિલ્લા વહીવટી અધિકારીઓ અને વિવિધ સરકારી વિભાગોના અધિકારીઓ માટે વિવિધ કાર્યક્રમોનું આયોજન કરે છે.
વિદ્યાર્થીઓને ઇતિહાસ, સ્થાપના અને ઉત્પાદનો વિશે માહિતી મળી
આ પ્રસંગે યુનિટ હેડ કમલેન્દ્ર પાલ સિંહે તમામ ઉપસ્થિતોને આવકાર્યા હતા અને બાલાસિનોરની J.K. સિમેન્ટ વર્ક્સના ઇતિહાસ, સ્થાપના અને ઉત્પાદનો વિશે માહિતી શેર કરી હતી. ગુણવત્તા નિયંત્રણના વડા રણજીત મંગલે પ્લાન્ટમાં પ્રયોગશાળા દ્વારા સહભાગીઓને માર્ગદર્શન આપ્યું હતું અને ઉત્પાદન માટે જરૂરી માનકોની સમજ આપી હતી. સુરક્ષા અધિકારી દીપક સિંહે પ્લાન્ટમાં સલામતીના માનકોનો ઉપયોગ, ઇમરજન્સીની તૈયારીઓ અને સલામતીના પગલાં અંગે પ્રેઝન્ટેશન આપ્યું હતું. તેમણે તમામ સહભાગીઓને સલામતી પ્રોટોકોલના વ્યવહારુ ઉપયોગ વિશે સમજાવ્યું હતું. ઉપસ્થિત વિદ્યાર્થીઓએ BIS માનકો, ISI માર્ક અને હોલમાર્ક જેવા પ્રમાણપત્રો અને BIS કેર એપના મહત્ત્વ વિશે જાણ્યું હતું. વિદ્યાર્થીઓ માટે ક્વિઝ સ્પર્ધાનું પણ આયોજન કરવામાં આવ્યું હતું, જેમાં તમામ સહભાગીઓએ ઉત્સાહપૂર્વક ભાગ લીધો હતો.
આ પ્રસંગે અમદાવાદ BISના પુનીત નાથવાણીએ વિદ્યાર્થીઓને BISના કાર્યો, માનકોની જરૂરિયાત અને તેમના મહત્ત્વ વિશે વિગતવાર માહિતી આપી હતી. તેમણે સમજાવ્યું કે, કેવી રીતે BIS દ્વારા નિર્ધારિત માનકો ઉત્પાદનોની ગુણવત્તાની ખાતરી કરે છે. અમિત સિંહે સમજાવ્યું કે, ગ્રાહકોને યોગ્ય માનકોને અનુરૂપ ગુણવત્તાયુક્ત ઉત્પાદનો મળે તે સુનિશ્ચિત કરવા માટે BIS સમગ્ર દેશમાં યોગ્ય માનકો નક્કી કરે છે, પરીક્ષણ કરે છે, લાઇસન્સ આપે છે અને લાગુ કરે છે.
સંબંધિત શાળાઓના શિક્ષકોએ પણ આ કાર્યક્રમમાં ભાગ લીધો હતો અને આ શૈક્ષણિક યાત્રા દરમિયાન વિદ્યાર્થીઓને માર્ગદર્શન આપ્યું હતું. આ એક્સપોઝર વિઝિટનો હેતુ વિદ્યાર્થીઓમાં વ્યવસાયિક પ્રક્રિયાઓ અને ગુણવત્તાના માનકો વિશે જાગૃતિ લાવવાનો હતો. BISની આ પહેલ દ્વારા વિદ્યાર્થીઓને ઉદ્યોગ અને ગુણવત્તા વ્યવસ્થાપનની વાસ્તવિક દુનિયાની પ્રક્રિયાઓને સમજવાની તક મળી હતી. આ વિઝિટ તેમના ભવિષ્ય માટે શૈક્ષણિક અને પ્રેરણાદાયી સાબિત થઈ હતી.
બ્યુરો ઓફ ઇન્ડિયન સ્ટાન્ડર્ડ્સ(BIS) શું છે?
બ્યુરો ઓફ ઇન્ડિયન સ્ટાન્ડર્ડ્સ (BIS)એ અર્થતંત્રના વિવિધ ક્ષેત્રોમાં ઉત્પાદનો, પ્રક્રિયાઓ અને સેવાઓ માટે ભારતીય માનકો ઘડવા માટે BIS અધિનિયમ, 2016 હેઠળ અધિકૃત ભારતની રાષ્ટ્રીય ધોરણોની સંસ્થા છે. BISને અનુરૂપતા આકારણી યોજનાઓ વિકસાવવા અને અમલ કરવાની જવાબદારી પણ સોંપવામાં આવી છે, જેમાં ધોરણોનું અમલીકરણ સુનિશ્ચિત કરવા માટે ગુણવત્તા પ્રમાણપત્રનો સમાવેશ થાય છે. એક મહત્વપૂર્ણ પહેલમાં, BISએ શૈક્ષણિક સંસ્થાઓમાં “સ્ટાન્ડર્ડ્સ ક્લબ”ની સ્થાપના કરી છે, જેમાં શિક્ષકો અને વિદ્યાર્થીઓને સભ્યો તરીકે સામેલ કરીને ગુણવત્તાયુક્ત જાગૃતિને પ્રોત્સાહન આપવા માટે બ્રાન્ડ એમ્બેસેડર તરીકે યુવાનોનું જીવંત જૂથ બનાવ્યું છે. આ ક્લબો હેઠળ હાથ ધરવામાં આવતી વિવિધ પ્રવૃત્તિઓ દ્વારા, યુવા પ્રતિભાઓને ગુણવત્તા અને માનકીકરણ વિશે શીખવાની તક મળે છે. બી.આઈ.એસ. એ સમગ્ર ભારતમાં 10,000 સ્ટાન્ડર્ડ ક્લબ સ્થાપવાનું મહત્ત્વાકાંક્ષી લક્ષ્ય હાંસલ કર્યું છે.
