સંજય રાઉતને ફરી ઝટકો, 22 ઓગસ્ટ સુધી કસ્ટડી

શિવસેનાના સાંસદ સંજય રાઉતને કોર્ટમાંથી રાહત મળી નથી. કોર્ટે તેમની કસ્ટડી 22 ઓગસ્ટ સુધી લંબાવી છે. ખાસ વાત એ છે કે પાત્રા ચાલ કેસમાં એન્ફોર્સમેન્ટ ડિરેક્ટોરેટની તપાસનો સામનો કરી રહેલા રાઉતની રવિવારે ધરપકડ કરવામાં આવી હતી. કોર્ટે તેમને ત્રીજી વખત કસ્ટડીમાં મોકલી દીધા છે.

કોર્ટે રાઉતની કસ્ટડી 8 ઓગસ્ટ સુધી લંબાવી હતી. મની લોન્ડરિંગ કેસમાં ઈડી રાઉતની તપાસ કરી રહી છે. શનિવારે તેમની પત્ની વર્ષા પણ તપાસ એજન્સી સમક્ષ પૂછપરછ માટે હાજર થઈ હતી. EDએ શનિવારે તેમની લગભગ 9 કલાક પૂછપરછ કરી હતી.

EDએ કહ્યું કે તપાસ દરમિયાન મળેલા દસ્તાવેજો દર્શાવે છે કે રાઉત દ્વારા અલીબાગમાં ખરીદેલી પ્રોપર્ટીમાં પણ મોટા રોકડ વ્યવહારો સામેલ હતા. તપાસ એજન્સીએ દાવો કર્યો છે કે રાઉતની પત્નીના બેંક ખાતામાંથી 1.08 કરોડ રૂપિયા મળી આવ્યા છે.

રાઉતની ગયા રવિવારે ધરપકડ કરવામાં આવી હતી. તે દરમિયાન તપાસ એજન્સીએ દાવો કર્યો હતો કે શિવસેના સાંસદના ઘરેથી 10 લાખ રૂપિયાથી વધુ રકમ મળી આવી હતી. જોકે, તેમના ભાઈનું કહેવું છે કે રૂપિયા પક્ષના હતા. રાઉતે અગાઉ એવો પણ દાવો કર્યો હતો કે પાર્ટીના સાંસદોને EDની ધમકીઓને કારણે શિંદેનો બળવો સફળ થયો હતો.