વિવાદિત નિવેદન અંગે અલ્હાબાદ હાઈકોર્ટના જસ્ટિસ યાદવને કોલેજિયમનું સમન્સ

નવી દિલ્હી, 16 ડિસેમ્બર : વિશ્વ હિન્દુ પરિષદના કાર્યક્રમમાં વિવાદાસ્પદ નિવેદન આપનાર અલ્હાબાદ હાઈકોર્ટના ન્યાયાધીશ જસ્ટિસ શેખર કુમાર યાદવને સુપ્રીમ કોર્ટના કોલેજિયમ દ્વારા સમન્સ પાઠવવામાં આવ્યું છે. જસ્ટિસ શેખર કુમાર યાદવ ટૂંક સમયમાં જ પોતાનું સ્ટેન્ડ સ્પષ્ટ કરવા માટે સુપ્રીમ કોર્ટ કોલેજિયમ સમક્ષ વ્યક્તિગત રીતે હાજર થશે. સૂત્રોના જણાવ્યા અનુસાર, ભારતના મુખ્ય ન્યાયાધીશ સંજીવ ખન્નાના નેતૃત્વ હેઠળની કૉલેજિયમ આ મુદ્દે ચર્ચા કરવા માટે સુપ્રીમ કોર્ટના શિયાળુ વેકેશન પહેલા મંગળવારે (17 ડિસેમ્બર) ના રોજ બેઠક કરશે.

ન્યાયાધીશે આ નિવેદન આપ્યું હતું

અલ્હાબાદ હાઈકોર્ટના જસ્ટિસ યાદવે 8 ડિસેમ્બરે પ્રયાગરાજમાં વિશ્વ હિન્દુ પરિષદ (VHP)ના એક કાર્યક્રમમાં સમાન નાગરિક સંહિતાને સમર્થન આપ્યું હતું. વાયરલ વીડિયોમાં તેણે યુનિફોર્મ સિવિલ કોડ (યુસીસી)ના અમલને સમર્થન આપ્યું હતું અને કહ્યું હતું કે કાયદા બહુમતીની પસંદગીઓને અનુરૂપ હોવા જોઈએ.

તેમણે કહ્યું, ‘આ ભારત છે એવું કહેવામાં કોઈ સંકોચ નથી.  ભારતમાં વસતા બહુમતીના હિસાબે જ દેશ ચલાવવામાં આવશે આ કાયદો છે. તમે એમ પણ ન કહી શકો કે અલ્હાબાદ હાઈકોર્ટના જસ્ટિસ હોવાને કારણે તે આવું કહી રહ્યા છે.  ભાઈ, કાયદો બહુમતીથી જ ચાલે છે. પરિવારમાં પણ જુઓ, સમાજમાં પણ જુઓ. જ્યાં વધુ લોકો હોય છે, જે કહેવામાં આવે છે તે સ્વીકારવામાં આવે છે. તેમણે એમ પણ કહ્યું કે ‘કટ્ટરપંથી’ દેશ માટે ખતરનાક છે.

આ નિવેદનની આકરી ટીકા થઈ હતી

આ વાયરલ વીડિયોની સોશિયલ મીડિયા પર આકરી ટીકા થઈ હતી અને ઘણા લોકોએ અને વિપક્ષી નેતાઓએ તેમના નિવેદનો અને ટિપ્પણીઓને વિભાજનકારી અને ગેરબંધારણીય ગણાવી હતી. આ પછી સુપ્રીમ કોર્ટે 10 ડિસેમ્બરે અલ્હાબાદ હાઈકોર્ટ પાસેથી રિપોર્ટ માંગ્યો હતો.   સર્વોચ્ચ અદાલતના સત્તાવાર નિવેદનમાં કહેવામાં આવ્યું છે કે, સુપ્રીમ કોર્ટે અલ્હાબાદ હાઈકોર્ટના સીટીંગ જજ જસ્ટિસ શેખર કુમાર યાદવ દ્વારા આપવામાં આવેલા ભાષણના અખબારના અહેવાલોની નોંધ લીધી છે. હાઈકોર્ટ પાસેથી વિગતો મંગાવવામાં આવી છે.

ન્યાયમૂર્તિ યાદવની ટિપ્પણીની રાજકીય અને કાનૂની વર્તુળોમાં નિંદા કરવામાં આવી હતી, ટીકાકારોએ તેને ન્યાયિક નિષ્પક્ષતાનું ઉલ્લંઘન ગણાવ્યું હતું. એડવોકેટ પ્રશાંત ભૂષણ અને CPI(M)ના નેતા વૃંદા કરાતે ચીફ જસ્ટિસ ખન્નાને પત્ર લખીને કહ્યું છે કે આ ટિપ્પણી જજના શપથનું ઉલ્લંઘન છે. ભારતીય બાર એસોસિએશને પણ ન્યાયાધીશની ટિપ્પણીની નિંદા કરતો ઠરાવ પસાર કર્યો હતો.

મહાભિયોગની માંગ

દરમિયાન, ગયા શુક્રવારે 55 વિપક્ષી સાંસદોએ રાજ્યસભામાં જસ્ટિસ યાદવ સામે મહાભિયોગની માંગણી કરતી નોટિસ દાખલ કરી હતી.  શુક્રવારે સમાજવાદી પાર્ટીના સાંસદ કપિલ સિબ્બલ અને કોંગ્રેસના સાંસદ વિવેક ટંખાના નેતૃત્વમાં સાંસદોએ રાજ્યસભાના મહાસચિવને મહાભિયોગની નોટિસ સુપરત કરી હતી.  લગભગ 55 સાંસદોના હસ્તાક્ષર કરાયેલા આ પ્રસ્તાવ પર સંસદના શિયાળુ સત્રના અંત પહેલા ચર્ચા થવાની આશા છે.

આ પણ વાંચો :- મહારાષ્ટ્રમાં મંત્રીઓને 2.5 વર્ષનો મળશે કાર્યકાળ, 2 દિવસમાં વિભાજિત થશે વિભાગો: CM ફડણવીસ