સંસદમાં પહેલાં પણ મળી ચૂક્યા છે નોટોના બંડલ, જાણો ક્યારે-ક્યારે કેશકાંડને લઇ થયો હોબાળો

નવી દિલ્હી, 06 ડિસેમ્બર : શિયાળુ સત્રના 10મા દિવસે રાજ્યસભાની સીટ નંબર 222 પાસે નોટોનું બંડલ જોવા મળ્યું હતું. આ સીટ કોંગ્રેસના રાજ્યસભા સાંસદ અભિષેક મનુ સિંઘવીની છે. જો કે અભિષેક મનુ સિંઘવીએ આ સમગ્ર મામલાથી પોતાને દૂર રાખ્યા છે. સિંઘવી કહે છે કે હું 500 રૂપિયાથી વધુ સંસદમાં લઈ જતો નથી. રાજ્યસભાના અધ્યક્ષે કહ્યું છે કે સમગ્ર મામલાની તપાસ કરવામાં આવશે. જો કે આ પહેલીવાર નથી જ્યારે સંસદમાં ચલણી નોટોના મુદ્દે હોબાળો થયો હોય. આ પહેલાં પણ બે વખત ભારતની સંસદ ચલણી નોટોના કારણે ચર્ચામાં રહી છે.

સરકારને બચાવવા માટે 40-40 લાખ મળ્યા

પહેલી ઘટના વર્ષ 1993ની છે. નરસિમ્હા રાવની સરકાર કેન્દ્રમાં સત્તામાં હતી, પરંતુ સરકાર પાસે સંપૂર્ણ બહુમતી નહોતી. બાબરી ધ્વંસ બાદ નરિમ્હા રાવ પણ પાર્ટીના નેતાઓના નિશાના પર હતા. રાવ અને અર્જુન સિંહ વચ્ચેના મતભેદના સમાચાર દરરોજ અખબારોમાં પ્રકાશિત થતા હતા. દરમિયાન ભાજપે રાવ સરકાર સામે અવિશ્વાસ પ્રસ્તાવની નોટિસ આપી હતી. પાર્ટીએ કહ્યું કે સરકાર હવે લઘુમતીમાં છે. આ અવિશ્વાસ પ્રસ્તાવ પર 3 દિવસ સુધી ભારે ચર્ચા ચાલી અને જ્યારે મતદાનનો સમય આવ્યો ત્યારે બધા ચોંકી ગયા. નરિશ્મા રાવને તે સમયે માત્ર 244 સાંસદોનું સમર્થન હતું, પરંતુ તેમને 265 મત મળ્યા હતા. અવિશ્વાસ પ્રસ્તાવ સમયે વિપક્ષ માત્ર 251 વોટ મેળવી શક્યો અને રાવની સરકાર બચી ગઈ. 1996માં ઝારખંડ મુક્તિ મોરચાના સાંસદ સૂરજ મંડલે એક ઘટસ્ફોટ કર્યો હતો. મંડલના કહેવા પ્રમાણે, 1993માં નાણાંની વહેંચણીને કારણે રાવની સરકાર બચી ગઈ હતી. મંડલે કહ્યું કે સરકારને બચાવવા માટે દરેક સાંસદને 40 લાખ રૂપિયા આપવામાં આવ્યા હતા.

સુપ્રીમે તમામ આરોપીને નિર્દોષ જાહેર કર્યા

એવું કહેવાય છે કે રોકડ કૌભાંડની આ સમગ્ર સ્ક્રિપ્ટ બુટા સિંહ દ્વારા લખવામાં આવી હતી, જે રાવની સરકારમાં શક્તિશાળી મંત્રી હતા. જેએમએમ વતી મંડલ આ ડીલ જોઈ રહ્યો હતો. 1993માં જેએમએમની સાથે ચૌધરી અજીત સિંહની પાર્ટી પણ તૂટી ગઈ હતી. આ મામલામાં સીબીઆઈ દ્વારા દાખલ કરવામાં આવેલા સોગંદનામામાં કહેવામાં આવ્યું હતું કે આ નાણાં રોકડમાં મળ્યા હતા અને જેએમએમના સાંસદોએ સ્થાનિક સ્તરે વ્યાજ પર આ નાણાંનું રોકાણ કર્યું હતું. બાદમાં આ મામલો સુપ્રીમ કોર્ટમાં ગયો હતો, પરંતુ આ કેસના તમામ આરોપીઓને નિર્દોષ જાહેર કરવામાં આવ્યા હતા.

ભાજપના 3 સાંસદોએ નોટો લહેરાવી

2008માં મનમોહન સિંહની સરકારે અમેરિકા સાથે પરમાણુ કરાર કર્યો હતો. સીપીએમે આ સમજૂતી સામે સરકાર પાસેથી સમર્થન પાછું ખેંચી લીધું હતું, જેના પછી તરત જ ભાજપે અવિશ્વાસ પ્રસ્તાવની નોટિસ આપી હતી. સંસદમાં આ અવિશ્વાસ પ્રસ્તાવ પર ઘણી ચર્ચા થઈ હતી, પરંતુ જ્યારે મતદાનનો વારો આવ્યો ત્યારે ભાજપના 3 સાંસદોએ નોટો લહેરાવી હતી. આ નોટો તત્કાલિન લોકસભા સ્પીકર સોમનાથ ચેટરજીના ટેબલ પર લહેરાવવામાં આવી હતી. નોટો લહેરાવનારા ભાજપના સાંસદોમાં અશોક અર્ગલ, ફાગન કુલસ્તે અને મહાવીર ભગૌરા હતા. ત્રણેય સાંસદોએ આરોપ લગાવ્યો હતો કે સપાના અમર સિંહે તેમને પૈસા આપ્યા હતા. આ પૈસા સરકારની તરફેણમાં ક્રોસ વોટિંગ માટે આપવામાં આવ્યા છે. જ્યારે સમાજવાદી પાર્ટીએ મનમોહન સરકારને ટેકો આપ્યો ત્યારે આ આરોપને વધુ બળ મળ્યું. આ અવિશ્વાસ પ્રસ્તાવમાં સરકારની તરફેણમાં 268 મત પડ્યા હતા. વિપક્ષને 263 વોટ મળ્યા હતા. વોટિંગ દરમિયાન ભાજપના 8 સાંસદોએ પાર્ટીનો ખેલ બગાડ્યો હતો. ભાજપે તેને મોટો મુદ્દો બનાવીને મનમોહન સરકાર સામે મોરચો રચ્યો હતો. આ કેસમાં અમરસિંહને જેલ પણ જવું પડ્યું હતું. જોકે, બાદમાં આ મામલે તેની સામે કોઈ કડક કાર્યવાહી કરવામાં આવી ન હતી.

આ પણ વાંચો : ઘર ખરીદનારાઓને મોટી રાહત, 100 થી વધુ બિલ્ડરના પ્રોજેક્ટનું બાંધકામ શરૂ