રોહિત શર્માએ મેચ પહેલાં કરી મોટી જાહેરાત, શું યશસ્વી-રાહુલની તૂટશે જોડી?

• ભારત-ઓસ્ટ્રેલિયા વચ્ચેની પાંચ ટેસ્ટ મેચની શ્રેણીની બીજી મેચને 24 કલાકથી પણ ઓછો સમય બાકી

HD ન્યૂઝ ડેસ્ક, 5 ડિસેમ્બર: ભારત અને ઓસ્ટ્રેલિયા વચ્ચે રમાઈ રહેલી પાંચ ટેસ્ટ મેચની શ્રેણીની બીજી મેચને હવે 24 કલાકથી પણ ઓછો સમય બાકી છે. આ મેચ આવતીકાલે 6 ડિસેમ્બરે એડિલેડના ઐતિહાસિક મેદાન પર રમાશે. આ પિંક બોલ ટેસ્ટ હશે અને તે ડે-નાઈટ રમાશે. દરમિયાન, મેચ પહેલા આ મેચમાં ભારત માટે કોણ ઓપનિંગ કરશે તે અંગે સસ્પેન્સ હતું. પરંતુ કેપ્ટન રોહિત શર્માએ મેચના એક દિવસ પહેલા આવીને લગભગ આ વાતનો ખુલાસો કર્યો છે. કેપ્ટન રોહિત શર્માએ સ્પષ્ટ કર્યું છે કે, બીજી મેચમાં પણ ભારતીય ટીમ માટે માત્ર યશસ્વી જયસ્વાલ અને KL રાહુલ ઓપનિંગ કરતા જોવા મળશે.

The captain came, and he cleared the stir! 😁#TeamIndia skipper @ImRo45 clears the air on @klrahul‘s batting position! 😮

What’s your take on it? 🤔

1 Day to go for #AUSvINDOnStar 👉 2nd Test | FRI, 6th DEC, 8 AM only on Star Sports 1 pic.twitter.com/4rVUSD6Qlk

— Star Sports (@StarSportsIndia) December 5, 2024

યશસ્વી જયસ્વાલ અને KL રાહુલે ભારતની જીતનો પાયો નાખ્યો

બોર્ડર ગાવસ્કર ટ્રોફીની પ્રથમ મેચમાં રોહિત શર્મા ગેરહાજર રહ્યો હતો. તે મેચમાં જસપ્રીત બુમરાહે કેપ્ટનશિપની જવાબદારી નિભાવી હતી. ભારત માટે રાહુલ અને યશસ્વી જયસ્વાલે ઓપનિંગ કર્યું હતું. આ જોડી મેચની પ્રથમ ઈનિંગમાં કંઈ ખાસ કરી શકી ન હતી, પરંતુ બીજી ઈનિંગમાં બંનેએ મળીને 200થી વધુ રનની પાર્ટનરશીપ કરીને નવો રેકોર્ડ બનાવ્યો હતો. હવે રોહિત શર્મા બીજી મેચમાં કેપ્ટન તરીકે પરત ફર્યો છે. આવી સ્થિતિમાં છેલ્લા ઘણા દિવસોથી દરેકના મનમાં એક જ પ્રશ્ન હતો કે હવે ઓપનિંગ કોણ કરશે? યશસ્વી જયસ્વાલ ચોક્કસપણે ઓપનર રહેશે, પરંતુ તેની સાથે કોણ મેદાનમાં ઉતરશે?

રોહિત શર્મા મિડલ ઓર્ડરમાં રમશે

મેચના એક દિવસ પહેલા આજે ગુરુવારે જ્યારે કેપ્ટન રોહિત શર્મા મીડિયાને મળ્યો ત્યારે સૌથી મોટો પ્રશ્ન આ જ હતો. જેના પર રોહિત શર્માએ સ્પષ્ટ જવાબ આપ્યો હતો. રોહિત શર્માએ કહ્યું કે, રાહુલ અને યશસ્વી જયસ્વાલે ભારત માટે મેચ વિનિંગ પાર્ટનરશીપ કરી છે. આવી સ્થિતિમાં, તેમાં કોઈ ફેરફારની જરૂર હોય તેવું લાગતું નથી. આ ટીમના શ્રેષ્ઠ હિતમાં છે અને તે ખૂબ જ સરળ નિર્ણય છે. મતલબ કે, આગામી મેચમાં પણ યશસ્વી જયસ્વાલ અને રાહુલ ઓપનિંગ કરતા જોવા મળશે, રોહિત શર્મા મિડલ ઓર્ડર નંબર 5 અથવા 6 પર બેટિંગ કરવા આવશે.

2172 દિવસ બાદ ટેસ્ટમાં ઓપનિંગ કરવા નહીં આવે રોહિત

રોહિત શર્મા છેલ્લે 2018માં ટીમ ઈન્ડિયા માટે ટેસ્ટમાં મિડલ ઓર્ડરમાં રમ્યો હતો. આ પછી, વર્ષ 2019માં, જ્યારે દક્ષિણ આફ્રિકાની ટીમ ભારતના પ્રવાસે આવી, ત્યારે રોહિત શર્માએ ત્યાંથી ઓપનિંગની જવાબદારી લીધી અને ત્યારથી અત્યાર સુધી તે ફક્ત ઓપનિંગ કરી રહ્યો છે. એટલે કે જો તેને દિવસોમાં ફેરવવામાં આવે તો 2172 દિવસ બાદ રોહિત શર્મા હવે ટેસ્ટમાં મિડલ ઓર્ડરમાં બેટિંગ કરતો જોવા મળશે. આ પિન્ક બોલની ટેસ્ટ હશે અને જ્યાં સુધી રોહિત બેટિંગ કરવા આવશે ત્યાં સુધીમાં એવી અપેક્ષા રાખવામાં આવે છે કે, બોલની ચમક થોડી ઓછી થઈ ગઈ હશે.

યુવા ખેલાડીઓની ખૂબ પ્રશંસા

ટીમની પ્રશંસા કરતા રોહિત શર્માએ કહ્યું કે, યશસ્વી જયસ્વાલ, ઋષભ પંત, શુભમન ગિલ નવી પેઢીના ખેલાડી છે. રોહિત શર્માએ યાદ અપાવ્યું કે, જ્યારે તે પોતે પહેલીવાર ઓસ્ટ્રેલિયા આવ્યો હતો ત્યારે તેનો વિચાર માત્ર એ જ હતો કે કેવી રીતે સ્કોર કરવો, પરંતુ હવે નવા ખેલાડીઓ મેચ જીતવા વિશે વિચારી રહ્યા છે. નવા ખેલાડીઓ માટે જીત ખૂબ જ મહત્ત્વપૂર્ણ છે. ભારત અને ઓસ્ટ્રેલિયા બંને ટીમો માટે હવે પછીની મેચ ઘણી મહત્ત્વની બનવાની છે. ટીમો અને ખેલાડીઓ કેવું પ્રદર્શન કરે છે તે જોવું રહ્યું.

આ પણ જૂઓ: એડીલેડ ટેસ્ટ માટે ઓસ્ટ્રેલિયાની પ્લેઈંગ 11 જાહેર, 18 મહિને આ ખેલાડીની થઈ વાપસી