કોણ છે જય ભટ્ટાચાર્ય? ડોનાલ્ડ ટ્રમ્પે વધુ એક ભારતીયને સોંપી મહત્ત્વપૂર્ણ જવાબદારી

નવી દિલ્હી, 27 નવેમ્બર: ભારતીય મૂળના લોકો પર અમેરિકાના ચૂંટાયેલા પ્રમુખ ડોનાલ્ડ ટ્રમ્પનો વિશ્વાસ સતત વધી રહ્યો છે. ટ્રમ્પે વધુ એક ભારતીય મૂળના વ્યક્તિને મહત્ત્વપૂર્ણ જવાબદારી સોંપી છે. જય ભટ્ટાચાર્યને નેશનલ ઇન્સ્ટિટ્યૂટ ઓફ હેલ્થના ડાયરેક્ટર તરીકે નિયુક્ત કરવામાં આવ્યા છે. જય ભટ્ટાચાર્યએ NIHના ડિરેક્ટર તરીકે નોમિનેટ થવા પર ખુશી વ્યક્ત કરી છે. હાલમાં તેઓ નેશનલ બ્યુરો ઓફ ઈકોનોમિક્સ રિસર્ચમાં સંશોધન સહયોગી છે.

જય ભટ્ટાચાર્યનો જન્મ 1968માં કોલકાતામાં થયો હતો. તેઓ એક મહાન અર્થશાસ્ત્રી છે, જેમણે 1997માં સ્ટેનફોર્ડ યુનિવર્સિટીમાંથી દવામાં ડોક્ટરેટની ડિગ્રી મેળવી હતી. આ પછી તેમણે આ જ યુનિવર્સિટીમાંથી અર્થશાસ્ત્રમાં PHDની પદવી પ્રાપ્ત કરી હતી.  પોતાની  ફરજ દરમિયાન, તેઓ અંદાજે $47.3 બિલિયનના બજેટની દેખરેખ કરશે. અમેરિકાએ આ બજેટ મેડિકલ રિસર્ચ પર ખર્ચ કરવા માટે રાખ્યું છે.

જય ભટ્ટાચાર્યએ શું કહ્યું?

જય ભટ્ટાચાર્યએ નેશનલ ઇન્સ્ટિટ્યૂટ ઓફ હેલ્થ (NIH)ના ડાયરેક્ટર તરીકે નિયુક્ત થવા પર ખુશી વ્યક્ત કરી છે. તેમણે કહ્યું છે કે, “પ્રમુખ ડોનાલ્ડ ટ્રમ્પ દ્વારા આગામી NIH ડિરેક્ટર તરીકે નામાંકિત કરવાથી હું સન્માનિત અનુભવું છું. અમે અમેરિકન વિજ્ઞાની સંસ્થાઓમાં સુધારો કરીશું, જેથી લોકો ફરી એકવાર તેના પર વિશ્વાસ કરી શકે. અમેરિકાને ફરીથી સ્વસ્થ બનાવવા માટે ઉત્તમ વિજ્ઞાનના પરિણામ તરીકે તૈનાત કરવામાં આવશે.”

ડોનાલ્ડ ટ્રમ્પે કહી આ વાત 

પ્રમુખ તરીકે ચૂંટાયેલા ડોનાલ્ડ ટ્રમ્પે જય ભટ્ટાચાર્યના નોમિનેશનની જાહેરાત કરતા કહ્યું કે, “હું NIHના ડાયરેક્ટર તરીકે સેવા આપવા માટે જય ભટ્ટાચાર્ય, MD, PhDને નોમિનેટ કરીને રોમાંચિત છું. તેમણે દેશના તબીબી સંશોધનનું નિર્દેશન કર્યું અને મહત્ત્વપૂર્ણ રિસર્ચ માટે રોબર્ટ એફ. કેનેડી જુનિયર સાથે મળીને કામ કરશે. જેના કારણે આરોગ્ય ક્ષેત્રમાં સુધારો થશે અને લોકોનું રક્ષણ થશે.

કોવિડ દરમિયાન ચર્ચામાં હતા જય ભટ્ટાચાર્ય 

જય ભટ્ટાચાર્યએ COVID-19 રોગચાળા દરમિયાન અમેરિકાની આરોગ્ય નીતિઓની ટીકા કરી હતી. આ કારણે તે ચર્ચામાં રહ્યા હતા. તે જ સમયે, ભટ્ટાચાર્યએ બે વિદ્વાનો સાથે મળીને ઓક્ટોબર 2020 માં ‘ગ્રેટ બેરિંગ્ટન ડિક્લેરેશન’ પ્રકાશિત કર્યું હતું. આ સંશોધનમાં તેમણે કહ્યું હતું કે, જે લોકો કોરોના વાયરસથી પ્રભાવિત નથી તેમને સામાન્ય જીવનમાં પાછા ફરવા દેવા જોઈએ અને સંવેદનશીલ લોકોની સુરક્ષા કરવી જોઈએ.

આ પણ જૂઓ: અમેરિકાના ન્યૂ જર્સીમાં ગાંધીનગરના યુવકે મહિલા મકાન માલિકની હત્યા કરી