રાજપરિવાર વિવાદ: ઉદયપુરમાં સિટી પેલેસની આસપાસ કલમ 163 લાગુ, લક્ષ્યરાજ સિંહે તોડ્યું મૌન

• રાજસ્થાનના ઉદયપુરના પૂર્વ રાજવી પરિવારમાં ચાલી રહેલો વિવાદ વધુ ઘેરો બન્યો

ઉદયપુર, 27 નવેમ્બર: મહારાણા પ્રતાપના વંશજ રાજસ્થાનના ઉદયપુરના પૂર્વ રાજવી પરિવારમાં ચાલી રહેલો વિવાદ વધુ ઘેરો બન્યો છે. મેવાડના પૂર્વ શાહી પરિવારના સભ્યો વચ્ચે સર્જાયેલા વિવાદ બાદ લક્ષ્યરાજ સિંહ મેવાડે મંગળવારે સાંજે મીડિયાની સામે પોતાના વિચારો રજૂ કર્યા અને પ્રશાસન-પોલીસ પર પ્રશ્નો ઉઠાવ્યા. લક્ષ્યરાજ સિંહ મેવાડે મીડિયાને કહ્યું કે, “ઉદયપુરમાં જે સ્થિતિ આપણે જોઈ રહ્યા છીએ તે દુઃખદ અને અપ્રિય ઘટના છે. આ આપણા બધાને નુકસાન પહોંચાડશે અને પરેશાન કરશે. અમે આવી પરિસ્થિતિઓ ઈચ્છતા નથી, અમારો એવો કોઈ ઈરાદો નથી. અહંકાર અને અભિમાનને કારણે જ ઉદયપુરનું નામ બગડી રહ્યું છે. બહારગામથી આવતા લોકો પરેશાન થઈ રહ્યા છે.” લક્ષ્યરાજ સિંહ મેવાડની આ પ્રેસ કોન્ફરન્સ બાદ જિલ્લા કલેક્ટર અને જિલ્લા મેજિસ્ટ્રેટ અરવિંદ પોસવાલ દ્વારા આદેશ જારી કરવામાં આવ્યો હતો અને સિટી પેલેસની આસપાસના વિસ્તારોમાં કલમ 163 લાગુ કરી દેવામાં આવી હતી.

Udaipur, Rajasthan: Lakshyaraj Singh Mewar, a member of Udaipur’s former royal family, addressed the recent controversy pic.twitter.com/jvj0QSKXiE

— IANS (@ians_india) November 26, 2024

સોમવારે ઉદયપુર શહેરમાં મેવાડના પૂર્વ રાજવી પરિવારના સભ્ય વિશ્વરાજ સિંહ અને સિટી પેલેસમાં રહેતા પૂર્વ શાહી પરિવારના સભ્યો વચ્ચે બડી પોળની અંદર પ્રયાગગીરી મહારાજની ધુની માતાના દર્શનને લઈને વિવાદ થયો હતો. ઉલ્લેખનીય છે કે, લક્ષ્યરાજે લગભગ 13 મિનિટમાં પોતાનો વિચાર વ્યક્ત કર્યો હતો. પરંતુ જ્યારે પત્રકારોએ પ્રશ્નો પૂછવાનું શરૂ કર્યું. ત્યાર બાદ તે મીડિયાના પ્રશ્નો આપ્યા વિના ઉભા થઈને ચાલ્યા ગયા હતા.

ઈશારો ઈશારોમાં કર્યા પ્રહારો

લક્ષ્યરાજ સિંહ મેવાડે તેમના પિતરાઈ ભાઈ અને ભાજપના ધારાસભ્ય વિશ્વરાજ સિંહ પર પ્રહારો કરતા કહ્યું કે, આ રીતે રસ્તા પર આવીને કોઈ વસ્તુનો ઉકેલ લાવવાનો માર્ગ નથી. અમે આ પ્રકારની વિચારસરણી માટે કોઈપણ સમર્થનને કાયદેસર માનતા નથી. ઘણી વસ્તુઓ લાગણીઓથી નથી થતી. અફવાઓ ફેલાવીને અને અન્ય લોકોને ગેરમાર્ગે દોરીને શક્તિ પ્રદર્શનનું વાતાવરણ બનાવવું, આ બિલકુલ યોગ્ય નથી. દેશમાં કાયદો અને વ્યવસ્થા નામની વસ્તુ છે. મેવાડમાં કાયદો અને વ્યવસ્થા પર પણ પ્રશ્નો ઉઠાવ્યા કે, શું ઉદયપુરમાં કાયદો અને વ્યવસ્થા છે કે નહીં, જે રીતે સમગ્ર ઘટના અમારી સાથે બની છે. આટલો પોલીસ બંદોબસ્ત હોવા છતાં આવી ઘટના કેવી રીતે બની શકે? મને આ અંગે પોલીસ અને વહીવટીતંત્રથી પ્રશ્નો છે.

#WATCH | #WATCH | Rajasthan: Lakshyaraj Singh Mewar, member of the erstwhile royal family of Udaipur says, “What happened was unfortunate. We hope that the administration and the government will stand with truth and serve justice… We can always approach the court. It is not… pic.twitter.com/BToJkEl5GM

— ANI (@ANI) November 26, 2024

પોલીસ તંત્ર પર ઉઠ્યા સવાલ

લક્ષ્યરાજે પોલીસ પર પ્રશ્નો ઉઠાવ્યા અને કહ્યું કે, પોલીસે સમગ્ર ઘટનામાં જે રીતે છૂટ આપી છે. આ ખૂબ જ નિંદનીય અને દુઃખદ સ્થિતિ હતી. આવી સ્થિતિ મને 1984ની યાદ અપાવે છે. 1984માં પણ આવી જ વ્યવસ્થા કરવામાં આવી હતી અને આવી જ ઘટનાનું પુનરાવર્તન કરવાનો પ્રયાસ કરવામાં આવ્યો હતો. કેટલાક લોકો સરકારી હોદ્દા પર છે. આવી સ્થિતિમાં કેટલાક લોકો પોતાના અંગત ફાયદા માટે કાયદાને બાયપાસ કરીને પોતાનો મુદ્દો ઉઠાવવા માંગે છે. આ ક્યાંનો નિયમ છે?

વહીવટીતંત્રને પહેલાથી જ જાણ કરવામાં આવી હતી…

લક્ષ્યરાજ સિંહ મેવાડે કહ્યું કે, આવી સ્થિતિ સર્જાશે, તેથી અમે વહીવટીતંત્રને પહેલાથી જ જાણ કરી દીધી હતી. તેમણે પૂછ્યું કે, આવી ઘટના પછી કલમ 144 કેમ લાગુ કરવામાં આવી નથી. લોકોને પૂજાના માધ્યમથી ગેરમાર્ગે દોરવા યોગ્ય નથી. ગુંડાગીરીના માધ્યમથી આ વસ્તુ કરી શકાતી નથી. આ સમગ્ર ઘટનાનો મારા પિતા અને બેહનોએ 40 વર્ષ પહેલા સામનો કર્યો હતો. તેઓ પણ મરતા-મરતા બચ્યા હતા.  આવી જ સ્થિતિ તે સમયે બનાવવામાં આવી હતી. આવામાં ખોટા ઈરાદા સાથે પ્રવેશ કરવાનો પ્રયાસ કરવામાં આવી શકે છે.

જાણો શું છે ઉદયપુરનો આ સમગ્ર વિવાદ

ઉલ્લેખનીય છે કે, આ વિવાદ 1984માં મહારાણા ભગવત સિંહના મૃત્યુ બાદ શરૂ થયો હતો. એક તરફ, ભગવત સિંહના મોટા પુત્ર મહેન્દ્ર સિંહને મેવાડના અનુયાયીઓએ તાજ પહેરાવી તેમને પ્રતીકાત્મક રીતે નવા ‘મહારાણા’ બનાવવામાં આવ્યા. જ્યારે બીજી તરફ ભગવત સિંહના નાના પુત્ર અરવિંદ સિંહે તેમના વતી વસિયતનામું રજૂ કરીને પોતાને આખી સંપત્તિનો વારસદાર જાહેર કર્યા. ત્યારથી મહેન્દ્ર સિંહ મેવાડનો પરિવાર સિટી પેલેસ સામોર બાગમાં રહે છે. મહેન્દ્ર સિંહના પુત્રનું નામ વિશ્વરાજ સિંહ છે. જ્યારે અરવિંદ સિંહ મેવાડના સિટી પેલેસના શંભુ નિવાસમાં રહેતા-રહેતા મહારાણા મેવાડ ચેરિટેબલ ટ્રસ્ટ અને મહારાણા મેવાડ ફાઉન્ડેશન દ્વારા મિલકત પર કબજો કરવા સિટી પેલેસ, HRH ગ્રુપમાં મુખ્ય ભૂમિકા ભજવી રહ્યા છે. વિશ્વ પ્રસિદ્ધ એકલિંગનાથ મંદિર પણ આ અંતર્ગત આવે છે. જેના દર્શને વિશ્વરાજ પહોંચ્યા હતા ત્યારે જ સમગ્ર વિવાદ થયો હતો. ઉલ્લેખનીય છે કે, મહેન્દ્ર સિંહ મેવાડના અવસાન બાદ રાજવી પરિવારનું રાજકારણ ફરી તેજ થવા લાગ્યું છે, જેનું ઉદાહરણ 25 નવેમ્બરે બહાર આવ્યું હતું.

અચાનક કેમ ઉભો થયો વિવાદ?

હકીકતમાં, 25 નવેમ્બરના રોજ, ઉદયપુર-નાથદ્વારાના ધારાસભ્ય અને પૂર્વ મેવાડ રાજવી પરિવારના સભ્ય વિશ્વરાજ સિંહ મેવાડનો રાજ્યાભિષેક થયો હતો. આ કારણે વિશ્વ પ્રસિદ્ધ ઐતિહાસિક ચિત્તોડગઢ કિલ્લામાં સ્થિત ફતહ પ્રકાશ મહેલમાં તેમની રાજ્યાભિષેક વિધિ કરવામાં આવી હતી. રાજ્યાભિષેક બાદ વિશ્વરાજ સિંહ મેવાડનો કાફલો ધૂની માતાના દર્શન માટે ઉદયપુરના સિટી પેલેસ પહોંચ્યો હતો. પરંતુ કાફલો અહીં પહોંચે તે પહેલા જ સિટી પેલેસના દરવાજા બંધ કરી દેવામાં આવ્યા હતા.

આ પછી વિશ્વરાજ સિંહ મેવાડના સમર્થકો અને પોલીસ વચ્ચે ઝપાઝપી થઈ હતી. સમર્થકો પોલીસ દ્વારા લગાવવામાં આવેલા બેરિકેડ્સને હટાવીને આગળ વધ્યા હતા. જોકે બાદમાં ત્રણ વાહનોને અંદર જવા દેવામાં આવ્યા હતા, પરંતુ સમર્થકો 10 વાહનો સાથે અંદર જવાની માંગ કરી રહ્યા હતા. સિટી પેલેસમાં પ્રવેશ ન આપવા બાબતે પણ જોરદાર વિવાદ થયો હતો.

આ પણ જૂઓ: કલમ 370, રામ મંદિરને લઈ શું પૂર્વ CJI ડીવાય ચંદ્રચૂડ પર કોઈ દબાણ હતું? જાણો શું કહ્યું