26/11 મુંબઈ આતંકી હુમલાની 16મી વર્ષગાંઠ: 10 આતંકીઓ અને 166ના મૃત્યુ, જાણો આ કાળા દિવસ વિશે

• સ્વતંત્ર ભારતના ઈતિહાસમાં આ સૌથી મોટો આતંકવાદી હુમલો હતો, જેમાં 300થી વધુ લોકો ઘાયલ થયા હતા

મુંબઈ, 26 નવેમ્બર: દેશમાં એક તરફ 26 નવેમ્બરને સંવિધાન દિવસ તરીકે યાદ કરવામાં આવે છે, તો બીજી તરફ આ તારીખ સાથે એક એવો કાળો દિવસ જોડાયેલો છે જેને ભારતના લોકો ભાગ્યે જ ભૂલી શકશે. હા, વાત થઈ રહી છે 26 નવેમ્બર 2008ના રોજ મુંબઈમાં થયેલા આતંકવાદી હુમલાની. દેશ આ આતંકવાદી હુમલાની આજે મંગળવારે 16મી વર્ષગાંઠ મનાવી રહ્યો છે, પરંતુ દેશવાસીઓ આજે પણ આ દિવસને યાદ કરીને કંપી ઉઠે છે. સ્વતંત્ર ભારતના ઈતિહાસમાં આ સૌથી મોટો આતંકવાદી હુમલો હતો. આ હુમલામાં 18 સુરક્ષાકર્મીઓ સહિત 166 લોકો માર્યા ગયા હતા અને 300થી વધુ લોકો ઘાયલ થયા હતા. આતંકવાદીઓએ દેશના સૌથી સુરક્ષિત સ્થાનોમાંથી એક મુંબઈની તાજ હોટલને નિશાન બનાવી હતી. આતંકવાદીઓએ પહેલા CST રેલવે સ્ટેશન પર ગોળીબાર કર્યો. આ પછી વિલે પાર્લે વિસ્તારમાં પણ ગોળીબાર કર્યો હતો. આ પછી આતંકવાદીઓએ તાજ હોટેલ, ઓબેરોય ટ્રાઈડેન્ટ હોટેલ અને નરીમન હાઉસ પર હુમલો કર્યો હતો.

આતંકવાદીઓ માછીમારો તરીકે દરિયાઈ માર્ગે મુંબઈ પ્રવેશ કર્યો હતો

તમામ 10 આતંકવાદીઓ બોટમાં પાકિસ્તાનના કરાચીથી મુંબઈ જવા રવાના થયા હતા. તે દરિયાઈ માર્ગ દ્વારા મુંબઈમાં પ્રવેશ્યા હતા. ભારતીય નૌકાદળથી બચવા માટે, તેઓએ રસ્તામાં એક ભારતીય બોટને હાઇજેક કરી અને તેમાં સવાર તમામ લોકોને મારી નાખ્યા. આ બોટનો ઉપયોગ કરીને તે રાત્રે લગભગ 8 વાગે કોલાબા પાસે ફિશ માર્કેટમાં ઉતર્યા હતા. સ્થાનિક માછીમારોને પણ તેમના પર શંકા ગઈ. તેમણે આ અંગે પોલીસને પણ જાણ કરી હતી, પરંતુ પોલીસે તેને હળવાશથી લીધી હતી. 26મી નવેમ્બરે, તેમણે સૌપ્રથમ મુંબઈમાં બધું તપાસ્યું અને સાંજે તેની નાપાક યોજનાઓને અંજામ આપ્યો.

સૌથી પહેલા છત્રપતિ શિવાજી ટર્મિનલ પર હુમલો કર્યો

કોલાબાથી, આતંકવાદીઓ દરેક 4ના ગ્રુપમાં ટેક્સીઓ લઈને પોતપોતાના સ્થળો તરફ આગળ વધ્યા. આતંકવાદીઓની એક ટુકડી રાત્રે 9.30 વાગ્યે છત્રપતિ શિવાજી ટર્મિનલ રેલવે સ્ટેશન પર પહોંચી હતી. દરેકના હાથમાં AK-47 રાઈફલ હતી અને તેઓએ અંધાધૂંધ ગોળીબાર કર્યો હતો. આ હુમલાખોરોમાં અજમલ કસાબ પણ સામેલ હતો. જેને સુરક્ષા દળોએ જીવતો પકડી લીધો હતો અને બાદમાં તેને ફાંસી આપવામાં આવી હતી. CST રેલવે સ્ટેશન પર ફાયરિંગની ઘટનાની જાણ થતાં જ પોલીસ પહોંચી ગઈ હતી.

ઓપરેશન ત્રણ દિવસ સુધી ચાલ્યું, NSG કમાન્ડોની મદદ લેવામાં આવી

આતંકવાદીઓએ તે રાત્રે મુંબઈના ઘણા પ્રખ્યાત સ્થળોને નિશાન બનાવ્યા હતા. મુંબઈમાં આવેલી વિશ્વસ્તરીય હોટલોમાંની એક તાજ હોટેલ, ઓબેરોય ટ્રાઈડેન્ટ હોટેલ અને નરીમન હાઉસને નિશાન બનાવવામાં આવ્યા હતા. આતંકવાદીઓએ મુંબઈનું ગૌરવ કહેવાતા તાજ હોટલને સંપૂર્ણપણે નષ્ટ કરી દીધી હતી. સુરક્ષાદળો અને આતંકવાદીઓ વચ્ચે ત્રણ દિવસ સુધી અથડામણ ચાલુ રહી હતી. પોલીસ અને સેનાની કામગીરી પણ નિષ્ફળ જતી હોય તેવું લાગી રહ્યું હતું. ત્યારબાદ NSG કમાન્ડોને બોલાવવામાં આવ્યા. NSG કમાન્ડોએ તમામ આતંકીઓને ઠાર માર્યા હતા. તેમની બહાદુરીના કારણે ભારત પર આવી પડેલું આ સંકટ ટળી ગયું.

આ પણ જૂઓ: PM મોદીએ સંવિધાન દિવસની શુભેચ્છા પાઠવી, સાંજે સુપ્રીમ કોર્ટમાં સંબોધન કરશે