સેન્સેક્સ અને નિફ્ટીની તોફાની ઈનિંગ, રોકાણકારો 6 લાખ કરોડ કમાયા

મુંબઈ, 22 નવેમ્બર : શેરબજારે આજે શાનદાર ઇનિંગ રમી છે. સેન્સેક્સ અને નિફ્ટી બંનેમાં બમ્પર ઉછાળો જોવા મળ્યો છે. સપ્તાહના છેલ્લા દિવસે સેન્સેક્સમાં આવેલી તેજીએ 1961 પોઈન્ટનો ઉછાળો આપ્યો છે, જેના કારણે સેન્સેક્સ એક દિવસમાં 2.54% ઉછળ્યો છે. આવી જ સ્થિતિ નિફ્ટીમાં પણ જોવા મળી હતી. નિફ્ટીમાં પણ એક દિવસમાં 557 પોઈન્ટ અથવા 2.39%નો વધારો થયો છે. 27 સપ્ટેમ્બર, 2024 પછી આ પહેલી વખત છે, જયારે રોકાણકારોએ એક દિવસમાં 6.64 લાખ કરોડ રૂપિયાની કમાણી કરી હોય.

શેરબજારમાં શા માટે ઉછાળો આવ્યો?

નિષ્ણાતોના મતે આજે સ્થાનિક બજારમાં ઘણા ક્ષેત્રોમાં સારી ખરીદી જોવા મળી હતી, જે ગઈકાલના સેલઓફ પછી સારી રિકવરી દર્શાવે છે, જેનું મુખ્ય કારણ અદાણી ઈશ્યુ હતો. રિલાયન્સ ઇન્ડસ્ટ્રીઝ, ઇન્ફોસિસ, TCS, ICICI બેન્ક, ITC અને SBI જેવા હેવીવેઇટ શેરોએ સારો ફાયદો નોંધાવ્યો હતો, જેના કારણે બજારના બેન્ચમાર્કમાં વધારો થયો હોવાનું નિષ્ણાતો માને છે.

બજારનો ઘટાડો કેટલો ખતરનાક ?

તાજેતરમાં, વિજય કેડિયાએ એક ટીવી ચેનલને આપેલા ઇન્ટરવ્યુમાં કહ્યું હતું કે બજાર હવે રિકવરીના તબક્કામાં હોય તેવું લાગે છે. તાજેતરના સમયમાં બજારમાં ઘણો ઘટાડો જોવા મળ્યો છે. જો કે, તેમણે એમ પણ કહ્યું કે બજારની તમામ મુશ્કેલીઓ હજુ સમાપ્ત થઈ નથી. કેડિયાએ જણાવ્યું હતું કે ઘણા શેર તેમની ટોચથી 30-40% નીચા છે, તેથી જો બજાર ઘટશે તો આ શેર્સ પણ સમાન પ્રમાણમાં ઘટે તેવી શક્યતા નથી. કેડિયાએ કહ્યું કે એકતરફી બજાર રોકાણકારો માટે સારું નથી. અને આવી સ્થિતિમાં આ કરેક્શન સારું છે. વિજય કેડિયાએ કહ્યું કે વર્તમાન વધઘટ આગામી થોડા દિવસો સુધી ચાલુ રહી શકે છે.

આ પણ વાંચો : PM કિસાન યોજના માટેના એગ્રીસ્ટેક-ફાર્મર રજીસ્ટ્રી પોર્ટલ પર ખામી સર્જાય : ખેડૂતોની નોંધણી અટકી