પુતિનની ચેતવણી વચ્ચે USએ યુક્રેનમાં બંધ કરી દીધું પોતાનું દૂતાવાસ, હવાઈ હુમલાનો ડર

• એમ્બેસીએ એક નિવેદન જારી કરીને કિવમાં તેમના સ્ટાફને કામ બંધ કરવાની સલાહ આપી

નવી દિલ્હી, 20 નવેમ્બર: રશિયાના પ્રમુખ વ્લાદિમીર પુતિનની ચેતવણી બાદ અમેરિકાએ પરમાણુ હુમલાના ભય વચ્ચે યુક્રેનમાં પોતાનું દૂતાવાસ બંધ કરી દીધું છે. અમેરિકાએ સંભવિત હવાઈ હુમલાની ધમકીને ટાંકીને યુક્રેનની રાજધાની કિવમાં પોતાના દૂતાવાસને અસ્થાયી રૂપે બંધ કરી દેવાની જાહેરાત કરી છે. એમ્બેસીએ એક નિવેદન જારી કરીને કિવમાં તેના સ્ટાફને કામ બંધ કરવાની સલાહ આપી છે. આ સાથે યુક્રેનમાં રહેતા અમેરિકન નાગરિકોને પણ સંભવિત હવાઈ હુમલાને ધ્યાનમાં રાખીને સાવચેત રહેવા અને જરૂરી સાવચેતી રાખવા માટે કહેવામાં આવ્યું છે.

Ukraine: The U.S. Embassy in Kyiv received specific information of a potential significant air attack on Nov 20. The Embassy will be closed and recommends U.S. citizens be prepared to immediately shelter in the event an air alert is announced. https://t.co/ah0bpDfULK pic.twitter.com/m8cWXCXT2V

— Travel – State Dept (@TravelGov) November 20, 2024

પ્રમુખ પુતિને શું ચેતવણી આપી?

રશિયાના પ્રમુખ પુતિને મંગળવારે બેલેસ્ટિક મિસાઈલ હુમલાનો જવાબ પરમાણુ હુમલાથી આપવાની જાહેરાત કરી હતી. આવી સ્થિતિમાં પ્રશ્ન ઉઠી રહ્યો છે કે, શું હવે રશિયા-યુક્રેન પર પરમાણુ હુમલો કરશે?  નિષ્ણાતો કહી રહ્યા છે કે, યુક્રેનના પ્રમુખ ઝેલેન્સ્કીએ બેલેસ્ટિક મિસાઈલ હુમલો કરીને લક્ષ્મણ રેખા પાર કરી છે. આ જ કારણ છે કે, હવે યુરોપીયન દેશો પરમાણુ યુદ્ધના ખતરાને લઈને સતર્ક થઈ રહ્યા છે. નોર્વે-ફિનલેન્ડ-ડેનમાર્કમાં લોકોએ ખાદ્યપદાર્થો અને અન્ય આવશ્યક ચીજવસ્તુઓ એકત્રિત કરવાનું શરૂ કરી દીધું છે. તે જ સમયે, રશિયામાં N-Resistant મોબાઇલ બંકર બનાવવાનું કામ પણ શરૂ થઈ ગયું છે.

હાલમાં જ અમેરિકી પ્રમુખ જો બાઈડને રશિયા સામે યુક્રેનના લાંબા અંતરની મિસાઈલ હુમલાને મંજૂરી આપી હતી. એટલે કે યુક્રેનને રશિયાની અંદરના હુમલા માટે સુપરસોનિક મિસાઈલ ટેક્ટિકલ મિસાઈલ સિસ્ટમ (ATACMS)નો ઉપયોગ કરવાની પરવાનગી આપવામાં આવી હતી. અમેરિકાના આ નિર્ણય બાદ રશિયાના પ્રમુખ વ્લાદિમીર પુતિનનો ગુસ્સો સાતમા આસમાને પહોંચી ગયો હતો અને તેમણે પરમાણુ હુમલાના નિયમો પણ બદલી નાખ્યા હતા. પુતિને જાહેરાત કરી હતી કે, જો યુક્રેન બેલેસ્ટિક મિસાઈલ છોડશે તો તેઓ પરમાણુ હુમલો કરશે.

અચાનક કેમ વધી ગયું ટેન્શન?

આ બધું ત્યારે બદલાઈ ગયું જ્યારે યુક્રેને રશિયાની અંદર નિશાન બનાવીને છ લાંબા અંતરની અમેરિકન મિસાઈલો છોડી. યુક્રેન અગાઉ પણ ATACMSનો ઉપયોગ કરતું હતું, પરંતુ તેનો ઉપયોગ સરહદી વિસ્તારો સુધી મર્યાદિત હતો. આ એક સરફેસ ટુ સરફેસ બેલેસ્ટિક મિસાઈલ છે, જે 300 કિલોમીટર દૂર સુધીના લક્ષ્યોને નિશાન બનાવી શકે છે. તેની લાંબા અંતરની સ્ટ્રાઈક ક્ષમતાના કારણે આ મિસાઈલ યુક્રેન માટે ગેમ ચેન્જર સાબિત થઈ શકે છે.

કેટલાક દેશો માને છે કે, ત્રીજા વિશ્વ યુદ્ધનો સમય હવે દૂર નથી. નિષ્ણાતોનું કહેવું છે કે, રશિયાની નવી પરમાણુ નીતિથી ત્રીજા વિશ્વ યુદ્ધનું જોખમ વધી ગયું છે. આ જ કારણ છે કે, ડરી ગયેલા NATO દેશોએ પોતાના નાગરિકો માટે પેમ્ફલેટ જારી કરીને યુદ્ધની તૈયારી કરવાની સલાહ આપી છે.

ઘણા દેશોમાં ગભરાટ ફેલાયો

ઘણા NATO દેશો તેમના નાગરિકોને યુદ્ધ માટે તૈયાર રહેવા માટે કહી રહ્યા છે. અહેવાલ અનુસાર, સ્વીડને તેના નાગરિકોને ચેતવણી આપી છે અને પરમાણુ યુદ્ધના ભય વચ્ચે પેમ્ફલેટનું વિતરણ કર્યું છે. જેમાં તેના નાગરિકોને આશ્રય લેવાની સલાહ આપવામાં આવી છે. આ પેમ્ફલેટ બીજા વિશ્વયુદ્ધ પછી માત્ર પાંચ વખત બહાર પાડવામાં આવ્યું છે. આ વખતે આ પેમ્ફલેટ દરેક નાગરિકના ઘરે મોકલવામાં આવી છે.

આ દરમિયાન નોર્વેએ તેના નાગરિકો વચ્ચે ઇમરજન્સી પેમ્ફલેટ પણ જારી કર્યા છે, જેમાં લોકોને સમગ્ર યુદ્ધ વિશે સમજાવવામાં આવ્યું છે. આ સાથે કોઈ પણ ઈમરજન્સીના સંજોગોમાં એક અઠવાડિયા સુધી ભોજન અને પાણીની વ્યવસ્થા કરવાની સલાહ આપવામાં આવી છે. ડેનમાર્કે પહેલાથી જ તેના નાગરિકોને રાશન, પાણી અને દવાઓનો સ્ટોક કરવા માટે ઈમેલ મોકલી દીધો છે જેથી કરીને તેઓ પરમાણુ હુમલાના કિસ્સામાં ત્રણ દિવસ માટે ઈમરજન્સી વ્યવસ્થા કરી શકે. સ્વીડિશની લિસ્ટમાં બટાકા, કોબી, ગાજર, ઈંડા, બોલોગ્નીસ સોસ, તૈયાર બ્લુબેરી અને રોઝશીપ સૂપ સામેલ છે. ઘણા નાટો દેશો હવે યુદ્ધથી ડરી રહ્યા છે અને તેની તૈયારી કરી રહ્યા છે.

રશિયા સાથેની લાંબી સરહદ અને બીજા વિશ્વયુદ્ધમાં સોવિયત યુનિયન સાથેના યુદ્ધના અનુભવને કારણે ફિનલેન્ડ વિશ્વ યુદ્ધને લઈને વધુ સાવચેત છે પરંતુ સ્વીડને હાલમાં જ વિશ્વ યુદ્ધની તૈયારી શરૂ કરી છે. ફિનલેન્ડે પણ તેના નાગરિકોને ઇમરજન્સી માટે તૈયાર રહેવા કહ્યું છે. ફિનલેન્ડે પોતાના ઓનલાઈન બ્રોશરને અપડેટ કરી નાખ્યું છે. અલગ-અલગ પરિસ્થિતિઓમાં શું કરવું જોઈએ તે માર્ગદર્શિકામાં જણાવવામાં આવ્યું છે. નાગરિકોને સંકટની સ્થિતિમાં પોતાને સુરક્ષિત રાખવા માટે કહેવામાં આવી રહ્યું છે.

ફિનલેન્ડે નાગરિકોને જણાવ્યું છે કે, શિયાળામાં -20C જેટલા નીચા તાપમાનમાં પોતાને કેવી રીતે સુરક્ષિત રાખવું. યાદીમાં આયોડિનની ગોળીઓ અને સરળતાથી રાંધવા માટેનો ખોરાક, પાલતુ પ્રાણીઓનો ખોરાક અને બેકઅપ પાવર સપ્લાયનો સમાવેશ થાય છે. ફિનલેન્ડ ગયા વર્ષે USની આગેવાની હેઠળના NATO લશ્કરી ગ્રુપમાં જોડાયું હતું. તે જ સમયે, યુક્રેન પર રશિયાના હુમલા બાદ સ્વીડન આ વર્ષે માર્ચમાં જોડાયું હતું.

આ પણ જૂઓ: રશિયન પ્રમુખ પુતિન આવતા વર્ષે ભારતની મુલાકાતે આવે તેવી શક્યતા