અયોધ્યામાં રામના વિવાહોત્સવની ભવ્ય તૈયારીઓ, આજનો દિવસ એકદમ ખાસ; જાણો આખો પ્રોગ્રામ

અયોધ્યા, 18 નવેમ્બર 2024 : અયોધ્યામાં ભગવાન શ્રી રામ અને માતા સીતાના લગ્નની તૈયારીઓ જોરશોરથી ચાલી રહી છે. આ સમયે સમગ્ર શહેરમાં તહેવાર જેવો માહોલ છે. દર વર્ષની જેમ આ વખતે પણ શ્રી રામ વિવાહ ઉત્સવ આગાહન પંચમી એટલે કે 6 ડિસેમ્બરે ઉજવવામાં આવશે. ધાર્મિક માન્યતાઓ અનુસાર ભગવાન શ્રી રામ અને માતા સીતાના લગ્ન માર્ગશીર્ષ મહિનાના શુક્લ પક્ષની પાંચમના દિવસે થયા હતા. આ વખતે વિવાહ પંચમીના અવસર પર અયોધ્યામાં અનેક વિશેષ કાર્યક્રમોનું આયોજન કરવામાં આવનાર છે. આજે એટલે કે 18 નવેમ્બર સોમવારના રોજ તિલકોત્સવનું આયોજન કરવામાં આવ્યું છે. રામ મંદિરના નિર્માણ પછી પહેલીવાર ભગવાન રામને તિલક કરવામાં આવશે. આજે અમે તમને તિલકથી લઈને લગ્ન સુધીના કાર્યક્રમો વિશે માહિતી આપીશું.

આજે શ્રી રામનો ભવ્ય તિલકોત્સવ
આજે ભગવાન શ્રી રામના તિલકોત્સવનું આયોજન કરવામાં આવ્યું છે. જનકપુરના સીતા માતાના પરિવારના સભ્યો અને અન્ય મહેમાનો તિલકોત્સવમાં ભાગ લેશે. જનકપુરના જાનકી મંદિરના મહંત રામરોશન શરણ અને નેપાળના મધ્ય પ્રદેશના મુખ્યમંત્રી સતીશ કુમાર સિંહ તેમના ચાર કેબિનેટ સાથીદારો સાથે આ કાર્યક્રમમાં ભાગ લેશે. આ સિવાય જનકપુરથી ત્રણ તિલકહારુ રવાના થઈ ચૂક્યા છે. સ્થળ પર તૈયારીઓ પૂરજોશમાં ચાલી રહી છે. સોમવારે બપોરે 2 કલાકે રામસેવક પુરમ ખાતે તિલક વિધિ થશે. આ કાર્યક્રમને ભવ્ય બનાવવા માટે નેપાળના ધર્મયાત્રા ફેડરેશનના કન્વીનર રઘુનાથ શાહ સહિત 12 લોકો અયોધ્યા પહોંચી ચૂક્યા છે.

ભવ્ય પંડાલ અને સ્ટેજની તૈયારી
તિલકોત્સવ માટે રામસેવક પુરમ ખાતે વિશાળ પંડાલ અને સ્ટેજ બનાવવામાં આવી રહ્યું છે. સ્ટેજની લંબાઈ અને પહોળાઈ 100×90 ફૂટ છે. આ કાર્યક્રમમાં ઉપસ્થિત રહેવા સંતો, મહંતો અને મહાનુભાવોને ખાસ આમંત્રણ પાઠવવામાં આવ્યું છે. આ વિશેષ અવસર પર તિલક વિધિ પણ સંપૂર્ણ પરંપરા સાથે કરવામાં આવશે. સીતા માતાના ભાઈની ભૂમિકા ભજવવા માટે જનકપુરના જાનકી મંદિરના મહંત રામરોશન શરણ પોતે હાજર રહેશે.

તિલકોત્સવની તૈયારી
તિલકોત્સવમાં આવનાર મહેમાનો માટે સ્વાદિષ્ટ ભોજનની વ્યવસ્થા કરવામાં આવી છે. પુરી, શાક, ભાત, રાયતા, પાપડ, હલવો, આલુ ટિક્કી અને પાપડી ચાટ જેવી ખાદ્ય વસ્તુઓ પીરસવામાં આવશે. આ સાથે અયોધ્યાની મહિલાઓ પરંપરાગત લોકગીતો ગાઈને વાતાવરણને વધુ વિશેષ બનાવશે.

વરઘોડાની તૈયારીઓ
શ્રી રામના લગ્ન માટે 6 ડિસેમ્બરે અયોધ્યાથી જનકપુર સુધી વરઘોડો નીકળશે. લગ્નના વરઘોડાની ખાસ તૈયારીઓ કરવામાં આવી રહી છે. વરઘોડામાં ભાગ લેવા માટે માત્ર પસંદગીના લોકોને જ આમંત્રણ આપવામાં આવ્યું છે.

આ પણ વાંચો : વંદે ભારત એક્સપ્રેસ ટ્રેનની ટિકિટ કેન્સલ કરાવવા પર કેટલા રૂપિયા કપાય છે? જાણો IRCTC નિયમ