દિલજીત દોસાંઝે ગાંધીનગરમાં લાઈવ કોન્સર્ટ દરમિયાન તેલંગાણા સરકારની કાઢી ઝાટકણી, જૂઓ વીડિયો
- પંજાબી સિંગર દિલજીત દોસાંઝ તેની દિલુમિનાટી ટુરને કારણે થોડા મહિનાઓથી ચર્ચામાં
ગાંધીનગર, 18 નવેમ્બર: ગુજરાતના ગાંધીનગરમાં પંજાબી સિંગર દિલજીત દોસાંઝના કોન્સર્ટનું 17 નવેમ્બરના રોજ આયોજન કરવામાં આવ્યું હતું, જ્યાં તેને જોવા માટે મોટી સંખ્યામાં લોકો ઉમટી પડ્યા હતા. આ લાઈવ કોન્સર્ટ દરમિયાન ગાયક દિલજીત દોસાંઝે તેલંગાણા સરકારની ઝાટકણી કાઢી હતી. તાજેતરમાં તેના હૈદરાબાદના શો માટે તેલંગાણા સરકારે તેને કેટલીક બાબતોમાં ફેરફાર કરવા માટે નોટિસ મોકલી હતી, જેના પર ગાયક દિલજીત દોસાંઝે પોતાની પ્રતિક્રિયા આપી છે. તેણે કહ્યું કે, જો દેશના તમામ રાજ્યો પોતાને ડ્રાય સ્ટેટ જાહેર કરે તો બીજા દિવસથી હું દારૂ પર કોઈ ગીત નહીં ગાઉં.
ભારત પહેલા દિલજીત દોસાંઝે અમેરિકા, લંડન અને અન્ય ઘણી જગ્યાએ કોન્સર્ટ કર્યા, જેના માટે તેમને ઘણો પ્રેમ મળ્યો. જો કે, ભારતમાં આ ટુર શરૂ થાય તે પહેલા જ ગાયક દિલજીત દોસાંઝ વિવાદોમાં ફસાઈ ગયા હતા. તેલંગાણા સરકાર દ્વારા હૈદરાબાદના કોન્સર્ટ માટે જાહેર કરવામાં આવેલી નોટિસમાં દિલજીત દોસાંઝને દારૂ, ડ્રગ્સ અને હિંસા પર આધારિત ગીતો ન ગાવા અને બાળકોને સ્ટેજ પર આમંત્રિત ન કરવા કહેવામાં આવ્યું હતું.
જૂઓ વીડિયો
View this post on Instagram
બોલિવૂડ સ્ટાર્સ પર પણ નિશાન સાધ્યું
દિલજીત દોસાંઝે ગાંધીનગરમાં કોન્સર્ટ દરમિયાન સ્ટેજ પર કહ્યું કે, “સારા સમાચાર એ છે કે આજે મને કોઈ નોટિસ મળી નથી અને તેનાથી પણ સારા સમાચાર એ છે કે, આજે પણ હું દારૂ પર કોઈ ગીત નહીં ગાઉં. હું દારૂ પર ગીતો નહીં ગાઉં કારણ કે ગુજરાત ડ્રાય સ્ટેટ છે.” સિંગરે વધુમાં કહ્યું કે, “બોલિવૂડમાં દારૂ પર હજારો ગીતો બન્યા છે, જ્યારે મેં વધુમાં વધુ 2થી 4 ગીતો બનાવ્યા છે અને હવે હું તે પણ નહીં ગાઉં, કોઈ ટેન્શન નથી. મારા માટે આ કોઈ મુશ્કેલ કામ નથી કારણ કે હું પોતે દારૂ પીતો નથી અને બોલિવૂડ કલાકારોની જેમ દારૂની જાહેરાત પણ કરતો નથી.
તમામ રાજ્યોને ડ્રાય સ્ટેટ જાહેર કરો: દિલજીત
આલ્કોહોલવાળા ગીતો પર તેલંગાણા સરકારની નોટિસ પર નિશાન સાધતા દિલજીતે કહ્યું કે, ચાલો એક મૂવમેન્ટ શરૂ કરીએ કે જો આપણા દેશના તમામ રાજ્યો પોતાને ડ્રાય સ્ટેટ જાહેર કરે તો તેના બીજા જ દિવસથી હું દારૂ પર ગાવાનું બંધ કરી દઈશ. આમ થઈ શકે છે? બહુ મોટી આવક છે, કોરોનામાં બધું બંધ હતું પરંતુ દારૂના ઠેકાણાઓ ખુલ્લા હતા. તમે યુવાનોને મૂર્ખ બનાવી શકતા નથી. આ સિવાય તેમણે એક દિવસ માટે ડ્રાય ડે જાહેર કરવાની પણ ઓફર કરી હતી, જ્યાં તેમનો શો યોજાઈ રહ્યો છે. ગાયકે કહ્યું કે, જો આવું થશે તો હું ક્યારેય દારૂ પર ગીત નહીં ગાઉં.
આ પણ જૂઓ: નયનતારાના ઓપન લેટર પર ધનુષની પ્રતિક્રિયા, અભિનેત્રી અને નેટફ્લિક્સને આપ્યું 24 કલાકનું અલ્ટીમેટમ
HD ન્યુઝના વોટ્સએપ ગ્રુપમાં જોડાવા માટે ક્લિક કરોઃ
