મહારાષ્ટ્ર ચૂંટણી પહેલા ચિરાગ પાસવાનનો કોંગ્રેસ પર મોટો આરોપ, કહ્યું: PM મોદી તેને કરી રહ્યા છે ઠીક
- ચિરાગ પાસવાને કોંગ્રેસ પર ભારતીય બંધારણના નિર્માતા ડૉ. ભીમરાવ આંબેડકરનું અપમાન કરવાનો આરોપ લગાવ્યો
મુંબઈ, 18 નવેમ્બર: મહારાષ્ટ્ર વિધાનસભાની ચૂંટણી માટે મતદાનને હવે બે દિવસ જ બાકી છે. તે પહેલા કેન્દ્રીય મંત્રી અને લોક જનશક્તિ પાર્ટી (રામ વિલાસ)ના વડા ચિરાગ પાસવાને કોંગ્રેસને ઘેરી લીધી છે. ચિરાગ પાસવાને રવિવારે મુંબઈમાં કોંગ્રેસ પર ભારતીય બંધારણના નિર્માતા ડૉ. ભીમરાવ આંબેડકરનું અપમાન કરવાનો આરોપ લગાવ્યો છે. પાસવાને દાવો કર્યો હતો કે, કોંગ્રેસે લોકસભા ચૂંટણીમાં આંબેડકરની હાર સુનિશ્ચિત કરી હતી અને તેમનું અપમાન કર્યું હતું. વડાપ્રધાન મોદી આંબેડકરના આદર્શોને લાગુ કરવાની દિશામાં કામ કરી રહ્યા છે.
બાબા સાહેબ અંગે આપ્યું નિવેદન
મુંબઈના દાદરમાં ચૈત્ય ભૂમિ ખાતે ડૉ. આંબેડકરને શ્રદ્ધાંજલિ આપ્યા બાદ ચિરાગ પાસવાને કહ્યું કે, “વડાપ્રધાન નરેન્દ્ર મોદી આંબેડકરના આદર્શોને અમલમાં મૂકવાની દિશામાં કામ કરી રહ્યા છે. આ કારણે વિપક્ષો ડરી ગયા છે અને નેતાઓ બંધારણની નકલો બતાવી રહ્યા છે. ડો.આંબેડકરના અંતિમ સંસ્કાર ચૈત્ય ભૂમિ ખાતે કરવામાં આવ્યા હતા. પાસવાને એવો પણ આક્ષેપ કર્યો હતો કે, 1989 સુધી સંસદ ભવનના સેન્ટ્રલ હોલમાં ડૉ. આંબેડકરનો ફોટો લગાવવામાં આવ્યો ન હતો, જ્યારે ત્યાં “એક જ પરિવારના ત્રણ સભ્યો”ના ફોટોગ્રાફ્સ લગાવવામાં આવ્યા હતા, જે કોંગ્રેસની માનસિકતા દર્શાવે છે.
“…પણ હવે પરિસ્થિતિ બદલાઈ રહી છે”
ચિરાગ પાસવાને આગળ કહ્યું કે, કોંગ્રેસના નેતૃત્વમાં આ સ્થિતિ હતી, પરંતુ હવે પરિસ્થિતિ બદલાઈ રહી છે અને મોદી સરકાર ડૉ.આંબેડકરના વિચારોને આગળ લઈ જવા માટે કામ કરી રહી છે. ચિરાગ પાસવાન NDA ગઠબંધનના સભ્ય છે અને મહારાષ્ટ્ર વિધાનસભા ચૂંટણી પહેલા તેઓ ભાજપના નેતૃત્વવાળા મહાગઠબંધનના ઉમેદવારોના પ્રચાર માટે મુંબઈ પહોંચ્યા હતા. ઉલ્લેખનીય છે કે, મહારાષ્ટ્રની તમામ 288 વિધાનસભા સીટો પર 20 નવેમ્બરે મતદાન થશે. આ વખતે રાજ્યમાં મહાયુતિ અને મહાવિકાસ આઘાડી વચ્ચે ચૂંટણી જંગ છે.
આ પણ જૂઓ: બ્રાઝીલ પહોંચ્યા પીએમ મોદી, G20 સંમેલનમાં લેશે ભાગ
HD ન્યુઝના વોટ્સએપ ગ્રુપમાં જોડાવા માટે ક્લિક કરોઃ
