તિલક વર્માએ તોડ્યો વિરાટ કોહલીનો શાનદાર રેકોર્ડ, એક સિરીઝમાં 2 સદી ફટકારીને કર્યો કમાલ
- સંજુ સેમસન અને તિલક વર્માએ દક્ષિણ આફ્રિકા સામે 210 રનની પાર્ટનરશિપ કરી
HD ન્યૂઝ ડેસ્ક, 16 નવેમ્બર: ભારતીય ટીમે ચોથી T20 મેચમાં દક્ષિણ આફ્રિકાને 135 રનથી હરાવ્યું છે. આ મેચમાં ટીમ ઈન્ડિયાની દરેક ચાલ એકદમ સાચવીને રમી હતી. ટોસ જીત્યા બાદ કેપ્ટન સૂર્યાએ પ્રથમ બેટિંગ કરવાનો નિર્ણય કર્યો જે સાચો સાબિત થયો. સંજુ સેમસન અને તિલક વર્માની સદીની મદદથી ભારતીય ટીમ 283 રન બનાવવામાં સફળ રહી. તિલક વર્માના શાનદાર પ્રદર્શન માટે, તેને પ્લેયર ઓફ ધ મેચ અને પ્લેયર ઓફ ધ સિરીઝ બંને એવોર્ડ મળ્યા છે. આ ઉપરાંત તિલક વર્માએ વિરાટ કોહલીનો શાનદાર રેકોર્ડ પણ તોડ્યો છે અને એક સિરીઝમાં 2 સદી ફટકારીને કમાલ કર્યો છે.
બંનેએ એવી રીતે બેટિંગ કરી જે લાંબા સમય સુધી યાદ રહેશે. આ બંને ખેલાડીઓએ બીજી વિકેટ માટે 210 રનની પાર્ટનરશિપ કરી, જે ભારત માટે T20 આંતરરાષ્ટ્રીય ક્રિકેટમાં કોઈપણ વિકેટ માટે સૌથી મોટી પાર્ટનરશિપ છે.
T20I કારકિર્દીની બીજી સદી ફટકારી
દક્ષિણ આફ્રિકા સામેની ચોથી T20 મેચમાં તિલક વર્મા ત્રીજા નંબરે બેટિંગ કરવા આવ્યો હતો. તેણે 47 બોલમાં 9 ચોગ્ગા અને 10 છગ્ગાની મદદથી 120 રન બનાવ્યા હતા. T20 આંતરરાષ્ટ્રીય ક્રિકેટમાં આ તેની બીજી સદી છે. તે T20Iમાં સતત બે મેચમાં સદી ફટકારનાર એકંદરે પાંચમો ખેલાડી બની ગયો છે. તેના પહેલા ગુસ્તાવ મેકકોન, રિલે રૂસો, ફિલ સોલ્ટ, સંજુ સેમસન આ કરી ચુક્યા છે. હવે તિલક વર્મા આ બેટ્સમેનોની બરાબરી કરી લીધી છે.
T20Iમાં ભારતીય ટીમ માટે સૌથી ઝડપી સદી ફટકારનાર બેટ્સમેનઃ
- રોહિત શર્મા- 35 બોલ
- સંજુ સેમસન- 40 બોલ
- તિલક વર્મા- 41 બોલ
- સૂર્યકુમાર યાદવ- 45 બોલ
- કે.એલ. રાહુલ- 46 બોલ
કોહલીને પાછળ છોડી દીધો
સદી ફટકારીને તિલક વર્મા હવે ભારતીય ટીમ માટે T20 દ્વિપક્ષીય શ્રેણીમાં સૌથી વધુ રન બનાવનાર ખેલાડી બની ગયો છે. તેણે ભારતીય ટીમના સુપરસ્ટાર બેટ્સમેન વિરાટ કોહલીનો રેકોર્ડ તોડ્યો છે. તિલક વર્માએ આફ્રિકા સામેની T20 દ્વિપક્ષીય શ્રેણીમાં બે સદી સહિત કુલ 280 રન બનાવ્યા છે. જ્યારે કોહલીએ વર્ષ 2021માં ઈંગ્લેન્ડ સામેની T20 દ્વિપક્ષીય શ્રેણીમાં કુલ 231 રન બનાવ્યા હતા. હવે તિલક તેમનાથી ઘણો આગળ નીકળી ગયો છે.
તિલક વર્મા ભારતીય ટીમ માટે T20 ઈન્ટરનેશનલમાં સદી ફટકારનાર ત્રીજો સૌથી ઝડપી બેટ્સમેન બની ગયો છે. તેણે દક્ષિણ આફ્રિકા સામે માત્ર 41 બોલમાં સદી ફટકારી હતી. ટીમ ઈન્ડિયા માટે T20 ઈન્ટરનેશનલમાં સૌથી ઝડપી સદી ફટકારવાનો રેકોર્ડ રોહિત શર્માના નામે છે. તેણે વર્ષ 2017માં શ્રીલંકા સામે 35 બોલમાં સદી ફટકારી હતી.
આ પણ જૂઓ: IPL 2025 મેગા ઓક્શન : જાહેર થઈ 574 ખેલાડીઓની યાદી, જૂઓ કોણ છે હરાજીમાં સામેલ
