જો ભાજપ સહમત હોય તો હું વાતચીત માટે તૈયાર છું : ઉદ્ધવ ઠાકરેનું મોટું નિવેદન

સિલોદ, 15 નવેમ્બર : શિવસેના (UBT)ના વડા ઉદ્ધવ ઠાકરેએ શુક્રવારે મહારાષ્ટ્રના છત્રપતિ સંભાજી નગર જિલ્લાના સિલોદ વિધાનસભા ક્ષેત્રમાં એક રેલીને સંબોધિત કરતી વખતે ચોંકાવનારું નિવેદન આપ્યું હતું. તેમણે કહ્યું કે જો ભારતીય જનતા પાર્ટી (BJP)ના નેતાઓ વાત કરવા માંગતા હોય તો તેઓ પણ સાથે ચર્ચા માટે તૈયાર છે. 2019માં શિવસેના અને બીજેપીનું ગઠબંધન તૂટ્યા બાદ પ્રથમ વખત આ નિવેદન આવ્યું છે.

ઈન્ડિયન એક્સપ્રેસના અહેવાલ મુજબ, ઉદ્ધવ ઠાકરેએ ભાજપના કાર્યકરોની પ્રશંસા કરી અને તેમને શિવસેના (યુબીટી) સાથે હાથ મિલાવવાની અપીલ કરી હતી. તેમણે કહ્યું, અમારા મતભેદો છે, પરંતુ જો તમારા પક્ષમાંથી કોઈ મારી સાથે વાત કરવા માંગે છે, તો હું પણ તૈયાર છું. આપણે એક થવું જોઈએ અને સિલોડની છબી સુધારવી જોઈએ. અબ્દુલ સત્તારને હરાવવાની આ અમારી તક છે.

અબ્દુલ સત્તાર એકનાથ શિંદે જૂથમાંથી શિવસેનાના મંત્રી

અબ્દુલ સત્તાર હાલમાં એકનાથ શિંદે જૂથમાંથી શિવસેનાના મંત્રી છે. 2019ની વિધાનસભા ચૂંટણીમાં તેઓ શિવસેનામાં જોડાયા હતા. તે સમયે શિવસેના એકજૂટ હતી અને પક્ષની કમાન ઉદ્ધવ ઠાકરેના હાથમાં હતી. હવે સત્તાર ફરીથી સિલોદથી ચૂંટણી લડી રહ્યા છે, જ્યાં મુસ્લિમ મતદારો લગભગ 20% છે. સત્તારને દેશદ્રોહી ગણાવતા ઉદ્ધવે કહ્યું, દેશદ્રોહીઓએ એક થઈને સત્તાનો દુરુપયોગ કર્યો છે. ગરીબોને હેરાન કરવામાં આવે છે. આવા લોકોને જેલમાં ધકેલી દેવા જોઈએ. મેં તેને 2019 માં સામેલ કરીને ભૂલ કરી છે અને તેના માટે હું માફી માંગુ છું.

ભાજપ તરફથી સહકારની અપીલ

ભાજપના કાર્યકરોના વખાણ કરતાં ઉદ્ધવ ઠાકરેએ કહ્યું કે, સિલોદમાં ભયનું વાતાવરણ છે. હું ભાજપ અને તેના કાર્યકરોને અપીલ કરું છું કે આ તક ગુમાવશો નહીં. એક ‘સાચો’ ભાજપ કાર્યકર ગુંડાગીરીની વિરુદ્ધ છે અને આતંકનો અંત ઇચ્છે છે. આપણી સંસ્કૃતિ અને પરંપરાઓ અલગ છે. ભાજપના સ્થાનિક નેતાઓએ સત્તાર માટે પ્રચાર કરવાનો ઇનકાર કર્યો છે અને આરોપ લગાવ્યો છે કે તે ભગવા પાર્ટી વિરુદ્ધ કામ કરે છે.

સત્તાર અને ભાજપ વચ્ચે મતભેદો

જાલના લોકસભા બેઠક પરથી ભાજપના નેતા રાવસાહેબ દાનવેની હાર માટે સત્તારને જવાબદાર ઠેરવવામાં આવતાં ભાજપ અને સત્તાર વચ્ચેના સંબંધો બગડ્યા હતા. સત્તારે માત્ર દાનવેને ટેકો આપવામાં કોઈ રસ દાખવ્યો ન હતો, પરંતુ કોંગ્રેસના ઉમેદવાર કલ્યાણ કાલેની જીત માટે જાહેરમાં અભિનંદન પણ આપ્યા હતા.

હવે દાનવેના નજીકના સુરેશ બાંકર શિવસેના (UBT)ની ટિકિટ પર સત્તાર સામે ચૂંટણી લડી રહ્યા છે. મહારાષ્ટ્રમાં 20 નવેમ્બરે ચૂંટણી યોજાવા જઈ રહી છે, અને ઉદ્ધવ ઠાકરેની આ પહેલ શિવસેના (UBT) અને ભાજપ વચ્ચે સંભવિત રાજકીય સમીકરણ તરફ ઈશારો કરી રહી છે.

આ પણ વાંચો :- IPL 2025 મેગા ઓક્શન : જાહેર થઈ 574 ખેલાડીઓની યાદી, જૂઓ કોણ છે હરાજીમાં સામેલ