સોનિયાજી મહારાષ્ટ્રમાં ‘રાહુલ’ નામનું પ્લેન ફરી એકવાર ક્રેશ થવાનું છે : અમિત શાહ

મુંબઈ, 13 નવેમ્બર : મહારાષ્ટ્ર વિધાનસભા ચૂંટણીમાં એક જાહેરસભા દરમિયાન કેન્દ્રીય ગૃહમંત્રી અમિત શાહે વિપક્ષી નેતા રાહુલ ગાંધી પર આકરા પ્રહારો કર્યા હતા. અમિત શાહે કહ્યું કે, ‘રાહુલ બાબા’ નામનું પ્લેન, જે 20 વખત ક્રેશ થઈ ચૂક્યું છે, તે મહારાષ્ટ્ર વિધાનસભા ચૂંટણીમાં ફરી એકવાર ક્રેશ થવા જઈ રહ્યું છે.

અમિત શાહે કહ્યું કે સોનિયાજીએ રાહુલ બાબા નામના પ્લેનને 20 વખત લેન્ડ કરવાનો પ્રયાસ કર્યો અને 20 વખત પ્લેન ક્રેશ થયું છે. હવે ફરીથી તેને 21મી વખત મહારાષ્ટ્રમાં ઉતારવાનો પ્રયાસ કરવામાં આવી રહ્યો છે. શાહે કહ્યું કે સોનિયાજી, મહેરબાની કરીને નોંધ લો કે મહારાષ્ટ્ર વિધાનસભા ચૂંટણીમાં તમારું રાહુલ વિમાન ફરી એક વાર ક્રેશ થશે. કેન્દ્રીય ગૃહમંત્રીએ વિપક્ષના મહા વિકાસ અઘાડી ગઠબંધનને ‘ઔરંગઝેબ ફેન ક્લબ’ ગણાવ્યું હતું.

કેન્દ્રીય ગૃહમંત્રીએ કહ્યું કે અઘાડી (મહા વિકાસ આઘાડી) માત્ર ખુશ કરવા માંગે છે. અમે શિવાજી મહારાજના પગલે ચાલીએ છીએ અને આઘાડીના લોકો ઔરંગઝેબ ફેન ક્લબના સભ્યો છે. તેમણે વધુમાં દાવો કર્યો કે અઘાડી સરકારે રૂ. 4 હજાર કરોડની મરાઠવાડા વોટર ગ્રીડ યોજના બંધ કરી દીધી હતી. જેના કારણે દુષ્કાળગ્રસ્ત મરાઠવાડાને પાણી મળતું ન હતું.

અમિત શાહે કહ્યું કે 2019માં અમારા નેતા દેવેન્દ્ર ફડણવીસે આ યોજનાને આગળ વધારવાની પહેલ કરી હતી, પરંતુ ઉદ્ધવજીની સરકાર આવતા જ તેને ફરીથી અટકાવી દેવામાં આવી હતી. હું કહું છું કે અમારી મહાયુતિ સરકાર અહીંના દરેક ખેતરમાં પાણી પહોંચાડવાનું કામ કરશે.

શાહે ભારપૂર્વક જણાવ્યું હતું કે 23 નવેમ્બરે પીએમ મોદીના નેતૃત્વમાં ફરીથી મહાગઠબંધનની સરકાર બનશે. શાહે કહ્યું, શું તમે મહારાષ્ટ્ર વિધાનસભા ચૂંટણીના પરિણામ જાણવા માંગો છો? મારી વાત ધ્યાનથી સાંભળો, 23મી નવેમ્બરે (મહા વિકાસ) આઘાડીનો સફાયો થઈ જશે. 23મીએ ફરી પીએમ મોદીના નેતૃત્વમાં મહાગઠબંધનની સરકાર બનશે.

તેમણે કહ્યું કે નરેન્દ્ર મોદી સરકાર વકફ બોર્ડના કાયદામાં સુધારો કરશે. શાહે કહ્યું કે વકફ બોર્ડે ઘણા ગામોની જમીનને વકફ પ્રોપર્ટી જાહેર કરી છે. જેમાં મંદિરો અને ખેડૂતોની જમીનનો સમાવેશ થાય છે. અમે તેમાં (વક્ફ એક્ટ)માં સુધારો કરવા માટે બિલ લાવ્યા, પરંતુ રાહુલ ગાંધી, શરદ પવાર, ઉદ્ધવ ઠાકરેએ તેનો વિરોધ કર્યો હતો. તમને જણાવી દઈએ કે, મહારાષ્ટ્ર વિધાનસભા ચૂંટણી માટે 20 નવેમ્બરે મતદાન થશે. 23 નવેમ્બરે પરિણામ જાહેર થશે.

આ પણ વાંચો :- ખ્યાતિ હોસ્પિટલને PMJAY–મા યોજનામાંથી કાયમી ધોરણે બ્લેક લિસ્ટ કરાઇ