શેરબજાર સતત ત્રીજા દિવસે તૂટ્યું, જૂઓ સેન્સેક્સ અને નિફ્ટી કેટલાએ બંધ થયા

મુંબઈ, 13 નવેમ્બર : શેરબજારમાં લગભગ દોઢ મહિના પહેલા શરૂ થયેલો વિનાશનો સિલસિલો અટકવાના કોઈ સંકેત દેખાઈ રહ્યા નથી. ભારતીય શેરબજારમાં આજે ફરી એકવાર ભયંકર ઘટાડો નોંધાયો હતો. બુધવારે BSE સેન્સેક્સ 984.23 પોઈન્ટના ઘટાડા સાથે 77,690.95 પોઈન્ટ પર બંધ થયો હતો. આ રીતે NSEનો નિફ્ટી 50 ઈન્ડેક્સ પણ 324.40 પોઈન્ટના ઘટાડા સાથે 23,559.05 પોઈન્ટ પર બંધ થયો હતો. મંગળવારે પણ સેન્સેક્સમાં 820.97 પોઈન્ટ્સ અને નિફ્ટી 50માં 257.85 પોઈન્ટનો ઘટાડો નોંધાયો હતો.

સેન્સેક્સ ચાર્ટમાં ભારે ઘટાડો

સપ્તાહના ત્રીજા દિવસે સેન્સેક્સની 30માંથી 26 કંપનીઓના શેર નુકસાન સાથે લાલ નિશાનમાં અને માત્ર 4 કંપનીઓના શેર જ લાભ સાથે લીલા નિશાનમાં બંધ થયા હતા. બીજી તરફ નિફ્ટી 50ની 50માંથી 44 કંપનીઓના શેર પણ ઘટાડા સાથે લાલ નિશાનમાં અને માત્ર 6 કંપનીઓના શેર લીલા નિશાનમાં બંધ થયા હતા. આનો સીધો અર્થ એ થયો કે આજે ફરી એકવાર મોટાભાગની કંપનીઓના શેરમાં જંગી વેચવાલી થઈ છે.

મહિન્દ્રા એન્ડ મહિન્દ્રાના શેરમાં મોટો ઘટાડો

સેન્સેક્સ કંપનીઓમાં મહિન્દ્રા એન્ડ મહિન્દ્રાના શેરમાં આજે સૌથી વધુ 3.23 ટકાનો ઘટાડો નોંધાયો હતો. ટાટા સ્ટીલ 3.02 ટકા, અદાણી પોર્ટ્સ 2.82 ટકા, જેએસડબલ્યુ સ્ટીલ 2.18 ટકા, ઇન્ડસઇન્ડ બેન્ક 1.89 ટકા, રિલાયન્સ ઇન્ડસ્ટ્રીઝ 1.73 ટકા, એચડીએફસી બેન્ક 1.67 ટકા, કોટક મહિન્દ્રા બેન્ક 1.67 ટકા, સ્ટેટ બેન્ક ઓફ ઇન્ડિયા 1.63 ટકા, ફિનસરર્વ 1.63 ટકા એક્સિસ બેન્કના શેર 1.35 ટકા, લાર્સન એન્ડ ટુબ્રો 1.27 ટકા, પાવરગ્રીડ 1.18 ટકા, સન ફાર્મા 1.16 ટકા, ટીસીએસ 1.13 ટકા ઘટીને બંધ થયા છે.

માત્ર આ 4 કંપનીઓના શેર લીલા નિશાનમાં બંધ થયા

આ સિવાય ICICI બેન્ક, નેસ્લે ઇન્ડિયા, ટેક મહિન્દ્રા, અલ્ટ્રાટેક સિમેન્ટ, બજાજ ફાઇનાન્સ, મારુતિ સુઝુકી, ટાઇટન, HCL ટેક, ભારતી એરટેલ, ITC અને હિન્દુસ્તાન યુનિલિવરના શેરમાં પણ ઘટાડો થયો હતો. જોકે, ટાટા મોટર્સનો શેર 0.29 ટકા, એનટીપીસીનો શેર 0.21 ટકા, એશિયન પેઇન્ટ્સના શેર 0.16 ટકા અને ઇન્ફોસિસનો શેર 0.01 ટકાના વધારા સાથે બંધ રહ્યો હતો.

આ પણ વાંચો :- ₹2000ની નોટ: RBIએ કરી નવી જાહેરાત, જાણો શું છે ખાસ?