SA T20 સીરીઝમાં ભારતના આ બે ખેલાડીઓ વચ્ચે નંબર-1 બનવાની સ્પર્ધા થશે

ડરબન, 8 નવેમ્બર : T20 વર્લ્ડ ચેમ્પિયન ટીમ ઈન્ડિયા ફરી એકવાર દક્ષિણ આફ્રિકાને તેના ઘરઆંગણે હરાવવા માટે તૈયાર છે. વેસ્ટ ઈન્ડિઝમાં આયોજિત T20 વર્લ્ડ કપની ફાઈનલ બાદ બંને ટીમો પ્રથમ વખત સામસામે આવશે.  જ્યારે ટીમ ઈન્ડિયા શ્રીલંકા અને બાંગ્લાદેશને હરાવી પોતાની જીતનો સિલસિલો જાળવી રાખવા ઈચ્છશે તો દક્ષિણ આફ્રિકા બદલો લેવાનો પ્રયાસ કરશે.

ડરબનમાં રમાનાર પ્રથમ T20 મેચમાં બંને વચ્ચે જબરદસ્ત રમત જોવા મળી શકે છે. આ દરમિયાન ભારતીય ટીમના બે મહત્વના ખેલાડી હાર્દિક પંડ્યા અને અર્શદીપ સિંહ પણ એકબીજા સામે ટક્કર આપતા જોવા મળશે. બંને પાસે ભારતના શ્રેષ્ઠ બોલર બનવાની તક છે.

પંડ્યા અને અર્શદીપ વચ્ચે નંબર 1 બનવાની લડાઈ

ટી20 ઈન્ટરનેશનલ મેચોમાં ભારત માટે સૌથી વધુ વિકેટ લેવાનો રેકોર્ડ યુઝવેન્દ્ર ચહલના નામે છે. તેણે 80 મેચમાં 96 વિકેટ પોતાના નામે કરી છે. જ્યારે ભુવનેશ્વર કુમાર 87 મેચમાં 90 વિકેટ સાથે બીજા સ્થાને અને જસપ્રિત બુમરાહ 70 મેચમાં 89 વિકેટ સાથે ત્રીજા સ્થાને છે. પરંતુ સાઉથ આફ્રિકા સામેની આ સીરીઝ દરમિયાન હાર્દિક પંડ્યા અને અર્શદીપ સિંહ પાસે તેને પછાડીને ભારતનો નંબર 1 T20 બોલર બનવાનો મોકો છે.

જ્યારે કે, પંડ્યાએ 105 મેચમાં 87 અને અર્શદીપે 56 મેચમાં 87 વિકેટ ઝડપી છે. તેનો અર્થ એ છે કે બંને હાલમાં સમાન ધોરણે ઉભા છે અને 10 વિકેટ લેતાં જ ભારતનો સર્વશ્રેષ્ઠ T20 બોલર બની જશે. હવે જોવાનું એ રહેશે કે આ સીરીઝમાં કોણ જીતે છે.

આ પણ વાંચો :- કેનેડામાં મંદિરો ઉપર હુમલાનો વિરોધ કરતા હિન્દુઓ સામે કેનેડિયન પોલીસની કાર્યવાહી