‘હિંમત હોય તો બચાવી લો’ સલમાન ખાનને ફરી ધમકી, અભિનેતા પર ગીત લખનારને ધમકાવ્યો

• ધમકીમાં અભિનેતા પર ગીત લખનાર વ્યક્તિને મારી નાખવાનો ઉલ્લેખ

મુંબઈ, 8 નવેમ્બર: સલમાન ખાનની મુસીબતો ઓછી થઈ રહી નથી. લોરેન્સ બિશ્નોઈની જૂની ધમકી બાદ વધુ એક ધમકીભર્યો મેસેજ આવ્યો છે. આ વખતે પણ આ ધમકીમાં બિશ્નોઈ ગેંગ સામેલ હોવાનું કહેવાય છે. આ ધમકી સીધી સલમાન ખાન માટે નથી પરંતુ તેના પર ગીત લખનાર વ્યક્તિ માટે છે. મુંબઈ પોલીસના ટ્રાફિક વિભાગને એક મેસેજ આવ્યો છે, જેમાં સલમાન ખાનના નામે ધમકીભર્યો મેસેજ હતો. મોકલવામાં આવેલા મેસેજમાં લોરેન્સ બિશ્નોઈ અને સલમાન વિશે લખેલા ગીતનો ઉલ્લેખ કરવામાં આવ્યો છે. આ મેસેજ ગુરુવારે રાત્રે 12 વાગ્યાની આસપાસ મોકલવામાં આવ્યો હતો.

ધમકીમાં શું કહેવામાં આવ્યું?

હાલ મુંબઈ પોલીસ આ મામલાની તપાસ કરી રહી છે. ધમકીભર્યો મેસેજ મળ્યા બાદ પ્રોટોકોલ મુજબ કેસ નોંધવામાં આવશે અને મેસેજ મોકલનાર આરોપીની શોધ કરવામાં આવશે. હાલમાં પોલીસ સુત્રોમાંથી મળતી માહિતી મુજબ, મેસેજ મોકલનાર વ્યક્તિએ સલમાન અને લોરેન્સ બિશ્નોઈ પર લખેલા ગીતનો ઉલ્લેખ કર્યો છે અને કહ્યું છે કે, તે ગીત લખનારને બક્ષશે નહીં અને એક મહિનાની અંદર ગીત લખનારને મારી નાખશે. જો સલમાન ખાનમાં હિંમત હોય તો તેને બચાવી લે.

શાહરૂખ ખાનને પણ મળી હતી ધમકી 

મહત્ત્વપૂર્ણ છે કે, ગુરુવારે શાહરૂખ ખાનને પણ જાનથી મારી નાખવાની ધમકી મળી હતી. પોલીસ સ્ટેશનમાં આવેલા ફોનમાં શાહરૂખ ખાનને ધમકીભર્યો મેસેજ આપવામાં આવ્યો હતો. હવે તેના એક દિવસ બાદ જ સલમાન ખાનને ફરી એક ધમકી મળી છે. તાજેતરમાં પૂર્વ ધારાસભ્ય બાબા સિદ્દીકીની હત્યાએ સૌને આશ્ચર્યચકિત કરી દીધા હતા. લોરેન્સ બિશ્નોઈની ગેંગે આ ઘટનાની જવાબદારી લીધી હતી અને તેના તાર સલમાન ખાનના કેસ સાથે પણ જોડાયેલા હતા. બાબા સિદ્દીકી સલમાન ખાનના ખાસ મિત્ર હતા. જેના થોડા દિવસ પહેલા જ સલમાન ખાનને ધમકી મળી હતી. જેલમાં બેઠેલો લોરેન્સ બિશ્નોઈ આવા ગુના કર્યા બાદ સતત ધમકીઓ આપી રહ્યા છે. આ ગેંગ દ્વારા સ્પષ્ટ કરવામાં આવ્યું હતું કે, બાબા સિદ્દીકીનો પુત્ર જીશાન પણ નિશાને છે.

આ મામલે સતત કાર્યવાહી ચાલુ

આ મામલે પોલીસ ઝડપથી તપાસ કરી રહી છે. સતત કાર્યવાહીમાં અત્યાર સુધીમાં ઘણી ધરપકડ કરવામાં આવી છે. ઉલ્લેખનીય છે કે, આ મામલો સલમાન ખાનના ઘરની બહાર ફાયરિંગથી શરૂ થયો હતો. આ પછી તેના પિતા સલીમ ખાનને ધમકીઓ મળી હતી. રસ્તામાં લોરેન્સ બિશ્નોઈના નામે સ્કૂટર પર સવાર બે લોકોએ તેને ધમકી આપી હતી. બાદમાં પોલીસે બંનેની ધરપકડ કરી હતી. આ પછી બાબા સિદ્દીકીની હત્યાએ આ સમગ્ર મામલાને વધુ વેગ આપ્યો. જો કે, સલમાન ખાનની સુરક્ષા કડક કરવામાં આવી છે. તે સુરક્ષાની વચ્ચે પોતાના આગામી પ્રોજેક્ટનું શૂટિંગ પૂર્ણ કરી રહ્યો છે. ‘બિગ બોસ 17’ હોસ્ટ કરવાની સાથે સાથે સલમાન ખાન આગામી ફિલ્મ ‘સિકંદર’ના શૂટિંગમાં વ્યસ્ત છે.

આ પણ જૂઓ: સલમાન ખાન પછી શાહરૂખ ખાનને મળી ધમકી, મુંબઈ પોલીસને આવ્યો કૉલ