ઓડિશામાં નીલાંચલ એક્સપ્રેસ પર ફાયરિંગ, કોઈ જાનહાની નહીં

ભુવનેશ્વર, 5 નવેમ્બર : ઓડિશામાં ચાલતી ટ્રેનમાં ફાયરિંગ થયું છે. ટ્રેન પર અનેક રાઉન્ડ ગોળીબાર કરવામાં આવ્યો છે. આ ઘટના પ્રકાશમાં આવતાં ખળભળાટ મચી ગયો છે. રેલવે પ્રોટેક્શન ફોર્સ (RPF) અને સરકારી રેલવે પોલીસ (GRP) આ મામલાની તપાસ કરી રહી છે.

શું છે સમગ્ર મામલો?

ઓડિશામાં નીલાંચલ એક્સપ્રેસ પર અજાણ્યા શખ્સોએ ગોળીબાર કર્યો છે. આ ઘટના આજે સવારે 9.25 કલાકે બની હતી. આ ઘટના ત્યારે બની જ્યારે ટ્રેન ચંપા રેલવે સ્ટેશનથી રવાના થઈ રહી હતી. ટ્રેન મેનેજરની ફરિયાદ મળ્યા બાદ ભદ્રક જીઆરપીએ તપાસ શરૂ કરી છે.

આ ગોળીબાર ગાર્ડના વાન કમ્પાર્ટમેન્ટ તરફ કરવામાં આવ્યો હતો, જેમાં કોઈ પેસેન્જર માટે બેસવાની જગ્યા નહોતી. આ ઘટનામાં કોઈને ઈજા થઈ હોવાની કોઈ માહિતી નથી. ગોળીબાર કોણે કર્યો અને તેનો હેતુ શું હતો તે અંગે અધિકારીઓ હજુ પણ તપાસ કરી રહ્યા છે.

બોમ્બના સમાચારે રેલવે વિભાગની ઉંઘ હરામ કરી નાખી

આ પહેલા ઘણા દિવસો સુધી અલગ-અલગ રેલવે સ્ટેશનો પર બોમ્બની ધમકીઓ મળી હતી. હાલમાં જ બિહાર સંપર્ક ક્રાંતિ સુપરફાસ્ટ ટ્રેનમાં બોમ્બ હોવાની માહિતી મળી હતી, ત્યારબાદ ટ્રેનમાં બેઠેલા મુસાફરોમાં ગભરાટ ફેલાયો હતો.

ઉત્તર પ્રદેશના ગોંડામાં ટ્રેન નંબર 12565 બિહાર સંપર્ક ક્રાંતિ સુપરફાસ્ટ ટ્રેનમાં બોમ્બ હોવાની માહિતીના કારણે ખળભળાટ મચી ગયો હતો અને આરપીએફ અને જીઆરપી પોલીસની ટીમે ડોગ સ્કવોડ સાથે સતર્કતા સાથે ટ્રેનનું ચેકિંગ કર્યું હતું. જો કે બાદમાં કંઈ મળ્યું ન હતું અને દોઢ કલાકના વિલંબ બાદ ટ્રેન રવાના કરવામાં આવી હતી.

આ પણ જૂઓ:- Wikipediaને સરકારે મોકલી નોટિસ, ખોટી માહિતી આપવા સાથે સંબંધિત મામલો