અમેરિકામાં ચૂંટણી, ભારતના આ ગામમાં કમલા હેરિસ માટે થઈ પૂજા

અમેરિકા , 5 નવેમ્બર : અમેરિકામાં પ્રમુખની ચૂંટણીનો સમય આવી ગયો છે. આજે એટલે કે 5 નવેમ્બરની રાત સુધી એ નિર્ણય લેવાઈ જશે કે વ્હાઈટ હાઉસ પર આગલા 4 વર્ષ સુધી કોણ રાજ કરશે. રિપબ્લિકન ઉમેદવાર ડોનાલ્ડ ટ્રમ્પ અને ડેમોક્રેટ કમલા હેરિસ વચ્ચે મુકાબલો છે. ભારતીય માતાની પુત્રી કમલા હેરિસ પણ ભારતીય સંસ્કૃતિ સાથે જોડાયેલી છે. વોશિંગ્ટનથી 13 હજાર કિલોમીટર દૂર ભારતના એક ગામમાં પણ તેમની જીત માટે લોકો પ્રાર્થના કરી રહ્યાં છે.

તમિલનાડુના તુલસેન્દ્રપુરમ મંદિરમાં કમલા હેરિસની જીત માટે વિશેષ પૂજાનું આયોજન કરવામાં આવ્યું હતું. અહીંના એક પથ્થરમાં કમલા હેરિસનું નામ પણ લખેલું છે. તેમણે મંદિર માટે દાન આપ્યું હતું. આ ઉપરાંત તેમના માતા-પિતાનું નામ પણ પથ્થર પર કોતરેલું છે. આ ઉપરાંત મંદિરની ચારે બાજુ બેનરો લગાવવામાં આવ્યા છે અને ભારતની દીકરીની જીતની શુભેચ્છાઓ પાઠવવામાં આવી છે.

આ ગામ ચાર વર્ષ પહેલા ચર્ચામાં આવ્યું હતું જ્યારે 2020માં કમલા હેરિસ અમેરિકાના ઉપપ્રમુખ બન્યા હતા. ત્યારે પણ ગામમાં અન્નકૂટનું વિતરણ કરવામાં આવ્યું હતું અને ફટાકડા ફોડીને ઉજવણી કરવામાં આવી હતી. હેરિસના દાદા પીવી ગોપાલન આ ગામમાં રહેતા હતા. જો કે, થોડા દિવસો પછી, તેઓ તેમના પરિવાર સાથે ચેન્નાઈ નજીક રહેવા લાગ્યા. તેઓ એક વરિષ્ઠ સરકારી અધિકારી હતા.

કમલા હેરિસની માતા શ્યામલા ગોપાલન પણ 19 વર્ષની ઉંમરે અમેરિકા ગયા હતા. તેમણે ત્યાં અભ્યાસ કર્યો અને તે પછી તેમણે ડોનાલ્ડ હેરિસ નામના વ્યક્તિ સાથે લગ્ન કર્યા. કમલા હેરિસનો ઉછેર અમેરિકા અને કેનેડામાં થયો હતો. તેમણે લાંબા સમય સુધી વકીલ તરીકે કામ કર્યું. 2016 માં જ, તેમણે અમેરિકાના કેન્દ્રીય રાજકારણમાં પ્રવેશ કર્યો અને માત્ર ચાર વર્ષ પછી ઉપપ્રમુખ બન્યા. આ વખતે તે ડેમોક્રેટિક પાર્ટી તરફથી પ્રમુખ પદ માટે પ્રબળ દાવેદાર માનવામાં આવે છે.

આ પણ વાંચો : નાની ઉંમરે કરોડપતિ બનનાર અને અમિતાભ બચ્ચન પણ જેના ફેન છે એ રવિ મોહનને ઓળખો છો?