મહિન્દ્રાના વાહનોનું વેચાણ ટોપ ગિયરમાં! જાણો કેવી છે ઓટો માર્કેટની હાલત

• મહિન્દ્રા એન્ડ મહિન્દ્રાએ ઓક્ટોબરમાં અત્યાર સુધીનું શ્રેષ્ઠ માસિક વેચાણ રેકોર્ડ બનાવ્યો છે

નવી દિલ્હી, 1 નવેમ્બર: ભારતીય માર્કેટમાં મહિન્દ્રાના વાહનોની જબરદસ્ત માંગ છે. તેની અસર કંપનીના વેચાણ પર જોવા મળી છે. ઓટોમેકર મહિન્દ્રા એન્ડ મહિન્દ્રાએ ઓક્ટોબરમાં અત્યાર સુધીનું શ્રેષ્ઠ માસિક વેચાણ રેકોર્ડ કર્યું છે. કંપનીએ 96,648 યુનિટ્સનું વેચાણ કર્યું હતું, જે ગયા વર્ષના સમાન સમયગાળામાં 80,679 યુનિટ્સની સરખામણીએ 20 ટકા વધુ છે. મહિન્દ્રા એન્ડ મહિન્દ્રા (M&M)એ એક નિવેદનમાં જણાવ્યું હતું કે, યુટિલિટી વ્હીકલ સેગમેન્ટમાં તેમણે સ્થાનિક બજારમાં 54,504 એકમોનું વેચાણ કર્યું હતું, જે એક વર્ષ અગાઉના સમાનગાળામાં 43,708 એકમોથી 25 ટકા વધુ હતું. કંપનીએ જણાવ્યું હતું કે, નિકાસ સહિત પેસેન્જર વાહનોનું કુલ જથ્થાબંધ વેચાણ 55,571 યુનિટ રહ્યું છે. ગયા મહિને કોમર્શિયલ વાહનોનું ઘરેલું વેચાણ 28,812 યુનિટ રહ્યું હતું. તે જ સમયે, ટાટાના વાહનોના વેચાણમાં થોડો ઘટાડો થયો હતો.

SUVના વેચાણમાં 25%નો ઉછાળો

M&Mના ઓટોમોટિવ ડિવિઝનના પ્રેસિડન્ટ વિજય એન.એ જણાવ્યું કે, “અમે ઓક્ટોબરમાં 54,504 વાહનોના અત્યાર સુધીના સૌથી વધુ SUV વેચાણમાં 25 ટકાની વૃદ્ધિ અને 96,648 વાહનોના અત્યાર સુધીના સૌથી વધુ કુલ વેચાણ એટલે કે 20 ટકાની વૃદ્ધિથી અત્યંત ખુશ છીએ.” તેમણે કહ્યું કે, મહિનાની શરૂઆત સારી થઈ હતી અને Thar Roxxને પ્રથમ 60 મિનિટમાં 1.7 લાખ બુકિંગ મળ્યા હતા. તહેવારોને ધ્યાનમાં રાખીને SUV સેગમેન્ટમાં સકારાત્મક ગતિ ચાલુ રહી. M&Mના ફાર્મ ઇક્વિપમેન્ટ સેગમેન્ટે (FES) ગયા મહિને 64,326 ટ્રેક્ટરનું અત્યાર સુધીનું સૌથી વધુ માસિક સ્થાનિક વેચાણ નોંધાવ્યું હતું, જે ઓક્ટોબર 2023માં 49,336 યુનિટ હતું. નિકાસ સહિત કુલ ટ્રેક્ટરનું વેચાણ ગયા મહિને 65,453 યુનિટ હતું, જે 2023ના સમાન સમયગાળામાં 50,460 યુનિટ હતું. M&Mના FESના પ્રેસિડેન્ટ હેમંત સિક્કાએ જણાવ્યું હતું કે, “ટ્રેક્ટર ઉદ્યોગમાં સંખ્યાબંધ સકારાત્મક પરિબળો એકસાથે આવતાં ખૂબ જ મજબૂત વૃદ્ધિ જોવા મળી છે. આમાં સારું ચોમાસું, સારો ખરીફ પાક, ઉચ્ચ જળાશય સ્તર જે રવિ પાકને મદદ કરશે અને સરકાર દ્વારા મુખ્ય રવિ પાકો પર ઊંચા લઘુત્તમ ટેકાના ભાવ (MSP)ની જાહેરાતનો સમાવેશ થાય છે.” તેમણે જણાવ્યું કે, કંપનીએ ગયા મહિને 1,127 એકમોની નિકાસ કરી હતી.

ટાટા મોટર્સના કુલ વેચાણમાં થોડો ઘટાડો

ટાટા મોટર્સ લિમિટેડનું ઘરેલુ અને આંતરરાષ્ટ્રીય વેચાણ ઓક્ટોબરમાં નજીવું ઘટીને 82,682 યુનિટ થયું હતું, જે ગયા વર્ષના સમાન મહિનામાં 82,954 યુનિટ હતું. ટાટા મોટર્સે સ્ટોક એક્સચેન્જ ફાઇલિંગમાં જણાવ્યું હતું કે, ગયા મહિને કુલ ઘરેલુ વેચાણ નજીવું વધીને 80,839 યુનિટ થયું હતું જે એક વર્ષ અગાઉના સમાન સમયગાળામાં 80,825 યુનિટ હતું. ઈલેક્ટ્રિક વાહનો સહિત કુલ પેસેન્જર વ્હિકલ (PV)નું વેચાણ ઓક્ટોબર 2023માં 48,637 યુનિટથી નજીવું ઘટીને 48,423 યુનિટ થયું હતું. એ જ રીતે, ઘરેલુ પેસેન્જર વાહનોનું વેચાણ પણ ઘટીને 48,131 યુનિટ થયું હતું, જે એક વર્ષ અગાઉના સમાન મહિનામાં 48,337 યુનિટ હતું, એમ કંપનીએ જણાવ્યું હતું. ટાટા મોટર્સે જણાવ્યું હતું કે, ગયા મહિને તેનું કુલ વાણિજ્યિક વાહનોનું વેચાણ 34,259 યુનિટ થયું હતું, જે ઓક્ટોબર 2023માં 34,317 યુનિટ હતું.

રોયલ એનફિલ્ડનું વેચાણ વધ્યું

આઇશર મોટર્સ લિમિટેડની રોયલ એનફિલ્ડ મોટરસાઇકલનું ઓક્ટોબરમાં કુલ વેચાણ 31 ટકા વધીને 1,10,574 યુનિટ થયું છે. કંપનીએ શેરબજારને આપેલી માહિતીમાં જણાવ્યું કે, ગયા વર્ષે 84,435 યુનિટ વેચાયા હતા. આઇશર મોટર્સે જણાવ્યું હતું કે, ગયા મહિને આંતરરાષ્ટ્રીય વેચાણ 8,688 યુનિટ હતું, જે ગયા વર્ષે ઓક્ટોબરમાં 3,477 યુનિટ હતું. 350 CC સુધીની એન્જિન ક્ષમતાવાળા મોડલનું વેચાણ ગયા વર્ષે ઓક્ટોબરમાં 76,075 યુનિટની સરખામણીએ આ વર્ષે 27 ટકા વધીને 96,837 યુનિટ થયું છે. કંપનીના જણાવ્યા અનુસાર, એ જ રીતે 350 CCથી વધુની એન્જિન ક્ષમતાવાળા મોડલનું વેચાણ ઓક્ટોબર 2023માં 8,360 યુનિટથી 64 ટકા વધીને 13,737 યુનિટ થયું છે.

આ પણ જૂઓ: Elon Muskના સ્ટારલિંક અને એમેઝોનની સેટેલાઈટ સર્વિસ પર સંકટ, DoTએ કરી આ માંગણી