દેશના પ્રખ્યાત મહાલક્ષ્મી મંદિરોની એક વાર જરૂર લો મુલાકાત, પૂરી થશે મનોકામના

• દેશના પ્રખ્યાત મહાલક્ષ્મી મંદિરોની મુલાકાત એક વખત તો લેવી જ જોઈએ. આ મંદિરો તમને કોઈ દિવ્યતાનો અનુભવ કરાવશે

HD ન્યુઝ ડેસ્કઃ દિવાળીના દિવસોમાં દેવી લક્ષ્મીના મંદિરોમાં ભક્તોની ભીડ જામે છે. ધન અને ઐશ્વર્યની દેવી લક્ષ્મીના ઘણા પ્રખ્યાત મંદિરો દેશભરમાં આવેલા છે. આમાંના કેટલાક મંદિરો ઐતિહાસિક મહત્ત્વ ધરાવે છે. ભક્તોની આસ્થાની સાથે સાથે આ મંદિરો દેશ-વિદેશના પ્રવાસીઓ માટે પણ આકર્ષણનું કેન્દ્ર છે. તમે દિવાળી બાદ આ મંદિરોની મુલાકાત લઈ શકો છો. અહીં આવીને તમને કોઈ અલૌકિકતાનો અનુભવ થશે.

મહાલક્ષ્મી મંદિર ઈન્દોર, મધ્ય પ્રદેશ

મધ્ય પ્રદેશના ઈન્દોર શહેરમાં આવેલું પ્રસિદ્ધ શ્રી મહાલક્ષ્મી મંદિર 1832માં મલ્હાર રાવ (બીજા) દ્વારા બનાવવામાં આવ્યું હતું. તે ત્રણ માળનું ભવ્ય મંદિર હતું. 1933ની આસપાસ આગ લાગવાને કારણે મંદિરને ઘણું નુકસાન થયું હતું. આ મંદિરનો 1942માં ફરીથી જીર્ણોદ્ધાર કરવામાં આવ્યો હતો. હોલકર ઈતિહાસના જાણકારોનું કહેવું છે કે મલ્હારી માર્તંડ મંદિરની સાથે રજવાડા સ્થિત આ પ્રાચીન મહાલક્ષ્મી મંદિરમાં સ્થાપિત દેવી લક્ષ્મીની સુશોભિત મૂર્તિનું ઘણું ઐતિહાસિક મહત્ત્વ છે.

પદ્માવતી મંદિર તિરુપતિ, આંધ્રપ્રદેશ

આંધ્ર પ્રદેશમાં તિરુપતિ નજીક તિરુચુરા નામના ગામમાં સ્થિત દેવી પદ્માવતીનું આ મંદિર ‘અલમેલામંગાપુરમ’ તરીકે પણ ઓળખાય છે. માન્યતાઓ અનુસાર, તિરુપતિ બાલાજી મંદિરમાં આવનારા ભક્તોની મનોકામના ત્યારે જ પૂર્ણ થાય છે જ્યારે તેઓ દેવી પદ્માવતીના આશીર્વાદ લે છે. એટલા માટે જે પણ ભક્તો તિરુપતિ બાલાજીના દર્શન કરવા જાય છે તે આ મંદિરમાં અવશ્ય આવે છે.

મહાલક્ષ્મી સુવર્ણ મંદિર વેલ્લોર, તમિલનાડુ

તમિલનાડુના વેલ્લોર જિલ્લાના થિરુમલાઈ કોડે ગામ શ્રીપુરમમાં સ્થિત મહાલક્ષ્મી મંદિરને ‘દક્ષિણ ભારતનું સુવર્ણ મંદિર’ કહેવામાં આવે છે. આ મંદિર દક્ષિણ ભારતના સૌથી પ્રખ્યાત મંદિરોમાંનું એક છે. 100 એકરમાં ફેલાયેલું આ મંદિર ચેન્નાઈથી 145 કિલોમીટર દૂર પલાર નદીના કિનારે આવેલું છે. દર વર્ષે હજારો ભક્તો અહીં દર્શન માટે આવે છે. આ મંદિર અંદાજે 400 કરોડ રૂપિયાના ખર્ચે બનાવવામાં આવ્યું હતું. આ મંદિર 24 ઓગસ્ટ 2007ના રોજ જાહેર જનતા માટે ખુલ્લું મુકવામાં આવ્યું હતું.

મહાલક્ષ્મી મંદિર મુંબઈ, મહારાષ્ટ્ર

મહારાષ્ટ્રના મુંબઈ સ્થિત મહાલક્ષ્મીનું આ ભવ્ય મંદિર અહીં રહેતા લાખો લોકો માટે આસ્થાનું મુખ્ય કેન્દ્ર છે. આ મંદિર પ્રવાસીઓમાં પણ ઘણું લોકપ્રિય છે. આ મંદિરની સ્થાપના અંગ્રેજોના સમયમાં કરવામાં આવી હતી. એવું કહેવાય છે કે દેવી લક્ષ્મી એક કોન્ટ્રાક્ટર રામજી શિવાજીના સ્વપ્નમાં દેખાયા અને તેમને સમુદ્ર તટમાંથી ત્રણ દેવીની મૂર્તિઓ બહાર કાઢીને મંદિરમાં સ્થાપિત કરવાનો આદેશ આપ્યો હતો. મહાલક્ષ્મી મંદિરના ગર્ભગૃહમાં ત્રણ દેવી મહાલક્ષ્મી, મહાકાલી અને મહાસરસ્વતીની મૂર્તિઓ એકસાથે સ્થાપિત છે.

લક્ષ્મી-નારાયણ મંદિર ચંબા, હિમાચલ પ્રદેશ

હિમાચલ પ્રદેશના ચંબા સ્થિત લક્ષ્મી-નારાયણ મંદિરમાં ભક્તોને ઘણી આસ્થા છે. આ મંદિર તેની પરંપરાગત સ્થાપત્ય અને શિલ્પ કલા માટે પણ જાણીતું છે. આ મંદિર ચંબાના 6 મુખ્ય મંદિરોમાં સૌથી મોટું અને સૌથી જૂનું છે. ભગવાન વિષ્ણુ અને માતા લક્ષ્મીને સમર્પિત આ મંદિર 10મી સદીમાં રાજા સાહિલ વર્મન દ્વારા બનાવવામાં આવ્યું હતું. આખું વર્ષ અહીં ભક્તોની ભીડ રહે છે.

આ પણ વાંચોઃ દિવાળી બાદ શુક્ર કરશે ધન રાશિમાં પ્રવેશ, ત્રણ રાશિની બદલાશે લાઈફ