મધ્યપ્રદેશમાં ચાલતી ટ્રેનમાં લાગી આગ, ઘણા મુસાફરો જીવ બચાવવા ચાલુ ટ્રેનમાંથી માર્યો કૂદકો

ભોપાલ, 27 ઓકટોબર : દેશમાં ટ્રેન દુર્ઘટનાઓનો સિલસિલો અટકવાનો કોઈ સંકેત દેખાઈ રહ્યો નથી. આ વખતે રવિવારે મધ્યપ્રદેશમાં ચાલતી ટ્રેનમાં આગ લાગી હતી. જેના કારણે મુસાફરોમાં ગભરાટ ફેલાયો હતો અને અનેક મુસાફરોએ ટ્રેનમાંથી કૂદીને પોતાનો જીવ બચાવ્યો હતો. આ ટ્રેન ઈન્દોરથી રતલામ જઈ રહી હતી. પશ્ચિમ રેલ્વેએ એક નિવેદનમાં જણાવ્યું હતું કે આ દુર્ઘટનામાં કોઈ જાનહાનિ થઈ નથી અને આગ પર કાબૂ મેળવી લેવામાં આવ્યો છે.

પશ્ચિમ રેલવેના રતલામ ડિવિઝનના CPROએ એક નિવેદનમાં જણાવ્યું હતું કે ટ્રેન નંબર 09347 ડૉ. આંબેડકર નગર-રતલામ ડેમુ ટ્રેનમાં રવિવારે સાંજે 5:20 વાગ્યે આગ લાગી હતી. આ આગ રૂનિજા અને નૌગાંવ વચ્ચે ફાટી નીકળી હતી. ઘટનાની જાણ થતાં જ ફાયર બ્રિગેડને જાણ કરવામાં આવી હતી. આગને કાબુમાં લેવામાં આવી છે. ટ્રેનના એન્જિનમાં આગ લાગવાથી અફરાતફરી મચી ગઈ હતી. જ્યાં અકસ્માત થયો હતો ત્યાં ફાયર બ્રિગેડને પહોંચવાનો કોઈ રસ્તો નથી.

રેલવેએ જણાવ્યું કે, ઈન્દોરથી રતલામ જઈ રહેલી DEMU ટ્રેનના એન્જિનમાં આગ ફાટી નીકળી હતી. તે સમયે ટ્રેન રૂનીચા અને પ્રીતમ નગર વચ્ચે હતી. ફાયર બ્રિગેડને સ્થળ પર પહોંચવા માટે કોઈ રસ્તો ન હતો. સ્થાનિક લોકો અને રેલવે કર્મચારીઓએ સાથે મળીને આગ પર કાબૂ મેળવ્યો હતો.

આગ લાગ્યા બાદ સ્થાનિક ખેડૂતોએ તેમના મોટર પંપ અને પાઈપનો ઉપયોગ કરીને આગ ઓલવવામાં મદદ કરી હતી. તેમની તત્પરતાના કારણે જ આગ પર કાબુ મેળવી શકાયો હતો.

ઘટના બાદ ટ્રેનને રતલામ લાવવા માટે અન્ય એન્જિનનો ઉપયોગ કરવામાં આવ્યો હતો. સ્થિતિની ગંભીરતાને સમજીને અને મુસાફરોની સુરક્ષાને પ્રાથમિકતા આપતા રેલવે પ્રશાસને તપાસના આદેશ આપ્યા છે.

આ પણ વાંચો : ‘અમે ત્યારે જ રાહતનો શ્વાસ લઈશું જ્યારે…’ અમિત શાહની બંગાળમાં મમતા સરકાર સામે ગર્જના