મુંબઈ : બાંદ્રા ટર્મિનસ સ્ટેશન પર નાસભાગમાં 10 મુસાફરો ઘાયલ, 2 ગંભીર

મુંબઈ, 27 ઓક્ટોબર : મુંબઈના બાંદ્રા ટર્મિનસ સ્ટેશન પર શનિવાર-રવિવારની વચ્ચેની રાત્રે નાસભાગ મચી ગઈ હતી. નાસભાગમાં 10 મુસાફરો ઘાયલ થયા હતા. જેમાંથી બેની હાલત નાજુક છે. આ ઘટના મોડી રાત્રે 2 વાગ્યે બની હતી. મળતી માહિતી મુજબ, મુંબઈથી ગોરખપુર જતી ટ્રેન જ્યારે પ્લેટફોર્મ પર પહોંચી ત્યારે ટ્રેનમાં ચઢવાની ઉતાવળમાં નાસભાગ મચી ગઈ હતી. આ નાસભાગમાં અનેક મુસાફરો ઘાયલ થયા હતા. આ તમામ મુસાફરોને સારવાર માટે ભાભા હોસ્પિટલમાં દાખલ કરવામાં આવ્યા છે.

તહેવારોના સમયમાં ભારતીય રેલ્વેમાં ભીડ રહેવી સામાન્ય બાબત છે. આવી સ્થિતિમાં ઘણીવાર અકસ્માત થવાની સંભાવના રહે છે. મુંબઈમાં કામ કરતા લોકો દિવાળીના અવસર પર મોટી સંખ્યામાં તેમના ઘરે આવે છે. આમાંના મોટાભાગના લોકો ઉત્તર પ્રદેશ અને બિહારના છે. જેના કારણે ગોરખપુર જતી ટ્રેનમાં ચડવા માટે નાસભાગ મચી ગઈ હતી, જેમાં ઘણા લોકો ઘાયલ થયા હતા.

ટ્રેન ઉપડવાનો સમય સવારે 5.10 છે

આ અકસ્માત બાંદ્રા ટર્મિનસના પ્લેટફોર્મ નંબર એક પર થયો હતો. ટ્રેન નંબર 22921, બાંદ્રા ગોરખપુર એક્સપ્રેસ ટ્રેનનો ઉપડવાનો સમય સવારે 5.10 વાગ્યે હતો, પરંતુ ટ્રેન 2.55 વાગ્યે પ્લેટફોર્મ પર પહોંચી હતી. આવી સ્થિતિમાં મુસાફરોએ ઝડપથી ટ્રેનમાં ચઢવાનો પ્રયાસ શરૂ કર્યો અને તેના કારણે નાસભાગ મચી ગઈ હતી. આ નાસભાગમાં અનેક લોકો ઘાયલ થયા છે. ઘાયલોની ઓળખ શબીર અબ્દુલ રહેમાન (40), પરમેશ્વર સુખદર ગુપ્તા (28), રવિન્દ્ર હરિહર ચુમા (30), રામસેવક રવિન્દ્ર પ્રસાદ પ્રજાપતિ (29), સંજય તિલકરામ કાંગે (27), દિવ્યાંશુ યોગેન્દ્ર યાદવ (18), મોહમ્મદ શરીફ શેખ (25), ઇન્દરજીત સહાની (19) અને નૂર મોહમ્મદ શેખ (18) તરીકેની થઈ છે.

રેલવે મુંબઈ-બિહાર રૂટ પર સ્પેશિયલ ટ્રેન ચલાવી રહી છે

ભારતીય રેલવે મુંબઈથી બિહાર રૂટ પર સ્પેશિયલ ટ્રેન ચલાવી રહી છે. દિવાળી અને છઠના તહેવારોમાં ભીડને પહોંચી વળવા માટે આ ટ્રેન ચલાવવામાં આવી રહી છે. આ ટ્રેન મુંબઈના લોકમાન્ય તિલક ટર્મિનસ અને બિહારના રક્સૌલ વચ્ચે ચલાવવામાં આવી રહી છે. તે 2 જાન્યુઆરી સુધી કાર્યરત રહેશે. દરમિયાન, આ ટ્રેન કુલ 18 ટ્રીપ કરશે. મુંબઈથી રક્સૌલની ટ્રેન નંબર 05586 છે. રક્સૌલથી મુંબઈની આ ટ્રેનનો નંબર 05585 છે.

રેલવેએ શું કહ્યું?

રેલ્વેએ કહ્યું છે કે સાપ્તાહિક ટ્રેન બાંદ્રા ગોરખપુર એક્સપ્રેસનું સમયપત્રક ફરીથી નક્કી કરવામાં આવ્યું છે. આ ટ્રેન સવારે 5:10 કલાકે દોડવાની હતી. આજે સવારે રિશેડ્યુલ કર્યા બાદ ટ્રેન પ્લેટફોર્મ પર મોડી આવી હતી. સ્ટેશન પર ભારે ભીડને કારણે સામાન્ય બોગીમાં ચડવા માટે નાસભાગ મચી ગઈ હતી. ડિઝાસ્ટર રિપોર્ટ અનુસાર, 9 લોકો ઘાયલ થયા છે, પરંતુ રેલ્વેએ પુષ્ટિ કરી છે કે કુલ 10 લોકો ઘાયલ થયા છે. કેટલાક લોકોના પગમાં ફ્રેક્ચર થયું છે તો કેટલાકના કમરમાં ફ્રેક્ચર થયું છે. બે ઘાયલોને રજા આપવામાં આવી છે, બાકીનાને ભાભા હોસ્પિટલમાં દાખલ કરવામાં આવ્યા છે. ટ્રેન આખરે 5:10 વાગ્યે રવાના થઈ છે.

આ પણ જૂઓ :- જ્ઞાનવાપી કેસ અંગે જગદગુરુ રામભદ્રાચાર્યનું મોટું નિવેદન, જાણો શું કહ્યું?