યુપીના અમરોહામાં સ્કૂલબસ ઉપર ફાયરિંગ : ત્રીસેક બાળકોનો આબાદ બચાવ

અમરોહા, 25 ઓક્ટોબર : ઉત્તર પ્રદેશના અમરોહા જિલ્લામાંથી મોટા સમાચાર સામે આવ્યા છે. અહીં શુક્રવારે સવારે ચાર અજાણ્યા શખસોએ સ્કૂલ વાન પર બે રાઉન્ડ ફાયરિંગ કર્યું હતું. વાન પર પથ્થરમારો પણ કર્યો હતો.  ઘટના સમયે 4 ધોરણ સુધીના બાળકો વાનમાં મુસાફરી કરી રહ્યા હતા. ફાયરિંગ જોઈને વાન ચાલક ઝડપથી ભાગી ગયો અને બાળકોને શાળાએ લઈ ગયો જેથી બાળકોનો જીવ બચી ગયો હતો. વાન પર ફાયરિંગ થયાની માહિતી મળતાની સાથે જ સ્કૂલમાં હોબાળો મચી ગયો હતો.

બાળકોના પરિવારજનો પણ ઉતાવળમાં શાળાએ પહોંચી ગયા હતા અને ઘટનાની માહિતી મેળવવાનું શરૂ કર્યું હતું. ફાયરિંગની આ ઘટના ગજરૌલા પોલીસ સ્ટેશન વિસ્તારની છે. જણાવવામાં આવી રહ્યું છે કે શુક્રવારે સવારે SRS ઇન્ટરનેશનલ સ્કૂલની વાન બાળકોને લઈને આવી રહી હતી. વાનમાં ચોથા ધોરણ સુધીના બાળકો મુસાફરી કરી રહ્યા હતા. આ દરમિયાન રસ્તામાં ચાર અજાણ્યા બદમાશોએ વાનને નિશાન બનાવી તેના પર બે રાઉન્ડ ફાયરિંગ કર્યું હતું. ગોળીઓનો અવાજ સાંભળીને વાનમાં બેઠેલા બાળકો ડરી ગયા અને રડવા લાગ્યા હતા.

ફાયરિંગની સાથે વાન પર પથ્થરમારો પણ કરવામાં આવ્યો

આ દરમિયાન બદમાશોએ બસ પર પથ્થરમારો શરૂ કરી દીધો હતો. આ જોઈને ડ્રાઈવરે તેજ સ્પીડમાં કાર હંકારી હતી અને ઉતાવળમાં શાળાએ પહોંચ્યો હતો. શાળામાં બાળકોને રડતા જોઈને ગભરાટ ફેલાયો હતો. આચાર્ય અને શિક્ષકે જ્યારે વાન ચાલક પાસેથી માહિતી લીધી ત્યારે તેણે સમગ્ર ઘટનાની જાણકારી આપી હતી. આ પછી પ્રિન્સિપાલે પોલીસ સ્ટેશનને ઘટનાની જાણ કરી હતી.

પોલીસ અજાણ્યા શખ્સોને શોધવામાં વ્યસ્ત

માહિતી મળતાની સાથે જ પોલીસ ઘટનાસ્થળે પહોંચી ગઈ હતી અને ડ્રાઈવરની સંપૂર્ણ માહિતી લીધી હતી. ઘટનાની ગંભીરતા જોતા ઉચ્ચ પોલીસ અધિકારીઓ પણ ઘટના સ્થળે પહોંચી ગયા હતા. ટોચના અધિકારીઓએ પોલીસ સ્ટેશનને બદમાશોને વહેલી તકે પકડવા સૂચના આપી હતી.  પોલીસ સ્ટેશનનું કહેવું છે કે બદમાશોની શોધ કરવામાં આવી રહી છે.  શા માટે બદમાશોએ સ્કૂલ વાન પર ગોળીબાર કર્યો તે તપાસનો વિષય છે. આ અંગે પણ તપાસ કરવામાં આવી રહી છે.

આ પણ વાંચો :- રાજ્યમાં બોટિંગ અને વોટર સ્પોર્ટ્સ એક્ટિવિટી વધુ સલામત બનાવવા નિયમો જાહેર