પૂણે ટેસ્ટ : વોશિંગ્ટન સુંદરની 7 વિકેટ, ન્યુઝિલેન્ડ 259 રનમાં ઓલ આઉટ
પૂણે, 24 ઓક્ટોબર : પૂણે ટેસ્ટ મેચમાં ટીમ ઈન્ડિયા માટે સ્ટાર ઓલરાઉન્ડર વોશિંગ્ટન સુંદર ટ્રમ્પ કાર્ડ સાબિત થયો છે. કેપ્ટન રોહિત શર્મા અને મુખ્ય કોચ ગૌતમ ગંભીરે મોટો જુગાર રમ્યો અને વોશિંગ્ટન સુંદરને 3 વર્ષ બાદ ટેસ્ટ ટીમમાં પાછો લીધો હતો. દરમિયાન વોશિંગ્ટન સુંદરે આ ભરોસો જીત્યો અને મેચની પહેલી જ ઇનિંગમાં શાનદાર પ્રદર્શન કર્યું હતું. આ મેચમાં તેણે કિવી બેટ્સમેનોને ખૂબ જ પરેશાન કર્યા હતા અને 7 વિકેટો ઝડપી હતી આ દરમિયાન, તેણે એક એવી સિદ્ધિ હાંસલ કરી જે તે તેની ટેસ્ટ કારકિર્દીમાં પહેલાં ક્યારેય કરી શક્યો ન હતો.
વોશિંગ્ટન સુંદરે ધમાકેદાર વિકેટ લીધી હતી
વોશિંગ્ટન સુંદરે પરત ફરતા જ હલચલ મચાવી દીધી હતી. તેણે પ્રથમ દાવમાં ન્યૂઝિલેન્ડની બેટિંગને તોડવાનું કામ કર્યું. તે પ્રથમ દાવમાં ભારતનો સૌથી સફળ બોલર હતો અને તેણે કુલ 7 બેટ્સમેનોને પોતાનો શિકાર બનાવ્યા હતા. મહત્વનું છે કે, આ પહેલીવાર છે જ્યારે વોશિંગ્ટન સુંદરે ટેસ્ટ મેચની એક ઇનિંગમાં 5 કે તેથી વધુ વિકેટ લીધી હોય. આ દરમિયાન તેણે ન્યૂઝિલેન્ડના મોટા બેટ્સમેનોને પોતાનો શિકાર બનાવ્યા હતા.
વોશિંગ્ટન સુંદરે આ મેચમાં પોતાની પ્રથમ વિકેટ રચિન રવિન્દ્રના રૂપમાં લીધી હતી. આ પછી તેણે ટોમ બ્લંડેલ, ડેરિલ મિશેલ, ગ્લેન ફિલિપ્સ, ટિમ સાઉથી, એજાઝ પટેલ અને મિશેલ સેન્ટનરને પણ પોતાનો શિકાર બનાવ્યો હતો. વોશિંગ્ટન સુંદર આ ઇનિંગમાં ભારતનો સૌથી વધુ આર્થિક બોલર પણ હતો. આ તેની કારકિર્દીનો શ્રેષ્ઠ સ્પેલ પણ છે. આ મેચ પહેલા વોશિંગ્ટન સુંદરે ટીમ ઈન્ડિયા માટે 4 મેચમાં 6 વિકેટ ઝડપી હતી, પરંતુ આ વખતે તેણે એક ઈનિંગમાં વધુ વિકેટ લીધી હતી. ખાસ વાત એ હતી કે આ 7 વિકેટમાંથી તેણે 5 વિકેટ ક્લીન બોલ્ડ કરી હતી.
પ્લેઇંગ 11માં તક મળવા પર સવાલો ઉઠ્યા હતા
આ મેચની શરૂઆતમાં જ વોશિંગ્ટન સુંદરને તક મળવા પર સવાલો ઉઠી રહ્યા હતા. વાસ્તવમાં વોશિંગ્ટન સુંદરે આ મેચમાં કુલદીપ યાદવની જગ્યા લીધી હતી. આવી સ્થિતિમાં સુનીલ ગાવસ્કરે પણ આ નિર્ણયને ખોટો ગણાવ્યો હતો. તેનું માનવું હતું કે આ મેચમાં કુલદીપને જ તક મળવી જોઈતી હતી. પરંતુ વોશિંગ્ટન સુંદરે પોતાના પ્રદર્શનથી બધાને ખોટા સાબિત કર્યા હતા. વોશિંગ્ટન સુંદરની આ જોરદાર બોલિંગના કારણે ન્યૂઝીલેન્ડનો પ્રથમ દાવ 259 રનમાં સમેટાઈ ગયો હતો. વોશિંગ્ટન ઉપરાંત આર અશ્વિન પણ 3 વિકેટ લેવામાં સફળ રહ્યો હતો.
