વસ્તીના અસંતુલનથી ભારતમાં પણ લોકશાહી પર જોખમ: આવું કોણે અને કેમ કહ્યું?

જયપુર, 16 ઓક્ટોબર : વસ્તીનું અસંતુલન થવાથી ભારતમાં પણ લોકશાહી પર જોખમ આવી શકે છે, તેમ ઉપરાષ્ટ્રપતિ જગદીપ ધનખડે આજે ચેતવણી ઉચ્ચારતા કહ્યું હતું. દેશના કેટલાક વિસ્તારોમાં અમુક વસ્તીમાં ગુણોત્તર એટલો બદલાઈ ગયો છે કે ત્યાંની ચૂંટણીઓ અર્થહીન બની ગઈ છે. આવા વિસ્તારોમાં ચૂંટણીનું પરિણામ શું આવશે તે અગાઉથી નક્કી થઈ જાય છે તેમ ઉપરાષ્ટ્રપતિએ કહ્યું હતું.

જયપુરમાં ચાર્ટર્ડ એકાઉન્ટન્ટ્સની કોન્ફરન્સને સંબોધતા ઉપરાષ્ટ્રપતિ જગદીપ ધનખરે કહ્યું કે દેશના ઘણા વિસ્તારો રાજકીય કિલ્લેબંધીમાં ફેરવાઈ ગયા છે. આ વિસ્તારોમાં ચૂંટણી અને લોકશાહીનો કોઈ અર્થ નથી, જ્યાં પરિણામ શું આવશે તે પહેલેથી જ નક્કી છે. તેમણે કહ્યું કે વિશ્વના ઘણા ભાગોમાં વસ્તીના પ્રમાણમાં ઝડપી ફેરફાર ચિંતાનો વિષય બની ગયો છે.

વધુમાં ઉપરાષ્ટ્રપતિએ કહ્યું, ‘જો ઝડપથી વધી રહેલા આ પડકારનો યોગ્ય રીતે સામનો કરવામાં નહીં આવે તો તે આપણા અસ્તિત્વ માટે પણ પડકાર બની જશે.  દુનિયામાં આવું બન્યું છે. મારે એવા દેશોના નામ આપવાની જરૂર નથી જેમણે તેમની ઓળખ ગુમાવી દીધી છે કારણ કે ત્યાં વસ્તી સંતુલનમાં મોટો ફેરફાર થયો હતો. અમુક દેશોમાં તો આ બદલાવ 100 ટકા સુધી આવ્યો છે. તે વસ્તીના ધરતીકંપ જેવું હતું. વસ્તીના આવા અસંતુલનની અસર પરમાણુ બોમ્બથી ઓછી નથી.  જગદીપ ધનખરે કોઈ દેશનું નામ લીધું ન હતું, પરંતુ કહ્યું કે ઘણા વિકસિત દેશો પણ વસ્તીના ગુણોત્તરમાં ઝડપી ફેરફારોનો સામનો કરી રહ્યા છે.

જગદીપ ધનખરે પોતાની વાત આગળ વધારતા કહ્યું, ‘તમે અમારી સંસ્કૃતિ જુઓ છો. અમારો સમાવેશી વિચાર, કાયદેસરતામાં એકતા બધા માટે ફાયદાકારક છે અને દરેકને આગળ લઈ જાય છે. અમે બધા ખુલ્લા હાથે તમારું સ્વાગત કરીએ છીએ, પણ શું થઈ રહ્યું છે?  આનો ખોટી રીતે ફાયદો ઉઠાવવામાં આવી રહ્યો છે. વસ્તીનું પ્રમાણ બદલાઈ રહ્યું છે. પછી વિભાજનની વાતો થાય છે અને આ માટે જ્ઞાતિની પણ વાત થાય છે. તેમણે કોઈ વિસ્તારનું નામ લીધું ન હતું.  પરંતુ કહ્યું કે વસ્તીના ગુણોત્તરમાં ફેરફારને કારણે ઘણા વિસ્તારોમાં ચૂંટણી અર્થહીન બની ગઈ છે.

આ પણ વાંચો :- અમિત શાહની હાજરીમાં હરિયાણાના મુખ્યમંત્રીપદ માટે નાયબ સિંહ સૈનીના નામની જાહેરાત