બાંગ્લાદેશમાં કડક સુરક્ષા વચ્ચે દુર્ગા પૂજા ઉત્સવ, આ વખતે પંડાલની સંખ્યા પણ ઘટી

બાંગ્લાદેશ – 10 ઓકટોબર : બાંગ્લાદેશમાં મંદિરો અને મંડપોમાં કડક સુરક્ષા વચ્ચે બુધવારે દુર્ગા પૂજાની ઉજવણી શરૂ થઈ. વચગાળાની સરકારે ગુરુવારે સપ્તમીના અવસર પર સત્તાવાર રજા જાહેર કરી હતી. બાંગ્લાદેશમાં પાંચ દિવસીય દુર્ગા પૂજા ઉત્સવ રવિવારે દેવી દુર્ગાની મૂર્તિઓના વિસર્જન સાથે સમાપ્ત થશે. વચગાળાની સરકારના મુખ્ય સલાહકાર મોહમ્મદ યુનુસ રવિવારે મુખ્ય શક્તિપીઠોમાંના એક ઢાકેશ્વરી મંદિરની મુલાકાત લે તેવી અપેક્ષા છે.

ઓછા પંડાલ કેમ બનાવાયા?
બાંગ્લાદેશ હિન્દુ બૌદ્ધ ખ્રિસ્તી એકતા પરિષદના નેતા કાજોલ દેબનાથે પીટીઆઈને જણાવ્યું હતું કે, “અમે આજે બીજા દિવસે (સપ્તમી) દુર્ગા પૂજા ઉત્સવની ઉજવણી કરી રહ્યા છીએ. હજુ સુધી ક્યાંયથી કોઈ અપ્રિય ઘટનાની જાણ થઈ નથી.” દેબનાથે કહ્યું કે આ વર્ષે દુર્ગા પૂજા માટે 31,462 પંડાલ બનાવવામાં આવ્યા છે, જ્યારે 2023માં આ આંકડો 32,408 હતો. તેમણે ચોમાસા અને અન્ય સંબંધિત સમસ્યાઓને કારણે પંડાલની સંખ્યામાં થયેલા ઘટાડાને જવાબદાર ગણાવ્યો હતો.

હિન્દુ સમુદાયને નિશાન બનાવવામાં આવ્યો હતો
લઘુમતી હિંદુ સમુદાયને નિશાન બનાવવામાં આવ્યો હતો અને શેખ હસીનાના વડા પ્રધાન પદેથી રાજીનામું અને 5 ઑગસ્ટના રોજ દેશ છોડ્યા પછી થયેલી હિંસા દરમિયાન તેમના વ્યવસાયો, મિલકતો અને ધાર્મિક સ્થળોને તોડફોડ અને આગચંપી કરવામાં આવી હતી. હજારો હિંદુઓએ ઢાકા અને ઉત્તરપૂર્વીય બંદર શહેર ચિત્તાગોંગમાં સુરક્ષાની માંગણી સાથે વિરોધ પ્રદર્શન કર્યું હતું.

ચેતવણી આપવામાં આવી હતી
દુર્ગા પૂજાના તહેવારોની શરૂઆતના અઠવાડિયા પહેલા, વચગાળાની સરકારના ધાર્મિક બાબતોના સલાહકાર એએફએમ ખાલિદ હુસૈને તહેવાર દરમિયાન સાંપ્રદાયિક સંવાદિતાને ભંગ કરનારા અથવા ધાર્મિક સ્થળોને નિશાન બનાવનારાઓ સામે કડક કાર્યવાહી કરવાની ચેતવણી આપી હતી. બાંગ્લાદેશની કુલ વસ્તી લગભગ 17 કરોડ છે, જેમાં હિંદુઓનો હિસ્સો લગભગ આઠ ટકા છે.

આ પણ વાંચો : યુપીની જેલમાં મુસ્લિમ કેદીઓએ નવરાત્રિનો ઉપવાસ રાખ્યો, કહ્યું – ‘સબકા માલિક એક’