પાકિસ્તાનના બલૂચિસ્તાનમાં મોટો હુમલો, બંદૂકધારીઓએ 20 ખાણિયાઓને ઠાર કર્યા
દુકી, 11 ઓક્ટોબર : દક્ષિણ-પશ્ચિમ પાકિસ્તાનમાં બંદૂકધારીઓએ 20 ખાણિયાઓની ગોળી મારીને હત્યા કરી દીધી છે. આ દરમિયાન સાત અન્ય ઘાયલ થયા છે. એક પોલીસ અધિકારીએ શુક્રવારે આ જાણકારી આપી હતી. અશાંત બલૂચિસ્તાન પ્રાંતમાં તાજેતરના સમયમાં આ સૌથી ઘાતક હુમલો છે. આ હુમલો એવા સમયે થયો છે જ્યારે આગામી થોડા દિવસોમાં રાજધાનીમાં એક મોટી સુરક્ષા સમિટ યોજાવાની છે.
આ ઘટના અંગે પોલીસ અધિકારી હમાયુ ખાન નાસિરે જણાવ્યું કે બંદૂકધારીઓએ ગુરુવારે મોડી રાત્રે દુકી જિલ્લામાં કોલસાની ખાણ પાસે રહેતા લોકોના ઘરોને ઘેરી લીધા અને પછી અંધાધૂંધ ગોળીબાર શરૂ કરી દીધો હતો. મોટાભાગના લોકો બલૂચિસ્તાનના પશ્તુન-ભાષી વિસ્તારના હતા. મૃતકોમાંથી ત્રણ અને ઘાયલોમાં ચાર અફઘાન હતા.
હુમલાની તાત્કાલિક જવાબદારી કોઈએ લીધી નથી. આ એ વિસ્તાર છે જ્યાં મોટી સંખ્યામાં અલગતાવાદી નેતાઓ રહે છે અને તેમની આઝાદીની માંગ કરે છે. આ લોકોનો આરોપ છે કે પાકિસ્તાન સરકાર સ્થાનિક લોકોના ભોગે તેલ અને ખનિજથી સમૃદ્ધ બલૂચિસ્તાનનું અન્યાયી રીતે શોષણ કરી રહી છે.
દરમિયાન ગત સોમવારે બલૂચ લિબરેશન આર્મી નામના જૂથે કહ્યું કે તેણે પાકિસ્તાનના સૌથી મોટા એરપોર્ટની બહાર ચીની નાગરિકો પર હુમલો કર્યો છે. દેશમાં હજારો ચાઇનીઝ કામ કરે છે, જેમાંથી મોટા ભાગના બેઇજિંગના બિલિયન-ડોલર બેલ્ટ એન્ડ રોડ ઇનિશિયેટિવમાં છે.
આ પણ વાંચો :- અમદાવાદમાં AMCના એક નિર્ણયથી ફેરિયાઓની દિવાળી સુધરી
