લદ્દાખમાં એશિયાની સૌથી મોટા ઈમેજિંગ દૂરબીન ‘MACE’નું ઉદ્ધાટન, જાણો વિશેષતા

લદ્દાખ, 9 ઓકટોબર :   વૈજ્ઞાનિક સંશોધનને આગળ વધારવા માટે એશિયાના સૌથી મોટા ઇમેજિંગ ટેલિસ્કોપનું લદ્દાખમાં ઉદ્ઘાટન કરવામાં આવ્યું છે. આ ટેલિસ્કોપનું નામ મેજર એટમોસ્ફેરિક ચેરેનકોવ એક્સપેરિમેન્ટ (MACE) છે. ઉલ્લેખનીય છે કે DAE એટલે કે પરમાણુ ઉર્જા વિભાગના સચિવ અજીત કુમાર મોહંતીએ લદ્દાખના હેનલેમાં એશિયાના સૌથી મોટા ઇમેજિંગ ચેરેનકોવ ટેલિસ્કોપનું ઉદ્ઘાટન કર્યું. આ ટેલિસ્કોપની મદદથી વૈજ્ઞાનિક સંશોધનમાં વધુ પ્રગતિ થશે. ટેલિસ્કોપનું નિર્માણ મુંબઈ સ્થિત BARC દ્વારા ઈલેક્ટ્રોનિક્સ કોર્પોરેશન ઓફ ઈન્ડિયા લિમિટેડ (ECIL) અને અન્ય ભારતીય ઉદ્યોગ ભાગીદારોની મદદથી કરવામાં આવ્યું છે અને તે સ્વદેશી રીતે બનાવવામાં આવ્યું છે.

આ ટેલિસ્કોપની ચર્ચા શા માટે થઈ રહી છે?
આ ટેલિસ્કોપની ચર્ચા તેના ઉદ્ઘાટન પછીથી જ થઈ રહી છે. 4,300 મીટરની ઉંચાઈ પર સ્થિત, તે વિશ્વમાં તેના પ્રકારનું સૌથી ઉંચુ ટેલિસ્કોપ છે જે હવે વૈજ્ઞાનિક સંશોધનને પ્રોત્સાહન આપશે. DAE સચિવ અજીત કુમાર મોહંતીએ જણાવ્યું હતું કે, ‘MACE ઓબ્ઝર્વેટરી ભારત માટે એક મોટી સિદ્ધિ છે અને વૈશ્વિક સ્તરે કોસ્મિક-રે સંશોધનમાં દેશને મોખરે રાખે છે.’ તેમણે વધુમાં જણાવ્યું હતું કે, ટેલિસ્કોપ વૈજ્ઞાનિકોને ઉચ્ચ-ઊર્જાવાળા ગામા કિરણોનો અભ્યાસ કરવાની મંજૂરી આપશે, જેનાથી બ્રહ્માંડની સૌથી ઊર્જાસભર ઘટનાઓની ઊંડી સમજણનો માર્ગ મોકળો થશે. MACE પ્રોજેક્ટ માત્ર વૈજ્ઞાનિક સંશોધનને અનુસરવામાં જ નહીં પરંતુ લદ્દાખના સામાજિક-આર્થિક વિકાસને પણ ટેકો આપવા માટે મહત્ત્વપૂર્ણ ભૂમિકા ભજવે છે.

ઉદ્ઘાટન 4 ઓક્ટોબરના રોજ થયું હતું
MACE ઓબ્ઝર્વેટરીનું ઉદ્ઘાટન DAE ના પ્લેટિનમ જ્યુબિલી વર્ષ કાર્યક્રમનો એક ભાગ હતો. 4 ઓક્ટોબરના રોજ, ડૉ. અજીત કુમાર મોહંતીએ લદ્દાખના હેનલેમાં મેજર એટમૉસ્ફેરિક ચેરેનકોવ એક્સપેરિમેન્ટનું ઉદ્ઘાટન કર્યું. તેના ઉદ્ઘાટન પછી, તેમણે MACE ટેલિસ્કોપને સફળ બનાવનારા તમામ પ્રયાસોની પણ પ્રશંસા કરી.

આ પણ વાંચો : અમદાવાદઃ 345 કોન્સ્ટેબલને હેડ કોન્સ્ટેબલ તરીકે બઢતી, જૂઓ લિસ્ટ