ભારત-બાંગ્લાદેશની ટી20 સિરીઝ વચ્ચે સંન્યાસનું એલાન કરશે આ ખિલાડી, 14 વર્ષથી ટીમનો ભાગ

બાંગ્લાદેશ – 8 ઓકટોબર :   ભારત અને બાંગ્લાદેશની ટીમો વચ્ચે 3 મેચની T20 શ્રેણી રમાઈ રહી છે. શ્રેણીની પ્રથમ મેચમાં ટીમ ઈન્ડિયાએ 7 વિકેટે જીત મેળવી હતી. હવે બંને ટીમો વચ્ચે બીજી T20 મેચ 9 ઓક્ટોબરે દિલ્હી અરુણ જેટલી સ્ટેડિયમમાં રમાશે. આ મેચ પહેલા એક મોટા સમાચાર સામે આવ્યા છે. એક મોટો ખેલાડી આ સીરિઝ સાથે જ તેની T20 માંથી સંન્યાસ લઈ શકે છે. અહેવાલો અનુસાર, આ ખેલાડી આ શ્રેણીની મધ્યમાં T20 આંતરરાષ્ટ્રીય ક્રિકેટમાંથી નિવૃત્તિની જાહેરાત કરવા જઈ રહ્યો છે.

આ ખેલાડી ટી-20 શ્રેણી વચ્ચે નિવૃત્તિ લેશે
અહેવાલો અનુસાર, બાંગ્લાદેશનો સિનિયર ઓલરાઉન્ડર મહમુદુલ્લાહ ભારત સામે ચાલી રહેલી સીરિઝ સમાપ્ત થયા બાદ T20 ઈન્ટરનેશનલમાંથી નિવૃત્તિ લેવા જઈ રહ્યો છે. શાકિબ અલ હસનની જેમ મહમુદુલ્લાહે પણ ટી20 ફોર્મેટ છોડવાનો નિર્ણય લીધો છે. BCBના એક અધિકારીએ ડેઈલી સ્ટારને કહ્યું, ‘આ કોઈ વિરામ નથી, તેઓ T20 ઈન્ટરનેશનલ ચેપ્ટરનો અંત લાવવા ઈચ્છે છે. તેણે આ સિરીઝમાં તેની જાહેરાત કરવાની છે.

નઝમુલ હુસૈન શાંતોએ પણ સંકેત આપ્યો
શ્રેણી પહેલા, કેપ્ટન નઝમુલ હુસૈન શાંતોએ સંકેત આપ્યો હતો કે મહમુદુલ્લાહ તેના ભવિષ્ય વિશે પસંદગીકારો સાથે વાત કરશે. શાંતોએ પ્રથમ T20 મેચ પહેલા કહ્યું હતું કે, ‘મહમુદુલ્લાહ ભાઈ વિશે, મને લાગે છે કે આ શ્રેણી તેમના માટે ખૂબ જ મહત્વપૂર્ણ છે. તે સિલેકટર્સ સાથે ચર્ચા કરી શકે છે. હું આ વિશે સંપૂર્ણ રીતે સ્પષ્ટ નથી, પરંતુ મારું માનવું છે કે પસંદગીકારો અને બોર્ડ સાથે તેના ભવિષ્ય વિશે ચોક્કસપણે ચર્ચા થશે, ઉલ્લેખનીય છે કે, આ શ્રેણીની છેલ્લી મેચ 12 ઓક્ટોબરે હૈદરાબાદમાં થશે મહમુદુલ્લાહની આ ફોર્મેટમાં આ છેલ્લી મેચ પણ હોઈ શકે છે.

બાંગ્લાદેશ માટે અત્યાર સુધીનું પ્રદર્શન
38 વર્ષીય મહમુદુલ્લાહ બાંગ્લાદેશ ટીમ માટે અત્યાર સુધીમાં 139 ટી-20 મેચ રમી ચૂક્યો છે. તેમણે 2007માં બાંગ્લાદેશ માટે તેમની પ્રથમ ટી20 મેચ રમી હતી. આ સમયગાળા દરમિયાન તેણે 117.74ની સ્ટ્રાઈક રેટથી 2395 રન બનાવ્યા છે. તેમણે બોલિંગમાં 40 વિકેટ પણ લીધી છે. ઉલ્લેખનીય છે કે, તેણે 2021માં ટેસ્ટમાંથી નિવૃત્તિ લીધી હતી. જો કે, તે હજુ પણ બાંગ્લાદેશ માટે વનડેમાં રમવાનું ચાલુ રાખી શકે છે. મહમુદુલ્લાહ બાંગ્લાદેશ માટે 50 ટેસ્ટ મેચ રમી ચૂક્યો છે. તે અત્યાર સુધીમાં 232 ODI મેચ પણ રમી ચૂક્યા છે.

આ પણ વાંચો : દેશનો સૌથી મોટો IPO ખુલાવાની તારીખ આવી ગઈ, જાણો ક્યારે અને શું હશે પ્રાઈઝ બેંડ