SBIએ ગ્રાહકોને આપ્યો ઝટકો, ક્રેડિટ કાર્ડના નિયમોમાં કર્યા ફેરફાર, જાણો શું છે

નવી દિલ્હી, 7 ઓક્ટોબર : જો તમે વીજળી, ગેસ, પાણી વગેરે જેવા યુટિલિટી બિલની ચૂકવણી કરવા માટે ક્રેડિટ કાર્ડનો ઉપયોગ કરો છો તો તમારે સાવધાન રહેવાની જરૂર છે. ખરેખર, દેશની સૌથી મોટી બેંક સ્ટેટ બેંક ઓફ ઈન્ડિયા (SBI) એ તેના ક્રેડિટ કાર્ડ યુઝર્સને મોટો ઝટકો આપ્યો છે. SBI કાર્ડ દ્વારા ક્રેડિટ કાર્ડના નિયમોમાં કેટલાક ફેરફારો કરવામાં આવ્યા છે. નવા નિયમો આવતા મહિના એટલે કે નવેમ્બર 1, 2024થી અમલમાં આવશે.

કેવી રીતે લાગે છે ચાર્જ ?

બેંકે ક્રેડિટ કાર્ડ દ્વારા યુટિલિટી બિલની ચુકવણી પર 1 ટકા વધારાનો ચાર્જ લાદવાનો નિર્ણય કર્યો છે. આ પહેલા પણ ઘણી બેંકો અને કાર્ડ કંપનીઓએ એક નિશ્ચિત મર્યાદા બાદ યુટિલિટી બિલ પેમેન્ટ પર 1 ટકા વસૂલવાનું શરૂ કર્યું છે. SBI ક્રેડિટ કાર્ડ દ્વારા એક સ્ટેટમેન્ટ સાયકલમાં રૂ.50,000 થી વધુના યુટિલિટી બિલની ચુકવણી પર 1% વધારાનો ચાર્જ વસૂલવામાં આવશે. જો કે, 50 હજાર રૂપિયાથી નીચેના યુટિલિટી બિલ પેમેન્ટ પર કોઈ વધારાનો ચાર્જ લેવામાં આવશે નહીં.

ફાયનાન્સ ચાર્જમાં પણ ફેરફાર

SBI એ શૌર્ય/ડિફેન્સ ક્રેડિટ કાર્ડ સિવાયના તમામ અસુરક્ષિત ક્રેડિટ કાર્ડના ફાઇનાન્સ ચાર્જીસમાં પણ ફેરફાર કર્યો છે. હવે SBIના અસુરક્ષિત ક્રેડિટ કાર્ડ પર 3.75 ટકા ફાયનાન્સ ચાર્જ વસૂલવામાં આવશે. આ નિયમો 1 નવેમ્બર 2024થી પણ લાગુ થશે. અમે તમને જણાવી દઈએ કે અસુરક્ષિત ક્રેડિટ કાર્ડ એવા ક્રેડિટ કાર્ડ છે જેના માટે કોઈ સિક્યોરિટી ડિપોઝિટ અથવા કોલેટરલ આપવાની જરૂર નથી, જ્યારે સિક્યોર્ડ ક્રેડિટ કાર્ડ એવા ક્રેડિટ કાર્ડ છે જે ફિક્સ્ડ ડિપોઝિટ (FD)ના બદલામાં આપવામાં આવે છે.

આ પણ વાંચો :- પશ્ચિમ બંગાળમાં કોલસાની ખાણમાં વિસ્ફોટ થતાં 6ના મૃત્યુ, જૂઓ વીડિયો