માલદીવના પ્રમુખ મોહમ્મદ મુઈઝુ આજથી ભારતની મુલાકાતે, જાણો શું છે એજન્ડા

નવી દિલ્હી, 6 ઓક્ટોબર : માલદીવના પ્રમુખ મોહમ્મદ મુઈઝુ 6 થી 10 ઓક્ટોબર સુધી ભારતમાં રહેશે. ચાર મહિનામાં આ તેમની બીજી દિલ્હી મુલાકાત હશે. મુઇઝ્ઝુની ભારતની આ પ્રથમ દ્વિપક્ષીય મુલાકાત હશે. આ પહેલા તેઓ જૂન 2024માં વડાપ્રધાન નરેન્દ્ર મોદીના શપથ ગ્રહણ સમારોહમાં હાજરી આપવા નવી દિલ્હી આવ્યા હતા. વિદેશ મંત્રાલયે એક નિવેદનમાં કહ્યું કે, મુઈઝુ તેમની મુલાકાત દરમિયાન રાષ્ટ્રપતિ દ્રૌપદી મુર્મુને મળશે અને પીએમ મોદી સાથે પરસ્પર હિતના દ્વિપક્ષીય, પ્રાદેશિક અને આંતરરાષ્ટ્રીય મુદ્દાઓ પર ચર્ચા કરશે.

વધુમાં નિવેદનમાં કહેવામાં આવ્યું છે કે મુઈઝુ મુંબઈ અને બેંગલુરુની પણ મુલાકાત લેશે, જ્યાં તે બિઝનેસ ઈવેન્ટ્સમાં ભાગ લેશે. મંત્રાલયના નિવેદનમાં કહેવામાં આવ્યું છે કે, માલદીવ હિંદ મહાસાગર ક્ષેત્ર (IOR)માં ભારતનો મુખ્ય દરિયાઈ પડોશી છે અને વડાપ્રધાનના ‘SAGAR’ (પ્રદેશમાં તમામ માટે સુરક્ષા અને વિકાસ) અને ભારતની ‘નેબરહુડ ફર્સ્ટ પોલિસી’ના વિઝનને અનુરૂપ છે અને એક વિશિષ્ટ સ્થાન ધરાવે છે.

જ્યારે ભારત-માલદીવના સંબંધો ખરાબ બન્યા હતા

ચીન તરફી નેતા તરીકે જોવામાં આવતા મુઇઝુએ ટાપુ રાષ્ટ્રનો હવાલો સંભાળ્યા બાદ ભારત અને માલદીવ વચ્ચેના સંબંધો તંગ બન્યા હતા. મુઈઝુ તેમના ‘ઈન્ડિયા આઉટ’ અભિયાન પછી સત્તામાં આવ્યા, જ્યાં તેમણે માલદીવમાંથી ભારતીય સૈનિકો અને સહાયક સ્ટાફને પાછા ખેંચવાની માંગ કરી.

તેના થોડા સમય પછી, મુઇઝુ કેબિનેટના કેટલાક મંત્રીઓએ PM મોદી વિરુદ્ધ અપમાનજનક ભાષાનો ઉપયોગ કર્યા બાદ રાજદ્વારી વિવાદ ફાટી નીકળ્યો હતો જ્યારે મોદીએ તેમના સોશિયલ મીડિયા પર લક્ષદ્વીપનો પ્રચાર કરતી કેટલીક તસવીરો પોસ્ટ કરી હતી. તે મંત્રીઓને કેબિનેટમાંથી દૂર કરવામાં આવ્યા, માલદીવમાં પ્રવાસનને ફટકો પડ્યો અને ભારતમાંથી પ્રવાસીઓની સંખ્યામાં ઘટાડો થયો હતો.

જો કે, માલદીવે તેના આર્થિક વિકાસ, સુરક્ષા અને ઈન્ફ્રાસ્ટ્રક્ચર પ્રોજેક્ટ્સમાં ભારતની મહત્વપૂર્ણ ભૂમિકાને સ્વીકાર્યા પછી બંને પક્ષોએ તણાવપૂર્ણ સંબંધો સુધારવાનો પ્રયાસ કર્યો હતો. આ વર્ષે જૂનમાં વડાપ્રધાન નરેન્દ્ર મોદીએ મુઈઝુને લોકસભા ચૂંટણી બાદ તેમના શપથ ગ્રહણ સમારોહમાં હાજરી આપવા માટે નવી દિલ્હી બોલાવ્યા હતા. તાજેતરમાં ઓગસ્ટ મહિનામાં ભારતીય વિદેશ પ્રધાન એસ જયશંકરે માલદીવની મુલાકાત લીધી હતી, જેને માલેએ દ્વિપક્ષીય સંબંધોમાં ‘માઇલસ્ટોન’ ગણાવ્યું હતું.

આ પણ વાંચો :- શિમલાની સંજૌલી મસ્જિદના ત્રણ માળ ગેરકાયદે, બે મહિનામાં તોડી પાડવા કોર્ટનો આદેશ