Breaking News : છત્તીસગઢમાં DRG અને STFનું મોટું ઓપરેશન, 30 નકસલીઓનું એન્કાઉન્ટર

બસ્તર, 4 ઓક્ટોબર : છત્તીસગઢના બસ્તરમાં શુક્રવારે એન્કાઉન્ટર દરમિયાન સુરક્ષા જવાનોએ 30 નક્સલવાદીઓને ઠાર માર્યા હતા. એક વરિષ્ઠ પોલીસ અધિકારીએ જણાવ્યું હતું કે નારાયણપુર-દંતેવાડા આંતર-જિલ્લા સરહદ પર અભુજમાદના થુલાથુલી અને નેન્દુર ગામો વચ્ચેના જંગલમાં બપોરે 1 વાગ્યાની આસપાસ એન્કાઉન્ટર થયું હતું. ડિસ્ટ્રિક્ટ રિઝર્વ ગાર્ડ (DRG) અને સ્પેશિયલ ટાસ્ક ફોર્સ (STF)ના જવાનો ઓપરેશનમાં સામેલ હતા.

અધિકારીએ જણાવ્યું કે એન્કાઉન્ટર સ્થળ પરથી 30 નક્સલવાદીઓના મૃતદેહ અને એક AK-47 રાઈફલ અને એક SLR (સેલ્ફ-લોડિંગ રાઈફલ) સહિત હથિયારોનો જથ્થો મળી આવ્યો છે. આ વર્ષે અત્યાર સુધીમાં, બસ્તર ક્ષેત્રમાં અલગ-અલગ એન્કાઉન્ટરમાં સુરક્ષા દળો દ્વારા 171 નક્સલવાદીઓ માર્યા ગયા છે. આ પ્રદેશમાં દંતેવાડા અને નારાયણપુર સહિત સાત જિલ્લાઓનો સમાવેશ થાય છે.

ન્યૂઝ એજન્સીના જણાવ્યા અનુસાર અધિકારીઓએ જણાવ્યું કે ગાઢ જંગલ વિસ્તારમાં નક્સલીઓની હાજરીની માહિતી મળી હતી. તેના આધારે સુરક્ષાકર્મીઓએ વિસ્તારને કોર્ડન કરીને કોમ્બિંગ શરૂ કર્યું હતું. ત્યારબાદ નક્સલીઓએ ગોળીબાર શરૂ કર્યો હતો. સુરક્ષા જવાનોએ પણ જવાબી કાર્યવાહી કરી, જેમાં 30 નક્સલવાદીઓ માર્યા ગયા હતા. આ વિસ્તારમાં 2 કલાક સુધી ગોળીબાર થયો હતો. હાલમાં, તેમના અન્ય સાગરિતો ભાગવામાં સફળ થયા છે કે કેમ તે શોધવા માટે આ વિસ્તારમાં સર્ચ ઓપરેશન હાથ ધરવામાં આવ્યું છે.

ઉલ્લેખનીય છે કે, થોડા દિવસો પહેલા નારાયણપુર જિલ્લામાં એક એન્કાઉન્ટરમાં ત્રણ નક્સલવાદીઓ માર્યા ગયા હતા. તેના પર 41 લાખ રૂપિયાનું ઈનામ હતું. 25 લાખનું ઈનામ ધરાવનાર રૂપેશ પણ આમાં સામેલ હતો. રૂપેશ માઓવાદીઓની કંપની નંબર 10નું નેતૃત્વ કરતો હતો અને મહારાષ્ટ્રના ગઢચિરોલી વિસ્તારમાં સક્રિય હતો. તેણે કહ્યું કે તેના માથા પર 25 લાખ રૂપિયાનું ઈનામ હતું.

આ પણ વાંચો :- MBBSના વિદ્યાર્થીઓ માટે મોટા સમાચાર, ગૃહમંત્રી અમિત શાહે કરી જાહેરાત