અમેરિકા જવા ઈચ્છતા ભારતીયો માટે આવ્યા મોટા સમાચાર, USએ ભર્યું આ પગલું

નવી દિલ્હી, 30 સપ્ટેમ્બર : અમેરિકા જવાનું વિચારી રહેલા ભારતીયો માટે સારા સમાચાર છે. યુએસએ પ્રવાસીઓ, કામદારો અને વિદ્યાર્થીઓ સહિત ભારતીય પ્રવાસીઓ માટે વધારાની 2 લાખ 50 હજાર વિઝા એપોઇન્ટમેન્ટ ખોલી છે. આ અંગે જણાવાયું હતું કે વિઝાની વધતી જતી માંગને પહોંચી વળવા આ નિર્ણય લેવામાં આવ્યો છે.

અમેરિકી દૂતાવાસ દ્વારા જારી કરાયેલા નિવેદન અનુસાર, આ પગલું એવા સમયે લેવામાં આવ્યું છે જ્યારે 2024માં અત્યાર સુધીમાં 12 લાખથી વધુ ભારતીયો અમેરિકાની મુલાકાત લઈ ચૂક્યા છે. આ આંકડો વર્ષ 2023 ના સમાન સમયગાળા કરતા 35% વધુ છે. લગભગ 60 લાખ ભારતીયો પાસે યુએસ જવા માટે નોન-ઇમિગ્રન્ટ વિઝા છે, જેમાં સતત વધારો કરવામાં આવી રહ્યો છે.

દૂતાવાસના નિવેદનમાં કહેવામાં આવ્યું છે કે, ‘તાજેતરમાં વિઝાને લઈને નવા સ્લોટ જારી કરવામાં આવ્યા છે. આનાથી હજારો ભારતીય અરજદારોને સમયસર ઇન્ટરવ્યુ માટે હાજર થવામાં મદદ મળશે. પ્રવાસની સુવિધા મળશે. આ લોકો-થી-લોકોના સંબંધોની કરોડરજ્જુ છે જે યુએસ-ભારત સંબંધોને મજબૂત બનાવે છે.

ઉલ્લેખનીય છે કે ભારતમાં યુએસ મિશન સતત બીજા વર્ષે 1 મિલિયન નોન-ઇમિગ્રન્ટ વિઝા અરજીઓને પાર કરી ચૂક્યું છે. નિવેદન અનુસાર, આ ઉનાળાની સ્ટુડન્ટ વિઝા સીઝન દરમિયાન રેકોર્ડ સંખ્યામાં અરજીઓ મળી હતી. હવે અમે પરિવારોને એકસાથે લાવવા, વ્યવસાયોને જોડવા અને પ્રવાસનની સુવિધા આપવા પર ધ્યાન કેન્દ્રિત કરી રહ્યાં છીએ.

ઓક્ટો.’22 થી સપ્ટે.’23 સુધી 6 લાખ સ્ટુડન્ટ વિઝા

યુએસ એમ્બેસેડર એરિક ગારસેટીને ટાંકીને નિવેદનમાં કહેવામાં આવ્યું છે કે, ‘વડાપ્રધાન નરેન્દ્ર મોદી અને રાષ્ટ્રપતિ જો બિડેને વિઝા પ્રક્રિયાને સુધારવા અને ઝડપી બનાવવા અંગે વાત કરી હતી. મને એ કહેતા આનંદ થાય છે કે અમે તે વચન પૂરું કર્યું છે. એમ્બેસી અને 4 કોન્સ્યુલેટ ખાતે કોન્સ્યુલર ટીમો એ સુનિશ્ચિત કરવા પ્રયત્ન કરે છે કે વધતી જતી માંગને સંતોષી શકાય.’

અમેરિકન વહીવટીતંત્ર દ્વારા અગાઉ પણ કેટલાક આંકડા જાહેર કરવામાં આવ્યા હતા. આ મુજબ, ઓક્ટોબર 2022 થી સપ્ટેમ્બર 2023 સુધી, યુએસ દ્વારા 600,000 સ્ટુડન્ટ વિઝા આપવામાં આવ્યા હતા, જેમાંથી લગભગ એક ચતુર્થાંશ ભારતીયો હતા. યુએસએ કોરોનાવાયરસ રોગચાળાને કારણે વિઝા અરજીઓમાં વિલંબ અને બેકલોગને ઉકેલવા માટે પણ પગલાં લીધાં છે.