કોલેસ્ટ્રોલ બોર્ડર પર છે? તો આજે જ ચાલુ કરી દો અળસીના બીનું સેવન
- ફાઈબરથી ભરપૂર અળસીના બીનું સેવન હૃદયને સ્વસ્થ રાખવામાં મદદ કરે છે. જે લોકો વધેલા કોલેસ્ટ્રોલથી પરેશાન હોય તેમણે ફ્લેક્સ સીડનું સેવન અચૂક કરવું
HD ન્યુઝ ડેસ્કઃ ફ્લેક્સસીડ એટલે કે અળસીના બી આરોગ્ય માટે ખૂબ જ ફાયદાકારક છે. ફાઈબરથી ભરપૂર અળસીના બીનું સેવન હૃદયને સ્વસ્થ રાખવામાં મદદ કરે છે. જે લોકો વધેલા કોલેસ્ટ્રોલથી પરેશાન હોય તેઓ ફ્લેક્સસીડનું સેવન કરે તો તે કોલેસ્ટ્રોલ ઘટાડવામાં મદદ કરી શકે છે. આ બીજ પાચનમાં સુધારો કરે છે અને હાડકાંને પણ મજબૂત બનાવે છે. આયુર્વેદમાં સદીઓથી અનેક રોગોની સારવાર માટે તેનો ઉપયોગ કરવામાં આવે છે. જો તમારું કોલેસ્ટ્રોલ લેવલ બોર્ડર પર આવી ગયું હોય તો આજે જ અળસીના બીનું સેવન શરૂ કરી દો. ચાલો જાણીએ કે અળસી ખાવાથી બીજા શું ફાયદા થાય છે.
હૃદયના આરોગ્ય માટે ફાયદાકારકઃ
અળસીમાં ઓમેગા-3 ફેટી એસિડ ભરપૂર માત્રામાં જોવા મળે છે જે હૃદયના આરોગ્ય માટે ખૂબ જ ફાયદાકારક છે. તે કોલેસ્ટ્રોલના સ્તરને ઘટાડવામાં, બ્લડ પ્રેશરને નિયંત્રિત કરવામાં અને હૃદય રોગના જોખમને ઘટાડવામાં મદદ કરે છે.
પાચન તંત્ર માટે બેસ્ટ
ફ્લેક્સસીડમાં ફાઈબરનું પ્રમાણ વધુ હોય છે જે પાચનતંત્રને હેલ્ધી રાખવામાં મદદ કરે છે. તે કબજિયાત, એસિડિટી અને અપચો જેવી સમસ્યાઓથી રાહત અપાવે છે.
વજન ઘટાડવામાં મદદરૂપ
ફ્લેક્સસીડમાં રહેલા ફાઈબરને કારણે તે તમને લાંબા સમય સુધી પેટ ભરેલું હોવાનો અનુભવ કરાવે છે, જેનાથી તમે ઓછું ખાઓ છો અને વજન ઘટાડવામાં મદદ મળે છે.
ત્વચા માટે ફાયદાકારક
ફ્લેક્સસીડમાં એન્ટીઓક્સીડેન્ટ હોય છે જે ત્વચાને ફ્રી રેડિકલથી બચાવે છે અને તેને સ્વસ્થ રાખે છે. તે ત્વચાની બળતરા, સોજો અને એલર્જીને ઘટાડવામાં પણ મદદ કરે છે.
હાડકાં માટે ફાયદાકારક
અળસીમાં કેલ્શિયમ અને મેગ્નેશિયમ જેવા ખનિજો જોવા મળે છે જે હાડકાંને મજબૂત બનાવવામાં મદદ કરે છે અને ઑસ્ટિયોપોરોસિસનું જોખમ ઘટાડે છે
ખોરાકમાં અળસી કેવી રીતે સામેલ કરશો?
ફ્લેક્સસીડ પાવડર
તમે ફ્લેક્સસીડને પીસીને પાવડર બનાવી શકો છો અને તેને દહીં, સ્મૂધી અથવા સૂપમાં ભેળવીને ખાઈ શકો છો.
અળસીના બી
તમે અળસીના બીને દહીં, કચુંબર અથવા દલિયામાં ઉમેરીને ખાઈ શકો છો.
ફ્લેક્સસીડ ઓઈલ
તમે સલાડમાં ફ્લેક્સસીડ તેલ ઉમેરી શકો છો અથવા શાકભાજીમાં તેનો ઉપયોગ કરી શકો છો.
આ પણ વાંચોઃ ઓવરવેઈટ જ નહીં, અંડરવેઈટ હોવું પણ છે ખતરનાક, આપે છે અનેક બીમારીને જન્મ
