કેટલા ભારતીયો દર વર્ષે રૂ.10 કરોડથી વધુની કમાણી કરે છે? જૂઓ આ ચોંકાવનારા આંકડા

• 2019થી 2024 સુધીમાં 10 કરોડ રૂપિયાથી વધુની કમાણી કરનારા લોકોની સંખ્યામાં 63 ટકાનો વધારો થયો

નવી દિલ્હી, 18 સપ્ટેમ્બર: દેશમાં સમૃદ્ધ ભારતીયોની સંખ્યા અને આવક બંને ઝડપથી વધી રહ્યા છે. એક રિપોર્ટમાં જાહેર કરવામાં આવેલા ડેટાને જોઈને તેનો અંદાજ સરળતાથી લગાવી શકાય છે. સેન્ટ્રમ ઇન્સ્ટિટ્યુશનલ રિસર્ચ (Centrum Institutional Research) દ્વારા એક નવો રિપોર્ટ બહાર પાડવામાં આવ્યો છે, જે દર્શાવે છે કે દેશમાં 31,000થી વધુ લોકો દર વર્ષે 10 કરોડ રૂપિયા (Crorepati) કમાઈ રહ્યા છે, જ્યારે વાર્ષિક 5 કરોડ રૂપિયા કમાતા લોકોની સંખ્યા 58,000ને પાર થઈ ગઈ છે . આ આંકડા ઊંચી નેટવર્થ ધરાવતા લોકોની જબરદસ્ત કમાણી દર્શાવે છે.

પાંચ વર્ષમાં જંગી નફો કર્યો

સેન્ટ્રમ ઇન્સ્ટિટ્યુશનલ રિસર્ચ રિપોર્ટમાં છેલ્લા પાંચ વર્ષ એટલે કે 2019થી 2024 સુધીનો ડેટા જાહેર કરવામાં આવ્યો છે અને કહેવામાં આવ્યું છે કે, ભારતમાં કરોડપતિની સંખ્યા ઝડપથી વધી રહી છે. આ 5 વર્ષમાં ભારતમાં 10 કરોડથી વધુની કમાણી કરનારા લોકોની સંખ્યામાં 63 ટકાનો જોરદાર વધારો થયો છે અને હાલમાં 31,800 કરોડપતિ વાર્ષિક આટલી કમાણી કરી રહ્યા છે. આ સમયગાળા દરમિયાન, 10 કરોડથી વધુની કમાણી કરનારાઓની કુલ નેટવર્થ 121 ટકા વધીને રૂ. 38 લાખ કરોડ થઈ છે, જે 121 ટકાનો ઉછાળો દર્શાવે છે.

એ જ રીતે, જે ભારતીયોની વાર્ષિક આવક રૂ. 5 કરોડથી વધુની છે તેમની સંખ્યામાં છેલ્લા પાંચ વર્ષમાં 49 ટકાનો મજબૂત વધારો જોવા મળ્યો છે અને તેમનો આંકડો 58,200 પર પહોંચી ગયો છે. વર્ષ 2019-24ની વચ્ચે તેમની સંયુક્ત નેટવર્થમાં 106 ટકાનો મોટો ઉછાળો આવ્યો છે અને તે 40 લાખ કરોડ રૂપિયા થઈ ગયો છે.

કોરોના પણ કમાણી પર બ્રેક લગાવી શક્યો નહીં

આ કમાણીના આંકડા દર્શાવે છે કે, છેલ્લા પાંચ વર્ષમાં ભારતીયોની કમાણીમાં જોરદાર વધારો થયો છે. ખાસ વાત એ છે કે, એવા સમયે પણ કમાણી ઝડપથી વધી રહી હતી જ્યારે દેશ કોરોના મહામારીના ભયંકર પ્રકોપનો સામનો કરી રહ્યો હતો. રિપોર્ટમાં અંદાજ છે કે, ભારતમાં હાઈ નેટવર્થ ધરાવતા લોકોની આવક (HNI) 2028 સુધીમાં વાર્ષિક આશરે 14 ટકાના દરે વધી શકે છે અને તે $2.2 ટ્રિલિયન સુધી પહોંચી શકે છે.

જેમાં કહેવામાં આવ્યું છે કે, દેશમાં માત્ર 15 ટકા લોકો એવા છે જેઓ પોતાની નાણાકીય સંપત્તિ(Financial wealth)ને પ્રોફેશનલ્સ દ્વારા મેનેજ કરે છે, જ્યારે વૈશ્વિક સ્તરે તે 75 ટકા છે. હાઈ નેટવર્થ અને અલ્ટ્રા હાઈ નેટવર્થ ધરાવતાં લોકોની આવક વધારવામાં સૌથી મહત્ત્વની ભૂમિકાએ લોકોનું નોકરીને બદલે વ્યવસાય તરફ આગળ વધવું પણ છે.

કરોડપતિ બનવાની આ અદ્ભુત ફોર્મ્યુલા

કરોડપતિ બનવાનું સપનું કોણ જોતું નથી? પરંતુ જો યોગ્ય વ્યૂહરચના સાથે રોકાણ કરવામાં આવે તો ₹1 કરોડના લક્ષ્ય સુધી પહોંચવું બહુ મુશ્કેલ નથી. આ આંકડો જોવામાં મુશ્કેલ લાગી શકે છે, પરંતુ જો કોઈ વ્યક્તિ પાસે યોગ્ય રોકાણ અને કમ્પાઉન્ડિંગની શક્તિ હોય, તો તે વ્યક્તિ સરળતાથી અહીં પહોંચી શકે છે. એક ખાસ ફોર્મ્યુલા તેમાં ઉપયોગી થઈ શકે છે.

FundsIndiaના રિસર્ચ રિપોર્ટ અનુસાર, જો તમે મ્યુચ્યુઅલ ફંડ SIPમાં 10% ચક્રવૃદ્ધિ સાથે દર મહિને રૂ. 30,000નું રોકાણ કરો છો, તો તમે તેના પર મળનારા 12%ના સરેરાશ વળતરના દરે સાત વર્ષમાં તમે પહેલા રૂ. 50 લાખ સુધી પહોંચી શકો છો, જ્યારે આગામી રૂ. 50 લાખ મેળવવામાં માત્ર 3 વર્ષનો જ સમય લાગશે. આ પછી, જો તમે 1 કરોડ રૂપિયાના જમા ભંડોળને જાળવી રાખો છો અને તેને આ ક્રમમાં આગળ વધારો છો, તો પછીની 50 લાખ રૂપિયાની રકમ ઉમેરવામાં ફક્ત બે વર્ષ લાગશે. જો કે, બજારમાં ઉતાર-ચઢાવને કારણે, તમને SIP પર મળતું વળતર વધુ કે ઓછું હોઈ શકે છે.

આ પણ જૂઓ: કેન્દ્ર સરકારે PF ઉપાડની રકમમાં કર્યો વધારો, હવે આટલા નાણા ઉપાડી શકાશે