જમ્મુ કાશ્મીરમાં કાલે પ્રથમ તબક્કાનું મતદાન, જાણો કેવી છે તૈયારીઓ

શ્રીનગર, 17 સપ્ટેમ્બર : જમ્મુ-કાશ્મીર વિધાનસભા ચૂંટણીના પ્રથમ તબક્કામાં આવતીકાલે 18 સપ્ટેમ્બર બુધવારે જિલ્લાઓની 24 વિધાનસભા બેઠકો પર મતદાન થશે. જમ્મુ-કાશ્મીર કેન્દ્રશાસિત પ્રદેશ બન્યા બાદ આ પ્રથમ વખત છે કે રાજ્યમાં મતદાન થશે. અગાઉ, દસ વર્ષ પહેલાં જમ્મુ અને કાશ્મીરમાં વિધાનસભાની ચૂંટણીઓ યોજાઈ હતી, જ્યારે લદ્દાખ રાજ્યનો એક ભાગ હતો. બુધવારે, જમ્મુ અને કાશ્મીરના કેન્દ્રશાસિત પ્રદેશમાં જમ્મુ વિભાગના ત્રણ જિલ્લાઓ અને કાશ્મીર ખીણના ચાર જિલ્લાઓની 24 બેઠકો પર 90 અપક્ષો સહિત 219 ઉમેદવારોના ભાવિનો નિર્ણય કરવા માટે 23 લાખથી વધુ મતદારો તેમના મતાધિકારનો ઉપયોગ કરશે.

પ્રથમ તબક્કામાં કેટલા લોકો મતદાન કરશે?

ચૂંટણી પંચના જણાવ્યા અનુસાર, પ્રથમ તબક્કામાં કુલ 23,27,580 મતદારો છે, જેમાં 11,76,462 પુરૂષો, 11,51,058 મહિલાઓ અને 60 ત્રીજા લિંગના મતદારોનો સમાવેશ થાય છે. પ્રથમ તબક્કામાં18 થી 19 વર્ષની વયના 1.23 લાખ યુવાનો, 28,309 વિકલાંગ મતદારો અને 85 વર્ષથી વધુ વયના 15,774 વૃદ્ધ મતદારો પણ તેમના મતાધિકારનો ઉપયોગ કરી શકશે. શહેરી વિસ્તારોમાં 302 મતદાન કેન્દ્રો અને ગ્રામ્ય વિસ્તારોમાં 2,974 મતદાન કેન્દ્રો છે. દરેક મતદાન કેન્દ્ર પર પ્રિસાઇડિંગ ઓફિસર સહિત ચાર ચૂંટણી કર્મચારીઓ તૈનાત રહેશે.

કેવા પ્રકારની સુરક્ષા વ્યવસ્થા?

કાશ્મીર પ્રદેશના પોલીસ મહાનિરીક્ષક વી.કે.બર્ડીએ પીટીઆઈને જણાવ્યું હતું કે જમ્મુ અને કાશ્મીર પોલીસે વિધાનસભા ચૂંટણી માટે વિસ્તૃત સુરક્ષા વ્યવસ્થા કરી છે જેથી વધુને વધુ લોકો તેમના મતાધિકારનો ઉપયોગ કરી શકે. બિરડીએ કહ્યું કે સુરક્ષા વ્યવસ્થા માટે CAPF, જમ્મુ કાશ્મીર સશસ્ત્ર પોલીસ અને જમ્મુ કાશ્મીર પોલીસના અનેક દળો તૈનાત કરવામાં આવ્યા છે.

ચૂંટણીના પ્રથમ તબક્કામાં મુખ્ય ઉમેદવારો

કાશ્મીરના અગ્રણી ઉમેદવારોમાં – ભારતીય કોમ્યુનિસ્ટ પાર્ટી-માર્કસિસ્ટ (CPI-M) ના મોહમ્મદ યુસુફ તારીગામી સતત પાંચમી વખત કુલગ્રામ બેઠક પરથી ચૂંટણી લડી રહ્યા છે. તેમના સિવાય કોંગ્રેસ પાર્ટીના ગુલામ અહેમદ મીર ત્રીજી વખત દુરુથી જ્યારે નેશનલ કોન્ફરન્સ (NC)ના સકીના ઇતુ દમહલ હાજીપોરાથી ચૂંટણી લડી રહ્યા છે.

ખીણમાં ભાજપ 19 બેઠકો ઉપર જ લડશે

પીપલ્સ ડેમોક્રેટિક પાર્ટી (PDP)ના સરતાજ મદની (દેવસર) અને અબ્દુલ રહેમાન વીરી (શાંગાસ-અનંતનાગ) પણ અગ્રણી ઉમેદવારોમાં સામેલ છે. બિજબેહરા વિધાનસભા બેઠક પરથી PDPની ઇલ્તિજા મુફ્તી નેશનલ કોન્ફરન્સના બશીર અહેમદ વીરી અને બીજેપીના સોફી મોહમ્મદ યુસુફ સામે ચૂંટણી લડી રહી છે. પીડીપીના વાહીદ પારા પુલવામા સીટથી ચૂંટણી લડી રહ્યા છે. તે આતંકવાદના કેસમાં આરોપી છે. તેમને પાર્ટીના ભૂતપૂર્વ સાથીદાર અને NC ઉમેદવાર મોહમ્મદ ખલીલ તરફથી સખત પડકારનો સામનો કરવો પડી રહ્યો છે. પ્રતિબંધિત જમાત-એ-ઈસ્લામીના ભૂતપૂર્વ સભ્ય તલત મજીદ અલીના મેદાનમાં પ્રવેશ સાથે સ્પર્ધા રસપ્રદ બની ગઈ છે.

પ્રથમ તબક્કામાં કઈ સીટો પર ચૂંટણી લડાઈ રહી છે?

બુધવારે જ્યાં મતદાન થશે તેમાં પમ્પોર, ત્રાલ, પુલવામા, રાજપોરા, જૈનપોરા, શોપિયાં, ડીએચ પોરા, કુલગામ, દેવસર, દોરુ, કોકરનાગ (ST), અનંતનાગ પશ્ચિમ, અનંતનાગ, શ્રીગુફવારા-બિજબેહારા, શાંગસ-અનંતનાગ પૂર્વ, પહેલગામ, ઈન્દરવાલ, કિશ્તવાડ, પેડર-નાગસેની, ભદરવાહ, ડોડા, ડોડા પશ્ચિમ, રામબન અને બનિહાલનો સમાવેશ થાય છે.