પાલઘર, 30 ઓગસ્ટ : પ્રધાનમંત્રી નરેન્દ્ર મોદીએ આજે મહારાષ્ટ્રનાં પાલઘરમાં અનેકવિધ વિકાસલક્ષી પરિયોજનાઓનું ઉદઘાટન કર્યું હતું અને શિલાન્યાસ કર્યો હતો. આજની પરિયોજનાઓમાં આશરે 76,000 કરોડ રૂપિયાના ખર્ચે વાઢવણ બંદરનો શિલાન્યાસ અને આશરે 1560 કરોડ રૂપિયાના 218 મત્સ્યઉદ્યોગ પ્રોજેક્ટ્સનું ઉદઘાટન અને શિલાન્યાસનો સમાવેશ થાય છે. પીએમ મોદીએ આશરે રૂ. 360 કરોડનાં ખર્ચે વેસલ કમ્યુનિકેશન એન્ડ સપોર્ટ સિસ્ટમનાં નેશનલ રોલઆઉટનો શુભારંભ કરાવ્યો હતો.
વધુમાં પ્રધાનમંત્રીએ મત્સ્યપાલનનાં બંદરોનો વિકાસ, અપગ્રેડેશન અને આધુનિકીકરણ, મત્સ્ય ઉતરાણ કેન્દ્રો અને મત્સ્ય બજારનાં નિર્માણ સહિત મત્સ્ય સંબંધિત માળખાગત સુવિધાઓની મહત્ત્વપૂર્ણ યોજનાઓનો શિલાન્યાસ પણ કર્યો હતો. તેમણે માછીમાર લાભાર્થીઓને ટ્રાન્સપોન્ડર સેટ અને કિસાન ક્રેડિટ કાર્ડ એનાયત કર્યા હતા. પ્રધાનમંત્રી મોદીએ સમગ્ર માછીમાર સમુદાયને અભિનંદન આપતા કહ્યું કે, આજે 700 કરોડ રૂપિયાથી વધુની કિંમતનાં માછીમારો સાથે સંબંધિત યોજનાઓનો શિલાન્યાસ કરવામાં આવ્યો છે અને સમગ્ર દેશમાં 400 કરોડ રૂપિયાથી વધારેનાં મૂલ્યનાં પ્રોજેક્ટનું ઉદઘાટન પણ કરવામાં આવ્યું છે.
તેમણે વાઢવણ બંદર, દીઘી બંદર ઔદ્યોગિક વિસ્તારનો વિકાસ અને મત્સ્યપાલન માટેની અનેકવિધ યોજનાઓનો ઉલ્લેખ કર્યો હતો અને જણાવ્યું હતું કે, માતા મહાલક્ષ્મી દેવી, માતા જીવદાની અને ભગવાન તુંગરેશ્વરના આશીર્વાદથી તમામ વિકાસ કાર્યો શક્ય બન્યા છે. ભારતના સુવર્ણયુગનો ઉલ્લેખ કરીને પ્રધાનમંત્રીએ કહ્યું હતું કે, એક સમય હતો, જ્યારે ભારતની દરિયાઈ ક્ષમતાને કારણે સૌથી વધુ મજબૂત અને સમૃદ્ધ દેશોમાં ગણના થતી હતી. મહારાષ્ટ્રના લોકો આ સંભવિતતાથી સારી રીતે વાકેફ છે. છત્રપતિ શિવાજી મહારાજે પોતાની નીતિઓ અને દેશના વિકાસ માટે મજબૂત નિર્ણયો લઈને ભારતની સમુદ્રી ક્ષમતાઓને નવી ઊંચાઈઓ પર પહોંચાડી હતી. પીએમ મોદીએ ઉમેર્યું હતું કે, સમગ્ર ઇસ્ટ ઇન્ડિયા કંપની પણ દરિયા સારંગ કાન્હોજી યગંતીની સામે ઊભી રહી શકે તેમ નથી.
પ્રધાનમંત્રીએ જણાવ્યું હતું કે, અત્યારે આખું વિશ્વ વાઢવણ બંદર તરફ જોઈ રહ્યું છે. તેમણે જણાવ્યું હતું કે, દુનિયામાં બહુ ઓછા બંદરો વાઢવણ બંદરની 20 મીટરની ઊંડાઈ સાથે મેળ ખાય છે. તેમણે ભારપૂર્વક જણાવ્યું હતું કે, આ બંદર રેલવે અને હાઇવે કનેક્ટિવિટીને કારણે સંપૂર્ણ વિસ્તારની આર્થિક સ્થિતિની કાયાપલટ કરશે. તેમણે ઉલ્લેખ કર્યો હતો કે, ડેડિકેટેડ વેસ્ટર્ન ફ્રેઇટ કોરિડોર સાથે જોડાણ અને દિલ્હી-મુંબઇ એક્સપ્રેસવેની નિકટતાને કારણે તે નવા વ્યવસાયો અને વેરહાઉસિંગ માટે તકો ઊભી કરશે. તેમણે ઉમેર્યું હતું કે, કાર્ગો આખું વર્ષ આ વિસ્તારની અંદર અને બહાર વહેતો રહેશે, જેથી મહારાષ્ટ્રનાં લોકોને લાભ થશે.
પીએમ મોદીએ ‘મેક ઇન ઇન્ડિયા’ અને ‘ભારત અભિયાન’ કાર્યક્રમો દ્વારા મહારાષ્ટ્ર દ્વારા કરવામાં આવેલા ફાયદાઓ પર પ્રકાશ પાડતા કહ્યું હતું કે, મહારાષ્ટ્રનો વિકાસ મારા માટે એક મોટી પ્રાથમિકતા છે. ભારતની પ્રગતિમાં મહારાષ્ટ્રની મુખ્ય ભૂમિકાની નોંધ લઈને પ્રધાનમંત્રીએ વિકાસને અટકાવવાનો પ્રયાસ કરી રહેલા લોકોનાં પ્રયાસો પર શોક વ્યક્ત કર્યો હતો.
