કોલકાતા દુષ્કર્મ-હત્યા કેસમાં અરિજીત સિંહે ન્યાયની કરી માંગ, ગીતમાં વ્યક્ત કર્યું પોતાનું દર્દ

• બોલિવૂડના પ્રખ્યાત ગાયક અરિજીત સિંહે નવા બંગાળી ગીત ‘આર કોબે’ ગાયું

નવી દિલ્હી, 29 ઓગસ્ટ: કોલકાતાની RG કર હોસ્પિટલમાં મહિલા ડૉક્ટર પરની નિર્દયતાએ દેશભરના લોકોને હચમચાવી દીધા છે. દુષ્કર્મ-હત્યા કેસમાં પીડિતાના પરિવારને ન્યાય મળે તે માટે દેશભરમાં વિરોધ પ્રદર્શન થઈ રહ્યા છે. સામાન્ય લોકો હોય કે સેલેબ્સ, દરેક પીડિત પરિવાર સાથે ઉભા જોવા મળે છે. હવે બોલિવૂડના પ્રખ્યાત ગાયક અરિજીત સિંહ પણ કોલકાતા મુદ્દે વિરોધ કરતા જોવા મળ્યા છે. તેણે દુર્ઘટના અંગે એક ગીત કમ્પોઝ કર્યું છે, જેના દ્વારા તે કોલકાતામાં ચાલી રહેલા આંદોલનનો હિસ્સો બન્યા છે અને તેમના નવા બંગાળી ગીત ‘આર કોબે’ સાથે ન્યાયની માંગ કરી છે. આ ગીતને લોન્ચ કરતી વખતે તેમણે એમ પણ કહ્યું કે, આ કોઈ પ્રોટેસ્ટ ગીત નથી, પરંતુ કાર્યવાહી માટે આહ્વાન કરે છે.

અરિજીત સિંહે પીડિત પરિવાર માટે ન્યાયની માંગ કરી

કોલકાતામાં દુષ્કર્મ અને હત્યાની ઘટના બાદ દેશભરમાં ગુસ્સાનું વાતાવરણ છે. હવે અરિજીત સિંહ આંદોલનના સમર્થનમાં આવ્યા છે અને તેમના નવા બંગાળી ગીત ‘આર કોબે’ સાથે ન્યાયની માંગણી કરી છે.

‘આર કોબે’ એટલે આનો અંત ક્યારે આવશે? અરિજીતે આ ગીતને માત્ર પોતાનો અવાજ જ નથી આપ્યો, પરંતુ તેણે તેને લખ્યું અને કમ્પોઝ પણ કર્યું છે. અરિજીતે આ ગીતનો વીડિયો પોતાની યુટ્યુબ ચેનલ પર શેર કર્યો છે. ગીતમાં અરિજીતની આંતરિક પીડા અનુભવી શકાય છે. ‘આર કોબે’ ગીત ત્રણ મિનિટનું છે, જે તમને ગુસબમ્પ્સ આપે છે.

અરિજીત સિંહના ગીત પર ફેન્સની પ્રતિક્રિયાઓ પણ આવવા લાગી છે. જ્યારે કેટલાક લોકો એવા છે જેઓ મોડેથી વિરોધનો ભાગ બનવા માટે અરિજીત સિંહને ટ્રોલ કરી રહ્યા છે. તે જ સમયે, કેટલાક લોકો તેના સમર્થન માટે ગાયકના વખાણ કરી રહ્યા છે.

શું છે મામલો?

જે લોકો હજુ પણ આ બાબતથી અજાણ છે. ઉલ્લેખનીય છે કે, આ મહિનાની શરૂઆતમાં આરજી કર હોસ્પિટલમાં 31 વર્ષીય ઇન્ટર્ન ડોક્ટર સાથે દુષ્કર્મ થયો હતો. આ પછી તેની નિર્દયતાથી હત્યા કરવામાં આવી હતી. આ અકસ્માતે સૌને ચોંકાવી દીધા છે. બંગાળમાં તણાવની સ્થિતિ છે. મહિલાઓને સુરક્ષા અને ન્યાય મળે તેવી માંગ ઉઠી છે.

આ પણ જૂઓ: UPSC ઉમેદવારોનું હવે થશે આધાર વેરિફિકેશન: સરકારે આપી મંજૂરી